Li Jeovae ep kʼusitik lek laj yakʼbe li Adán xchiʼuk Evae (Génesis 1:28)

Li Jeovae jaʼ la spas li baʼyel ants ti Eva sbie, vaʼun jaʼ ikʼot ta yajnil li Adane (Génesis 2:21, 22).

Kʼalal ipasatik yuʼun Jeovae, tukʼ ipasbat li snopbenik xchiʼuk li sbekʼtalike, chʼabal xchopolalik.

Te inakiik ta nichimaltik Edén, jun kʼupil sba balumil ti bu oy jun ukʼume, teʼetik ti chakʼ sate xchiʼuk chonbolometik.

Ikʼoponatik yuʼun li Jeovae xchiʼuk ichanubtasatik. Ti lajuk xchikintaike, ikuxiik sbatel osil ta Paraiso liʼ ta balumil ti jechuke.

 Li Diose laj yal ti mu stakʼ lobel sat li jpets teʼe (Génesis 2:16, 17)

Pe li jun anjele la stoy sba ta stojolal Dios. Li chopol anjel taje jaʼ li Diablo Satanase.

Li Jeovae laj yakʼbe yil jpets teʼ li Adán xchiʼuk Evae, li teʼ taje chakʼ sat te ta nichimaltik xchiʼuk laj yalbe ti mu xuʼ slobeik sate, yuʼun mi la sloʼike chchamik.

Li Satanase mu skʼan ti akʼo xchʼunbeik smantal Jeova li Adán xchiʼuk Evae. Jech oxal, la stunes jkot kiletel chon sventa chalbe Eva ti muʼyuk chcham xchiʼuk ti chkʼot kʼuchaʼal Dios mi la slobe sat li teʼ taje. Pe loʼlael maʼ taje (Génesis 3:1-5).