¿MI OY kʼusi yelkʼanojboxuk junuk velta?... ¿Kʼu yelan laj avaʼi aba?... Li buchʼu laj yelkʼanbot li kʼusi avuʼune jaʼ jun j-elekʼ, xchiʼuk muʼyuk buchʼu lek chil li j-elekʼetike. ¿Kʼuxi van tspas sba ta j-elekʼ li jun krixchanoe? ¿Mi j-elekʼ onoʼox ta x-ayan?...

Jech kʼuchaʼal laj xa jchantik ta kapitulo 23, jkotoltik jmulavil krixchanoutik chi j-ayanutik, jech un chaʼa, jkotoltik oy jmultik. Pe muʼyuk buchʼu j-elekʼ chvokʼ. Oyikʼal van likem tal ta jun lekil utsʼ-alalil li krixchanoe, ti jaʼ lekil krixchanoetik li stot smeʼ xchiʼuk li xchiʼiltak ta vokʼele. Pe mi tskʼan tajmek li takʼine xchiʼuk tskʼan tsman ep kʼusitik yuʼune xuʼ ta spasat ta jun j-elekʼ.

¿Buchʼu van chaval ti jaʼ li baʼyel j-elekʼe?... Veno, jnoptik jutuk. Li Mukʼta Jchanubtasvaneje laj yojtikin kʼalal te toʼox oy ta vinajele. Li j-elekʼ taje jaʼ toʼox jun anjel. Pe li Diose maʼuk jmulaviletik la spasanan li anjeletike, ¿kʼuxi la spas sba ta j-elekʼ un chaʼa?... Veno, jech kʼuchaʼal laj jchantik li ta kapitulo 8 yuʼun li livro liʼe, jaʼ la skʼan li kʼusi maʼuk yuʼune. ¿Mi xvul to ta ajol kʼusi jaʼ?...

Kʼalal la spas li baʼyel vinik xchiʼuk li baʼyel ants li Diose, li anjel taje la skʼan ti jaʼuk akʼo xichʼ muyubtaele. Mu staʼo ti jaʼ chichʼ muyubtaele, yuʼun li muyubtaele jaʼ noʼox yuʼun li Diose. Pe laj yelkʼan li stuke. Pas onoʼox yuʼun ti jaʼ akʼo xmuyubtaat yuʼun li Adán xchiʼuk li Evae, kʼalal jech la spase ikʼataj ta j-elekʼ. Jaʼ jech ipas ta Diablo Satanás.

¿Kʼusi ti chakʼ pasuk ta j-elekʼ li jun krixchanoe?... Jaʼ ti tskʼan tajek oyuk ta skʼob li kʼusi maʼuk yuʼune. Li skʼanel tajek taje toj tsots, yuʼun xuʼ  ta sujat ta spasel kʼusitik chopol li lekil krixchanoetike. Bakʼintike, li buchʼutik chkʼatajik ta j-elekʼetike muʼyuk bu tsutes yoʼontonik mi jaʼuk ta xchaʼpasik li kʼusi leke. Jun li ta epal krixchanoetik taje, jaʼ li yajtakbol toʼox Jesús ti jaʼ sbi Judas Iscariotee.

Li Judase snaʼoj ti chopol li elekʼe, yuʼun ta sbikʼtal onoʼox laj yichʼ chanubtasel ta sMantal li Diose. Snaʼoj ti jun kʼakʼal ikʼopoj tal ta vinajel li Diose xchiʼuk ti xi laj yalbe li steklumale: «Mu me xa elcʼajic», ti xie (Éxodo 20:15). Kʼalal ichʼi li Judase, laj yojtikin li Mukʼta Jchanubtasvaneje, vaʼun la spas sba ta yajtsʼaklom. Ta tsʼakale, li Jesuse la stʼuj sventa jaʼuk jun li ta xlajchaʼvoʼal yajtakboltake.

Li Jesús xchiʼuk li yajtakboltake jmoj chanavik xchiʼuk jmoj chveʼik. Li stakʼinike ta skʼejik ta jun kaxa. Li Jesuse laj yakʼbe xchabi li Judase. Ta melel onoʼox, li takʼine maʼuk yuʼun li Judase. Pe kʼalal echʼ skʼakʼalile, ¿mi xa naʼ kʼusi la spas?...

¿Kʼu yuʼun ch-elkʼaj toʼox li Judase?

Li Judase lik stsak li takʼin ti maʼuk yuʼun ti kʼejbil ta kaxae. Jaʼo ta stsak ti kʼalal muʼyuk bu ch-ilat yuʼun li yantike, xchiʼuk xtok laj yakʼbe yipal ta stabel smelolal kʼuyelan xuʼ tsta mas li takʼine. Lik snopilan skotol ora ta sventa li takʼine. Jkʼeltik kʼusi sujat ta spasel li xchopol nopbenal kʼalal jutuk xa skʼakʼalil skʼan smilik li Mukʼta Jchanubtasvaneje.

Li María ti jaʼ xchiʼil ta vokʼel Lázaro ti jaʼ yamigo Jesuse, la stsak muil poxil ti bu mas leke, vaʼun la smalbe ta yok li Jesuse. Pe muʼyuk bu lek laj yil li Judase. ¿Mi xa naʼ kʼu yuʼun?... Laj yal ti laj la yichʼ chonel jechuk li muil poxile, sventa la ta xichʼ akʼbel li stojol li buchʼutik abol sbaike. Pe ta melel, li kʼusi tskʼane jaʼ ti oyuk mas takʼin sventa chelkʼan li ta kaxae (Juan 12:1-6).

Li Jesuse laj yalbe li Judas ti akʼo mu xutsʼinta li Mariae, ti laj yakʼ ta ilel ti toj lek yoʼontone. Li Judase muʼyuk bu lek laj yaʼi ti jech laj yal li Jesuse, jech un chaʼa, ibat yoʼ bu oy li bankilal paleetike, li yajkontratak li Jesuse. Liʼike tskʼan tstsakik li Jesuse, pe ta akʼobaltik tskʼan  tstsakik sventa mu buchʼu x-ilatik.

Li Judase xi laj yalbe li paleetike: Mi chavakʼbikun takʼine, cha kalboxuk kʼuxi xuʼ xa tsakik li Jesuse. ¿Kʼu yepal cha kʼan chavakʼbikun?, xi.

Li paleetike xi la stakʼike: Cha kakʼbotkutik treinta ta sep sakil takʼin, xutik (Mateo 26:14-16).

Li Judase la xchʼambe li stakʼinike. Xkoʼolaj xchiʼuk yuʼun la xchon yaʼeluk li Mukʼta Jchanubtasvanej ta stojolal li viniketik taje. ¿Mi xa chʼun ti oy buchʼu tspas li kʼusi toj chopol taje?... Veno, taje jaʼ li kʼusitik chkʼot ta pasel kʼalal oy buchʼu tspas sba ta j-elekʼ xchiʼuk ti ta xelkʼan takʼine. Jaʼ mas skʼanoj li takʼine, jaʼ muʼyuk bu skʼanoj lek li krixchanoetike mi jaʼuk skʼanoj ek li Diose.

Oyikʼal van xi chavale: «Li voʼone mu bakʼin kʼusi mas ta jkʼan, yuʼun jaʼ noʼox li Jeova Diose», xuʼ van xa chi. Lek ti jaʼ jech cha nope. Li Judase oyikʼaluk jaʼ jech toʼox ta snop ek ti kʼalal itʼujat yuʼun Jesús sventa tspas ta yajtakbole. Oyikʼaluk jaʼ jech la snopik ek li yan krixchanoetik ti ipasik ta j-elekʼetike. Kalbetik skʼoplal junantik.

¿Kʼusitik chopol yakal snopik li Acán xchiʼuk li Davide?

Li june jaʼ toʼox jun yajtunel Dios, Acán sbi, voʼne xa tajek ikuxi ti  kʼalal mu toʼox x-ayan li Mukʼta Jchanubtasvaneje. Li Acane laj yil jlik kʼuʼil toj kʼupil sba, jpech kʼanal takʼin xchiʼuk jaysepuk sakil takʼin. Skotol li kʼusitik taje maʼuk yuʼun. Li Vivliae ta xal ti jaʼ yuʼun li Jeovae, yuʼun jaʼ la spojbe li yajkontratak li steklumal Diose. Pe li Acane la skʼan tajmek, jaʼ yuʼun laj yelkʼan (Josué 6:19; 7:11, 20-22).

Jkʼelbetik yan skʼelobil. Voʼne xa tajmeke, li Jeovae la stʼuj sventa ch-och ta ajvalil ta steklumal Israel li Davide. Jun kʼakʼale, li Davide lik skʼel jun ants ti toj kʼupil sbae, Betsabé sbi. Te tskʼelilan-o xchiʼuk la snop chikʼ batel ta sna sventa chchiʼin. Pe li antse jaʼ yajnil li Uriase. ¿Kʼusi la spas jechuk li Davide?...

Li Davide laj yikta ta snopel jechuk ta  sventa li Betsabee, pe muʼyuk bu la spas. Laj yikʼ batel ta sna xchiʼuk laj yakʼ akʼo smilik li Uriase. ¿Kʼu yuʼun la spas kʼusitik chopol li Davide?... Yuʼun pichʼ ta yoʼonton jun ants ti jaʼ yuʼun yan vinike (2 Samuel 11:2-27).

¿Kʼusi smelolal ti ipas ta jun j-elekʼ li Absalone?

Ta skoj ti yuʼun la sutes yoʼonton li Davide, akʼat to xkuxi yuʼun li Jeovae. Pe jaʼo te lik tal vokoliletik ta stojolal. Li Absalón ti jaʼ xnichʼone la skʼan la spojbe li yabtel ta ajvalilale. Kʼalal chbat kʼelatuk yuʼun krixchanoetik li Davide, li Absalone ta smey xchiʼuk ta stsʼutsʼ li krixchanoetike. Li Vivliae xi ta xale: «Jaʼ jech la sloʼlabe [«yelkʼanbe», NM] yoʼnton israeletic li Absalone». Ta slajeb ne la sjelbe snopben li krixchanoetike yuʼun la skʼanik ti jaʼ akʼo ochuk ta ajvalil li stuke, maʼuk li Davide (2 Samuel 15:1-12).

¿Mi oy kʼusi akʼanoj junuk velta ta skotol tajek avoʼonton, jech kʼuchaʼal li Acán, David xchiʼuk li Absalone?... Mi jaʼ yuʼun yan krixchano li kʼusi cha kʼane, mi cha tsak ti muʼyuk albilote yakal me xa elkʼaj. ¿Mi xvul to ta ajol kʼusi la skʼan li Satanás, li baʼyel j-elekʼe?... La skʼan ti jaʼ akʼo xmuyubtaat yuʼun li krixchanoetike, maʼuk li Diose. Jech un chaʼa, li Satanase yakal ta x-elkʼaj ti kʼalal laj yakʼ akʼo xchʼunbat smantal yuʼun li Adán xchiʼuk li Evae.

Kʼalal oy kʼusi yuʼun li jun krixchanoe, jaʼ chal buchʼu xuʼ tstunes. Jech kʼuchaʼal liʼe, mi cha bat ta tajimol ta sna yan olole, ¿mi lek van ti oy kʼusi cha tsak sventa chavichʼ batel ta anae?... Moʼoj, jaʼ noʼox xuʼ xavichʼ batel ti mi laj yalbot li stot smeʼe. Mi oy kʼusi chavichʼ batel ti muʼyuk albilote, yakal me xa elkʼaj.

¿Kʼusi ti xuʼ cha yakʼot ta preva sventa cha elkʼaje?... Jaʼ ti kʼalal cha kʼan tajek oyuk ta akʼob li kʼusi maʼuk avuʼune. Manchuk mi mu xa yil junuk krixchano ti chavichʼ batele, ¿buchʼu ti skʼelojote?... Jaʼ li Jeova Diose. Skʼan ta jvules ta joltik ti Diose tspʼaj li elekʼe. Jech un chaʼa, li kʼanel avuʼun ta stojolal Dios xchiʼuk ta stojolal li achiʼile ta spajtsanot sventa mu xa pas aba ta j-elekʼ.

Li Vivliae jamal ta xalbutik ti chopol li elekʼe. Avokoluk jkʼeltik Marcos 10:17-19; Romanos 13:9, xchiʼuk Efesios 4:28.