Kʼelo li kʼusi yichʼoje

Batan ta saʼobil

 APENDISE

¿Mi ta disiembre vokʼ li Jesuse?

¿Mi ta disiembre vokʼ li Jesuse?

LI Vivliae muʼyuk chalbutik kʼusi ora lek vokʼ li Jesuse. Pe oy lek srasonal ti maʼuk ta disiembree.

¿Kʼu yelan li yuilal disiembre te ta Belen yoʼ bu vokʼ Jesuse? Li ta skalendario judaetike oy jun u ti kislev sbie, jaʼ jvokʼ noviembre xchiʼuk jvokʼ disiembree ti toj sik xchiʼuk ti chakʼ tajek voʼe. Te une chtal yan u ti tebet sbie, ti jaʼ jvokʼ disiembre xchiʼuk jvokʼ enero ti mas sik ta sjunul jabile xchiʼuk ti chyal taiv li ta toyolaltike. Jkʼeltik kʼusi chal Vivlia ti kʼu yelan li osil te xbate.

Jun jtsʼibajom yuʼun Vivlia ti Esdras sbie chakʼ ta ilel ti toj sik xchiʼuk ti chakʼ tajek voʼ li ta yuilal kisleve. Chal ti la stsob sbaik epal krixchanoetik ta Jerusalen «ta jtob (20) cʼacʼal yochel  li sbalunebal ue [kislev]» ti «chniquic [...] ta scoj ti tsots chacʼ voʼe». Jech xtok, xi la laj yalik kʼalal te tsobolike: «¿Cʼusi ta jpastic, yuʼun mu xchʼabi li voʼe? Mu xuʼ chicomcutic ta xoraltic» (Esdras 10:9, 13; Jeremías 36:22). Jaʼ yuʼun xuʼ jnoptik ti kʼalal poʼot xa li yuilal disiembree, tstsob xchijik sventa mu teuk x-echʼ yuʼunik akʼobal ta osiltik.

Pe li Vivliae chal ti yakal la chchabi xchijik ta osiltik ta akʼobaltik kʼalal vokʼ li Jesuse. Li Lukas ti jaʼ jun jtsʼibajom yuʼun li Vivliae chal ti «te nakalik ta osiltik jchabichijetik ti chchabi xchijik ta akʼobaltike», taje te xkom ta stsʼel Belen (Lukas 2:8-12). Jech kʼuchaʼal chkakʼtik ventae te chchabi xchijik ta osiltik ta akʼobaltik li jchabichijetike. Mi toj sik xchiʼuk chakʼ tajek voʼ ta yuilal disiembre li ta Belene, ¿mi te van ch-echʼ yuʼunik akʼobal ta osiltik li jchabichijetike? Muʼyuk. Jaʼ yuʼun, ta skoj li kʼusi laj xa kaltike chakʼ ta ilel ti maʼuk ta disiembre vokʼ li Jesuse. *

Li Skʼop Diose chalbutik kʼusi ora lek cham li Jesuse, pe muʼyuk mas chal ti kʼusi ora vokʼe. Taje jaʼ tsvules ta joltik ti xi laj yal li ajvalil Salomone: «Me lec jcʼoplaltique, jaʼ xjelov slequil jech chac cʼu chaʼal lequil perfume. Me ta xijchamutique, jaʼ lec; jaʼ vocol li bochʼo jaʼ to chvoqʼuique» (Eclesiastés 7:1). Jech oxal, li Vivliae jaʼ mas chalbe skʼoplal li yabtel xchiʼuk li slajel Jesuse, jaʼ jutuk tajek chalbe skʼoplal ti bakʼin vokʼe.

Jaʼo te oy jchabichijetik ti yakal chchabi xchijik ta osiltik ta akʼobaltik kʼalal vokʼ li Jesuse

^ par. 1 Mi chakʼanbe mas yaʼyejale, kʼelo ta pajina 111 kʼalal ta 114 ta livro Razonamiento a partir de las Escrituras ti spasoj stestigotak Jeovae.