Kʼelo li kʼusi yichʼoje

Batan ta saʼobil

 KAPITULO 29

¿Mi lek ta xil skotol kʼinetik li Diose?

¿Mi lek ta xil skotol kʼinetik li Diose?

Li kʼin liʼe, ¿kʼu yuʼun lek laj yil li Diose?

¿MI LEK xavaʼi cha bat ta kʼinetik?... Li kʼinetike xuʼ ta xchʼay koʼontontik. ¿Mi lek van chil xa naʼ ti chi jbatutik ta kʼinetik li Mukʼta Jchanubtasvaneje?... Li stuke ibat xchiʼuk jayvoʼuk yajtsʼaklomtak ta jun skʼinal nupunel. Jech xtok, li Jeovae jaʼ jun Dios ti «echʼem slequile», jaʼ xkaltik, ti chmuyubaje, li stuke jun yoʼonton ti kʼalal chi jmuyubajutik ta spasel kʼinetik ti lek chile (1 Timoteo 1:11; Juan 2:1-11).

Ta pajina 29 yuʼun li livro liʼe, ta xalbutik ti Jeovae la xchʼak li Tsajal Nab sventa ch-echʼik li j-israeletike. ¿Mi xvul to ta ajol?... Ta tsʼakale, ikʼejin xchiʼuk akʼotaj li jteklume, xchiʼuk laj yalbeik kolaval li Jeovae. Jaʼ jech kʼuchaʼal jun kʼin la spasik. Chmuyubajik toʼox tajmek li krixchanoetike, xchiʼuk xuʼ jnoptik ta melel ti jaʼ jech toʼox chaʼi sba ek li Diose (Éxodo 15:1, 20, 21).

Jutuk mu 40 jabil ta tsʼakale, li j-israeletike ibatik ta yan mukʼta kʼin. Ta skʼakʼalil taje, li buchʼutik ikʼvanik ta pas kʼine jaʼik krixchanoetik ti muʼyuk bu tsmuyubtaik li Jeovae. Ta melel, yan diosetik ta smuyubtaik xchiʼuk ta xchiʼin sbaik toʼox ta vayel xchiʼuk krixchanoetik ti maʼuk xchiʼilik ta nupunele. ¿Mi lek van xa naʼ ti chbatik ta jun kʼin kʼuchaʼal taje?...  Li Jeovae muʼyuk bu lek laj yil, laj yakʼbe stoj smulik li j-israeletike (Números 25:1-9; 1 Corintios 10:8).

Li Vivlia xtoke ta xalbe sloʼilal chib skʼinal lokʼel ta jabil. Li ta xchibal skʼinal lokʼel ta jabil taje, ¿mi jaʼ laj yichʼ pasbel junuk li Mukʼta Jchanubtasvaneje?... Moʼoj. Xchibal li kʼinetik taje laj yichʼanan pasel sventa yichʼel ta mukʼ krixchanoetik ti muʼyuk bu chtunik ta stojolal li Jeovae. Li june jaʼ skʼinal sventa chlokʼ ta jabil li ajvalil Herodes Agripase, ti jaʼ sventainoj yosilal Galilea kʼalal te toʼox nakal li Jesuse.

Li ajvalil Herodese ep kʼusitik chopol la spas. Yuʼun kʼalal to ta yajnil xchiʼil ta vokʼel la spojbe. Herodías sbi maʼ li antse. Li yajtunel Dios ti jaʼ sbi Juan J-akʼvanej ta voʼe laj yalbe li Herodes ti chopol li kʼusi tspase. Li Herodese muʼyuk bu lek laj yaʼi ti kʼusi albate, jaʼ yuʼun la stikʼ ta chukel li Juane (Lucas 3:19, 20).

Kʼalal jaʼo te tikʼil ta chukel li Juane, kʼot skʼakʼalil chlokʼ ta jabil li Herodese. Liʼe la spas jun mukʼta kʼin, ep buchʼutik la stak ta ikʼel ti lek ojtikinbilike. Skotolik ta xveʼik, ta x-uchʼbajik xchiʼuk ta xchʼay yoʼontonik. Vaʼun, och li stseb Herodiase xchiʼuk akʼotaj ta stojolalik. Toj lek laj yil skotolik li akʼote, jech un chaʼa, li Herodese la skʼan laj yakʼbe jun slekil moton li tsebe. Xi laj yalbee: «Chacacʼbot cʼusiuc  noʼox chacʼanbune. Acʼo me chacʼanbun ta oʼlol ti cʼu smucʼul jventainoje, chacacʼbot», xut.

¿Kʼusi van ti tskʼane? ¿Mi takʼin van? ¿Mi kʼupil pokʼiletik van? ¿Mi jun van mukʼta na sventa yuʼun stuk bu tspas mantal? Li tsebe mu toʼox snaʼ kʼusi tskʼan, jech oxal chaʼa, ibat yoʼ bu oy li smeʼe, li Herodiase, vaʼun xi la sjakʼbee: «¿Cʼusi ta jcʼan xanaʼ?», xut.

Ta skoj ti yuʼun tspʼaj ta skotol yoʼonton li Juan J-akʼvanej ta voʼ li Herodiase, laj yalbe li stseb ti akʼo skʼanbe sjol li Juane. Li tsebe ichaʼsut ta stojolal li ajvalile xchiʼuk xi laj yalbee: «Jaʼ ta jcʼan chavacʼbun ta ora ta jayil taqʼuin sjol li Juan jʼacʼvanej ta voʼe», xut.

Li ajvalil Herodese snaʼoj ti jaʼ jun lekil vinik li Juane xchiʼuk mu skʼan smil. Pe li Herodese laj yalbe ti oy kʼusi chakʼbe ta melel li tsebe, xchiʼuk chat yoʼonton ta skoj ti kʼusi tsnopik li buchʼutik yikʼanoj ta pas kʼin mi muʼyuk bu tspas li kʼusi laj yale. Jaʼ yuʼun la stak batel jun soltaro li ta chukinabe sventa tskʼokbe sjol li Juane. Li soltaroe ta ora noʼox isut tal, xlechoj tal ta jun jayal takʼin li sjol Juane, te une laj yakʼbe li tsebe. Vaʼun li tsebe laj yichʼbe batel li smeʼe (Marcos 6:17-29).

Li yan skʼinal lokʼel ta jabil ti chalbe smelolal li Vivliae  muʼyuk bu lek xtok. Laj yichʼ pasel sventa yichʼel ta mukʼ jun ajvalil ta Egipto. Kʼalal jaʼo yakal li kʼin taje, li ajvalile laj yal mantal ek ti akʼo xichʼ kʼokbel sjol jun krixchanoe. Jech xtok, ta tsʼakale laj yal mantal ti akʼo sjokʼanbeik li sbekʼtale sventa akʼo slajesik li mutetike (Génesis 40:19-22). Li Diose, ¿mi lek van laj yil xa naʼ li xchibal kʼinetik taje?... ¿Mi lek van chavaʼi ti teuk oyote?

¿Kʼusi kʼot ta pasel ta skʼinal slokʼel ta jabil li Herodese?

Jnaʼojtik ti oy stu skotol li kʼusitik te tsʼibabil ta Vivliae. Veno, tee jaʼ noʼox ta xalbe smelolal chib skʼinal lokʼel ta jabil. Ta xchibal kʼin taje oy kʼusitik chopol laj yichʼ pasel sventa tstsʼaki-o li kʼine. Vaʼun chaʼa, ¿kʼusi van yakal xalbutik xa naʼ li Dios ta sventa li spasel kʼin sventa lokʼel ta jabile? Li Diose, ¿mi tskʼan van ta jpastik?...

Melel onoʼox, ta jkʼakʼaliltike muʼyuk buchʼu chichʼ kʼokbel sjol li ta skʼinal buchʼu chlokʼ ta jabile. Pe li buchʼutik baʼyel la snopik tspasike jaʼ krixchanoetik ti muʼyuk bu la smuyubtaik li melel Diose. Ta sventa li skʼinal lokʼel ta jabil ti chal li Vivliae, jun livroe xi ta xale: «Jaʼ noʼox li jpas muliletik [...] li buchʼutik tspasbeik smukʼta kʼinal li skʼakʼalil ti ayanike» (The Catholic Encyclopedia). ¿Mi ta jkʼantik jechutik kʼuchaʼal stukike?...

¿Kʼusi xuʼ xkaltik ta sventa li Mukʼta Jchanubtasvaneje? ¿Mi tspas toʼox skʼinal slokʼel ta jabil li stuke?... Moʼoj, li Vivliae muʼyuk bu chal mi la spas. Mi jaʼuk la spasik ek li baʼyel yajtsʼaklomtake. ¿Mi xa naʼ kʼu yuʼun la snopik tspasbeik ta 25 yuʼun disiembre li skʼinal slokʼel ta jabil Jesús li krixchanoetike?...

Laj yichʼ tʼujel li kʼakʼal taje yuʼun, jech kʼuchaʼal chal yan livroe, «li jnaklejetik ta Romae tspasbeik xa onoʼox skʼinal li Saturno ta skʼakʼalil taje, ti jaʼ skʼakʼalil ti tspasbeik skʼinal chlokʼ ta jabil li Kʼakʼale» (The World Book Encyclopedia). Jaʼ xkaltik, sventa tspasbeik skʼinal slokʼel ta jabil li Jesuse, laj yichʼ tʼujel jun kʼakʼal ti tspasik xa onoʼox jun kʼin li krixchanoetik ti maʼuk yajtsʼaklomtak Cristoe.

¿Mi xa naʼ kʼu yuʼun mu ta disiembreuk ayan li Jesuse?... Yuʼun li Vivliae ta xal ti kʼalal ayane, oy toʼox jchabiej chijetik ti te ch-echʼ yuʼunik  akʼobal ta osiltike (Lucas 2:8-12). Vaʼun chaʼa, mu toʼox xuʼ te oyik ta osiltik ta akʼobaltik li ta yuilal disiembree, yuʼun li ta u taje toj ep sik xchiʼuk ep chakʼ voʼ li ta jteklum taje.

¿Kʼu yuʼun mu ta 25 yuʼun disiembre ayan li Jesuse?

Ep krixchanoetike snaʼojik ti skʼakʼalil sVokʼel Ninyoe maʼuk skʼakʼalil chlokʼ ta jabil li Jesuse. Snaʼojik xtok ti ta skʼakʼalil taje tspasik xa onoʼox jun kʼin ti muʼyuk lek chil Dios li buchʼutik maʼuk yajtsʼaklom Cristoe. Pe, manchuk mi jech, ep buchʼutik tspasbeik skʼinal li sVokʼel Ninyoe. Jaʼ mas oy ta yoʼontonik ti oy kʼusi chchʼay-o yoʼontonike, maʼuk tsabeik smelolal li kʼusi tsnop Dios ta sventa li kʼin taje. Pe li voʼotike ta jkʼan ta jlekubtasbetik yoʼonton li Jeovae, ¿mi mu jechuk?...

Jaʼ yuʼun, kʼalal ta jpastik kʼinetike, skʼan ta jkʼeltik lek mi lek chil li Jeovae. Xuʼ ta jpastik kʼusuk ora ta jabil. Mu persauk ta jmalabetik jun skʼakʼalil ti tʼujbil xa onoʼoxe. Xuʼ kʼusi jlajestik ti lek meltsanbile xchiʼuk xuʼ jchʼay koʼontontik ta tajimol. ¿Mi cha kʼan cha pas?... Oyikʼal van xuʼ xa loʼilaj xchiʼuk atot ameʼ sventa cha skoltaoxuk ta xchapanel junuk kʼin. ¿Mi mu meleluk ti lek jech taje?... Pe kʼalaluk skʼan to xa pase, skʼan cha kʼel lek mi jaʼ jun kʼin ti lek chil li Diose.

Li kʼinetik ta jpastike, ¿kʼuxi xuʼ jnaʼtik ta melel mi lek chil li Diose?

Ta xichʼ akʼel ta ilel xtok ti tsots skʼoplal ti ta jpastik onoʼox li kʼusi lek chil Dios te ta Proverbios 12:2; Juan 8:29; Romanos 12:2, xchiʼuk 1 Juan 3:22.