Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Jchanbetik li mukʼta jchanubtasvaneje

 KAPITULO 36

¿Buchʼutik chchaʼkuxiik? ¿Bu chnakiik?

¿Buchʼutik chchaʼkuxiik? ¿Bu chnakiik?

LI TA kapitulo 34 xchiʼuk 35 laj kalbetik sloʼilal xchaʼkuxesel jayvoʼuk krixchanoetik. ¿Jayvoʼik?... Voʼobik. ¿Jayvoʼ ololetik?... Oxvoʼ, li yane jaʼ toʼox jun jchʼiel kerem. ¿Kʼusi van chchanubtasutik xa naʼ li taje?...

Ta xchanubtasutik ti skʼanoj li ololetik xchiʼuk li jchʼiel kerem-tsebetik li Diose. Pe jech xtok ta xchaʼkuxes yantik epal krixchanoetik. ¿Mi jaʼ noʼox van li buchʼutik la spasik li kʼusitik leke?... Oyikʼaluk jech ta jnoptik. Pe, oy ep krixchanoetik ti muʼyuk bu laj yojtikinik li melel ta sventa li Jeova Diose xchiʼuk li xNichʼone. La spasik li kʼusitik chopole yuʼun jaʼ onoʼox li kʼusi chanubtasatik ta spasele. Li Jeovae, ¿mi ta van xchaʼkuxes ek xa naʼ li krixchanoetik taje?...

Li Vivliae xi ta xale: «Ta xchaʼcuxiic li bochʼotic lequique xchiʼuc li bochʼotic chopolique», xi (Hechos 24:15). ¿Kʼu yuʼun ta xichʼik chaʼkuxesel li buchʼutik muʼyuk lek echʼik o ti muʼyuk bu la spasik li kʼusi leke?... Yuʼun muʼyuk buchʼu ichanubtasatik ta sventa li Jeovae xchiʼuk li kʼusi tskʼan akʼo jpastike.

Li Diose, ¿kʼu yuʼun ta xchaʼkuxes junantik krixchanoetik ti muʼyuk bu la spasik li kʼusi leke?

 ¿Bakʼin van chkʼot ta pasel xa naʼ li chaʼkuxesele?... Nopo ta sventa liʼe: kʼalal cham li Lazaroe, li Jesuse xi laj yalbe ta melel li Martae: «Ta xchaʼcuxi li axiʼmele», xut. Li Martae xi la stakʼbee: «Jnaʼoj ti ta xchaʼcuxi ta slajebal cʼacʼal ti cʼalal yorail ta xchaʼcuxiic scotol li bochʼotic chamenique», xi (Juan 11:23, 24). ¿Kʼusi la skʼan laj yal li Marta ti kʼalal laj yal ti chlik ta «slajebal cʼacʼal» li Lazaroe?...

Li Paraiso ti albat yuʼun Jesús li vinik liʼe, ¿bu jotukal chkʼot ta pasel?

Li Martae yaʼioj xa li kʼusi yaloj xa onoʼox ta melel li Jesús ti xie: Ta xlokʼik tal skotolik li buchʼutik te oyik ta mukinaletike (Juan 5:28, 29). Li «slajebal cʼacʼale» jaʼ ti kʼalal ta sutesbatik xkuxlejalik skotol li buchʼutik te oyik ta snopbenal li Diose. Maʼuk skʼan chal ti jaʼ jun kʼakʼal ti yichʼoj 24 orae, moʼoj, jaʼ jmil jabil sjalil. Li Vivliae ta xal ti ta skʼakʼalil taje, li Diose ta xchapan skotol li jnaklejetik ta balumile, te kapalik ek li buchʼutik chaʼkuxiemik xaʼoxe (Hechos 17:31; 2 Pedro 3:8).

Nopo avaʼi kʼu to yelan alakʼ sba li skʼakʼalil taje. Li jmil jabil sjalile jaʼo ta xchaʼkuxiik epal miyon krixchanoetik ti chamemike. Li Jesuse Paraiso laj yakʼbe sbi ti bu chnakiik li buchʼutik chchaʼkuxiike. ¿Bu van chkʼot ta pasel li Paraisoe, xchiʼuk kʼu van yelan? Jkʼeltik.

Kʼalal te to van oxibuk ora skʼan xcham li Jesús kʼalal te jokʼol ta teʼe, la sloʼiltabe sventa li Paraiso jun vinik ti te jokʼol ta xokone. Liʼe jaʼ toʼox jun chopol vinik ti la spas ep smule, xchapanojbeik xa onoʼox skʼoplal ti tsmilike. Kʼalal la skʼel xchiʼuk laj yaʼi li kʼusi chalik ta stojolal li Jesuse, lik xchʼunbe, jech un chaʼa xi la skʼanbee: «Vulesun  ta ajol kʼalal mi la och ta ajvalilal avuʼune», xi. Li Jesuse xi la stakʼbee: «Ta melel cha kalbot li avie: Te me oyot xchiʼuk voʼon li ta Paraisoe», xi (Lucas 23:42, 43, NM).

Kʼalal ta jkʼeltik ta sventa li Paraisoe, ¿kʼusi skʼan ta jnoptik?

¿Kʼusi la skʼan laj yal li Jesuse? ¿Bu oy li Paraisoe?... Nopo ta sventa liʼe: ¿bu toʼox oy li Paraiso ta baʼyele?... Vuleso ta ajol ti Diose laj yakʼ ta jun paraiso liʼ ta Balumil li baʼyel vinik Adán xchiʼuk li yajnile. Nichimaltik Edén toʼox sbi. Li ta nichimaltik taje oy toʼox chonbolometik, pe mu toʼox snaʼ x-utsʼintavanik. Jech xtok oy toʼox teʼetik ti pim tajmek sat ti lek muike, xchiʼuk oy toʼox jun mukʼta ukʼum. Jaʼ toʼox jun alakʼ sba osil ti bu xuʼ chnaki li krixchanoe (Génesis 2:8-10).

Jech un chaʼa, kʼalal ta jkʼelbetik sloʼilal li chopol vinik ti chnaki ta Paraisoe, skʼan ta jnoptik ti jaʼ li Balumil liʼe, jaʼ noʼox ti kʼatajesbil xa ta alakʼ sba nichimaltik ti bu xuʼ chi jnakie. Li Jesuse, ¿mi liʼ van chchiʼin ta naklej ta Paraiso balumil li vinik ti chopol toʼox kʼusi tspase?... Moʼoj. ¿Mi xa naʼ kʼu yuʼun moʼoj?...

Yuʼun li Jesuse te to ta vinajel tsventain tal li Paraiso balumile. Li smelolal ti te oy xchiʼuk li vinik li Jesuse, jaʼ ti yuʼun ta xchaʼkuxes xchiʼuk tskʼel ti oyuk kʼusitik chtun yuʼune. Pe ¿kʼu yuʼun van ta xakʼ akʼo nakiuk ta Paraiso jun vinik ti chopol kʼusi la spase?... Jkʼeltik mi xuʼ jtakʼtik.

Kʼalal muʼyuk toʼox loʼilajem xchiʼuk Jesús li vinike, ¿mi xojtikin xa onoʼox li kʼusi snopoj tspas li Diose?... Moʼoj, mu toʼox xojtikin. La spas li kʼusitik chopole, yuʼun mu toʼox snaʼ li kʼusi melel ta sventa  li Diose. Te ta Paraisoe ta xichʼ chanubtasel ta sventa li kʼusi snopoj tspas Dios ta stojolal li krixchanoetike. Vaʼun xuʼ ta xakʼ ta ilel mi ta melel skʼanoj li Dios kʼalal tspas li kʼusi tskʼan li Diose.

¿Mi te chnakiik ta Paraiso balumil skotol li buchʼutik chchaʼkuxiike?... Moʼoj. ¿Mi xa naʼ kʼu yuʼun moʼoj?... Yuʼun li jlome chchaʼkuxiik sventa chbat kuxiikuk xchiʼuk Jesús ta vinajel. Te jmoj ch-ajvalilajik, tsventainik tal li Balumil ti kʼatajem xaʼox ta jun paraisoe. Jkʼeltik kʼuxi ta jnaʼtik.

Kʼalal jun xa noʼox akʼobal skʼan xcham li Jesuse, xi laj yalbe li yajtakboltake: Ta sna jtot te ta vinajele toj ep to xokol, chbat jchapanboxuk avavilik, xi. Vaʼun xi to laj yale: Chi sut tal yan velta xchiʼuk cha jchʼamoxuk li ta nae, sventa te oyoxuk ek ti bu oyune, xi (Juan 14:2, 3).

¿Bu bat li Jesús kʼalal chaʼkuxie?... Sut batel ta vinajel ti bu oy li sTote (Juan 17:4, 5). Jech oxal li Jesuse laj yalbe ta melel li yajtakboltak xchiʼuk yantik yajtsʼaklomtak ti ta xchaʼkuxesan sventa chbat  xchiʼinik li ta vinajele. ¿Kʼusi van tspasik tee?... Li Vivliae ta xal ti jtsʼaklometik ti «tstaic li sba velta chaʼcuxesele» ta xkuxiik ta vinajel, «coʼol tspasic mantal jmil (1,000) jabil xchiʼuquic» Cristo ta sba Balumil (Apocalipsis 5:10; 20:6; 2 Timoteo 2:12).

¿Jayvoʼik ti «tstaic li sba velta chaʼcuxesele», ti ch-ajvalilajik xchiʼuk li Jesuse?... Li Mukʼta Jchanubtasvaneje xi laj yalbe li yajtsʼaklomtake: «Acʼo me muʼyuc epoxuc, cunin chijtac, pero mu me xaxiʼic. Yuʼun li Jtotik Diose slequil yoʼnton laj yacʼboxuc li ventainel yuʼune», xi (Lucas 12:32). Li juteb chijetik taje lek tsʼakal chapbil kʼu yepal, jaʼ krixchanoetik liʼ ta Balumil ti chchaʼkuxiik sventa ch-ajvalilajik xchiʼuk Jesús li ta Ajvalilal yuʼun ta vinajele. Li Vivliae ta xakʼbutik ta ilel ti jaʼ noʼox «chanib xvaxacvinic ta mil (144,000)» ta voʼike (Apocalipsis 14:1, 3).

¿Bu chnakiik li buchʼutik chchaʼkuxiike, xchiʼuk kʼusi tspasik?

¿Jayvoʼik van li krixchanoetik ti chkuxiik ta Paraiso liʼ ta Balumile?... Li Vivliae muʼyuk bu ta xal. Pe kʼalal liʼ toʼox oyik ta nichimaltik Edén ta Balumil li Adán xchiʼuk Evae, albatik yuʼun Dios ti akʼo oyuk yalab xnichʼnabik xchiʼuk ti akʼo snojesik li Balumile. Manchuk mi muʼyuk bu kʼot ta pasel yuʼunik, li Diose jaʼ tskʼel ti akʼo kʼotuk ta pasel li kʼusi snopoje, ti akʼo nojuk ta lekil krixchanoetik li Balumile (Génesis 1:28; Isaías 45:18; 55:11).

Nopo kʼu to yelan alakʼ sba li kuxlejal ta Paraisoe. Jaʼ me jech xkoʼolaj kʼuchaʼal jun alakʼ sba nichimaltik spʼejel li Balumile. Oy teʼetik xchiʼuk ep ta chop nichimetik, ch-epaj li mutetike xchiʼuk li yantik chonbolometike. Muʼyuk me buchʼu kʼusi kʼux chaʼi ta skoj chamel xchiʼuk muʼyuk xa buchʼu ta xcham. Chamigoin sbaik skotolik. Mi ta jkʼan chi jkuxiutik ta sbatel osil li ta Paraisoe, li avie jaʼ yorail ti ta jchapan jbatike.

Ta jkʼeltik to yan tekstoetik ta sventa li kʼusi snopoj tspas Dios ta sventa li Balumil te ta Proverbios 2:21, 22; Eclesiastés 1:4; Isaías 2:4; 11:6-9; 35:5, 6, xchiʼuk 65:21-24.