Kʼelo li kʼusi yichʼoje

Batan ta saʼobil

 KAPITULO 10

Li Jesuse jaʼ oy mas sjuʼel, li pukujetike moʼoj

Li Jesuse jaʼ oy mas sjuʼel, li pukujetike moʼoj

¿MI XVUL ta ajol kʼu yuʼun kʼataj ta Diablo Satanás li jun anjel yuʼun Diose?... Yuʼun itʼixaj yoʼonton xchiʼuk la skʼan ti jaʼ akʼo yichʼ muyubtaele, jaʼ yuʼun la skontrain li Diose. ¿Mi la sta yajtsʼaklomtak li ta yantik anjeletik li Satanase?... Laj. Li Vivliae ta sbiiltas yaj-anjeltak Satanás, o pukujetik (Apocalipsis 12:9).

¿Mi xchʼunojik ti oy Dios li chopol anjeletik liʼe?... Li Vivliae ta xal ti ta xchʼunik ti oy li Diose (Santiago 2:19). Pe li avie ta xiʼik, yuʼun snaʼojik ti ta x-akʼbat stoj smulik ta skoj li kʼusitik chopol spasojike. ¿Kʼusitik jaʼ?...

Li Vivliae ta xalbe smelolal ti anjeletik taje laj yiktaik li yavilik ti akʼbilik ta vinajele, vaʼun yalik tal ta Balumil sventa chkuxiik kʼuchaʼal krixchanoetik. Jaʼ jech la spasik yuʼun tskʼan ta slutsʼik ta vayel li kʼupil sba antsetik liʼ ta Balumile (Génesis 6:1, 2; Judas 6). ¿Kʼusi anaʼoj ta sventa li lutsʼbaile?...

Jun vinik xchiʼuk jun antse  ta slutsʼ sbaik ti kʼalal ta xchiʼin sbaik ta vayele. Kʼalal jech ta xchiʼin sbaike xuʼ ta xakʼbe xkuxlejal jun neneʼ ti chlik chʼiuk ta yut xchʼut smeʼe. Li Diose ta skʼan ti jaʼuk noʼox akʼo xchiʼin sbaik ta vayel jech, li buchʼutik nupunemike. Jaʼ yuʼun, kʼalal ta x-ayan jun neneʼe, li totil xchiʼuk li meʼile xuʼ ta xchabiik. Pe, li anjeletike muʼyuk bu laj yichʼik pasel sventa tspasik jech.

¿Kʼusitik chopol la spasik li anjeletik liʼe?

Kʼalal la spas sbekʼtalik kʼuchaʼal krixchanoetik xchiʼuk la slutsʼik ta vayel antsetik li anjeletike, ayan xnichʼnabik ti kʼatajik ta mukʼta natil tsatsal krixchanoetike. Li viniketik taje toj simaronik xchiʼuk chilbajinik li krixchanoetike. Jaʼ yuʼun li Diose la stak talel jun nojelal ta voʼ sventa tslajes li mukʼta natil tsatsal krixchanoetike xchiʼuk li chopol krixchanoetike. Pe li Diose laj yalbe Noé ti akʼo spas jun arka, o jun mukʼta barko, sventa tskolta li jayvoʼ krixchanoetik ti tspasik li kʼusi leke. Li Mukʼta Jchanubtasvaneje laj yal ti toj tsots skʼoplal ti ta jvules ta joltik li kʼusi kʼot ta pasel li ta Nojelal ta voʼe (Génesis 6:3, 4, 13, 14; Lucas 17:26, 27).

¿Mi xa naʼ kʼusi la spasik li chopol anjeletik ti kʼalal tal li Nojelal ta voʼe?... Laj yiktaik ta stunesel li sbekʼtalik ti la spasike xchiʼuk isutik batel ta vinajel.  Pe mu xa xuʼ jaʼikuk yaj-anjeltak Dios, jaʼ yuʼun ikʼatajik ta yaj-anjeltak Satanás, ta pukujetik. ¿Kʼusi kʼot ta stojolalik li xnichʼnabike, li mukʼta natil tsatsal krixchanoetike? Jmoj chamik ta Nojelal ta voʼ xchiʼuk li buchʼutik muʼyuk la xchʼunbeik smantal li Diose.

¿Kʼu yuʼun mas to toj ep vokoliletik ta Balumil li avie?

Kʼalal echʼ li Nojelal ta voʼe, li Diose muʼyuk xa bu laj yakʼ akʼo spas sbekʼtalik kʼuchaʼal krixchanoetik li pukujetike. Pe, manchuk mi mu xkiltik li pukujetike, yakal to ta xakʼbeik yipal sventa akʼo spasik kʼusitik chopol li krixchanoetike. Li avie mas to toj ep vokoliletik chakʼik yuʼun jipbilik yalel tal liʼ ta Balumile.

¿Mi xa naʼ kʼu yuʼun mu xuʼ xkiltik li pukujetike?... Yuʼun jaʼ espirituetik. Pe akʼo mi jech, xuʼ jchʼuntik ta melel ti oyike. Li Vivliae ta xal ti Satanase yakal sloʼlaan li krixchanoetik ta spʼejel balumile xchiʼuk jaʼ ta xkoltaat yuʼun li spukujtake (Apocalipsis 12:9, 12).

¿Mi xuʼ van sloʼlautik ek li Satanás xchiʼuk li spukujtake?... Xuʼ, ta me xi sloʼlautik mi mu jchabi jbatike. Pe mu me xi jxiʼ. Li Mukʼta Jchanubtasvaneje xi laj yale: Li Diabloe mu kʼusi xuʼ xi spasbun, xi. Mi nopol oyutik ta stojolal li Diose, jaʼ ta spojutik ta stojolal li Diabloe xchiʼuk li spukujtake (Juan 14:30).

Tsots skʼoplal ti ta jnaʼtik kʼusitik jaʼ li kʼusitik chopol ti tskʼanik akʼo jpastik li pukujetike. Jech un chaʼa nopo avaʼi: ¿kʼusitik chopol la spasik li pukujetik ti kʼalal italik ta Balumile?... Kʼalal muʼyuk toʼox talem li Nojelal ta voʼe, la slutsʼ sbaik ta vayel xchiʼuk li antsetike, jaʼ ti kʼusi albilik ti mu stakʼ spasike. Li avie, li pukujetike chmuyubajik ti kʼalal muʼyuk bu chchʼunbeik smantal Dios li krixchanoetik ta sventa li lutsʼbaile. Jkʼeltik mi xvul to ta ajol: ¿buchʼutik noʼox ti xuʼ ta slutsʼ sbaike?... Oy arason, jaʼ noʼox li buchʼutik nupunemike.

Li ta jkʼakʼaliltike junantik keremetik xchiʼuk tsebetike ta slutsʼ sbaik, pe chopol maʼ taje. Li Vivliae ta xalbutik skʼoplal ta sventa li skʼunil sbekʼtal vinike (Levítico 15:1-3; Deuteronomio 23:1). Ta sventa li antsetike, ta xichʼ albel skʼunil sbekʼtal ants. Li Jeovae toj tsots skʼoplal  stu ti la spasbe li skʼunil sbekʼtal vinik xchiʼuk li skʼunil sbekʼtal antse, xchiʼuk jaʼ noʼox xuʼ ta skʼupinik li buchʼutik nupunemike. Kʼalal jaʼ ta spasik li krixchanoetik li kʼusi chal Dios ti mu stakʼ pasele, li pukujetike chmuyubajik, jech kʼuchaʼal liʼe, kʼalal jun uni kerem xchiʼuk jun uni tseb ta xixtolanbe sbaik li skʼunilike. ¿Mi mu jechuk ti mu jkʼantik xmuyubaj kuʼuntik li pukujetike?...

Oy to kʼusi yan ti lek chil li pukujetike, pe li Jeovae tspʼaj. ¿Mi xa naʼ kʼusi jaʼ?... Jaʼ li majbaile (Salmo 11:5). Li krixchano ti chmajvane toj simaron xchiʼuk ta xilbajin li yantike. Vuleso ta ajol, taje jaʼ ti kʼusitik tspasik toʼox li mukʼta natil tsatsal krixchanoetike, ti jaʼ toʼox xnichʼnab pukujetike.

Jech xtok li pukujetike kʼupil chilik ti ta sibtasik li krixchanoetike. Bateltike ta skʼatajes sbaik ta krixchanoetik ti chamemik xae, xchiʼuk ta xchanbeik li yeike. Jaʼ jech ta sloʼlaik epal krixchanoetik sventa chchʼunik ti kuxulik to la li animaetike xchiʼuk ti xuʼ la chchiʼinik ta loʼil li buchʼutik kuxulike. Jech oxal ep krixchanoetik ta xchʼunik ti oy li fantasmaetike.

 Jech un chaʼa, skʼan vikʼiluk jsatik sventa mu sloʼlautik li Satanás xchiʼuk li spukujtake. Li Vivliae xi ta xalbutike: Li Satanase tspas sba yaʼi ta jun lekil anjel, jaʼ jech tspasik ek li yajtuneltake, xi (2 Corintios 11:14, 15). Pe ta melel onoʼox, chopolik maʼ li pukujetike. Jkʼeltik kʼusitik xuʼ tstunesik sventa jechutik kʼuchaʼal li stukike.

¿Bu ep ta xchan li krixchanoetik ta sventa li majbaile, li lutsʼbail ta vayel ti chal Dios mu xtune, li espirituetike xchiʼuk li fantasmaetike?... ¿Mi mu meleluk ti jaʼ li ta kʼusitik chopol ch-echʼ bakʼintik ta televisione, ta videojuegoe, ta Internet xchiʼuk li ta chopol pelikulaetike? ¿Mi ta snopajesutik ta stojolal Dios li kʼusitik taje, o jaʼ ta snopajesutik ta stojolal li Diabloe? ¿Kʼusi chaval?...

¿Kʼusi xuʼ chkʼot ta pasel mi ta jkʼeltik eloval ti bu oy majbaile?

¿Buchʼutik tskʼanik ti akʼo xkaʼitik xchiʼuk jkʼeltik li kʼusitik chopole?... Jaʼ li Satanás xchiʼuk li spukujtake. Jaʼ yuʼun, ¿kʼusi skʼan ta jpastik?... Skʼan ta xkaptatik, ta xkaʼitik xchiʼuk ta jkʼeltik li kʼusitik jaʼ leke xchiʼuk ti jaʼ chi skoltautik sventa chi jtunutik ta stojolal li Jeovae. ¿Mi xtal ta ajol junantik?...

¿Kʼusi skʼan ta jpastik sventa ta jchabi jbatik ta stojolal li Satanás xchiʼuk li spukujtake?

Mi ta jpastik li kʼusi leke, muʼyuk srasonal ta jxiʼtatik li pukujetike. Li Jesuse jaʼ mas oy sjuʼel, li pukujetike ta xiʼik ta stojolal. Jun veltae, li pukujetike xi laj yalbeik li Jesuse: «¿Me yuʼun tal avulesuncutic?», xiik (Marcos 1:24). Li Jesuse ta slajes li Satanás xchiʼuk li spukujtake, ¿mi mu meleluk ti chi jmuyubajutik yuʼune?... Jech un chaʼa, mi nopol oyutik ta stojolal li Jesús xchiʼuk ta stojolal li sTot ta vinajele xuʼ jchʼuntik ta melel ti chi spojutik ta stojolal li pukujetike.

Jkʼeltik li kʼusitik skʼan ta jpastik sventa ta jpoj jbatik ta stojolal li Satanás xchiʼuk li spukujtak te ta 1 Pedro 5:8, 9 xchiʼuk Santiago 4:7, 8.