Kʼelo li kʼusi yichʼoje

Batan ta saʼobil

 APENDISE

¿Kʼusi jaʼ li Skʼakʼalil Chapanele?

¿Kʼusi jaʼ li Skʼakʼalil Chapanele?

¿KʼU VAN yelan xanaʼ li Skʼakʼalil Chapanele? Ep buchʼutik xchʼunojik ti ta jujuntal la ch-echʼ yichʼik chapanel yuʼun Dios li epal miyon krixchanoetike. Tsnopik xtok ti chbat la yilik lekilal ta vinajel li jlome, li yantike ta la x-akʼbat yil svokolik ta kʼatinbak sbatel osil. Pe li Vivliae toj jelel kʼu yelan chalbe smelolal li Skʼakʼalil Chapanele, maʼuk jun skʼakʼalil ti chakʼ xiʼele, jaʼ skʼakʼalil spatobil oʼontonal xchiʼuk ti chchaʼmeltsaj skotol li kʼusitik sokeme.

Li ta Apokalipsis 20:11 xchiʼuk 12, xi chalbe smelolal Skʼakʼalil Chapanel li jtakbol Juane: «Laj kil jun mukʼta sakil chotlebal sventa ajvalilal xchiʼuk laj kil li buchʼu te chotole. Vaʼun li balumil xchiʼuk vinajele jatavik lokʼel ta stojolal xchiʼuk muʼyuk xa la sta yavilik. Laj kil ta bikʼit ta mukʼ li buchʼutik chamemik ti te vaʼajtik ta yeloval li chotlebal sventa ajvalilale xchiʼuk lik jamuk balbalvunetik. Pe jam yan balbalvun; jaʼ li sbalbalvunal kuxlejale. Vaʼun li buchʼutik chamemike laj yichʼik chapanel jech kʼuchaʼal li kʼusi te tsʼibabil ta balbalvunetike, jaʼ ti kʼu yelan la spasike».

Li Jeova Diose jaʼ Mukʼta Jchapanvanej yuʼun li krixchanoetike. Pe yan-o buchʼu yakʼojbe li abtelal ti chchapanvane. Laj yal  jtakbol Pablo ti oy kʼusi tspas li Diose, xi laj yal ta Echos 17:31: «Xchʼakojbe xa jun skʼakʼalil sventa lek tukʼ chchapan skotol li krixchanoetik ta spʼejel balumile, taje svaʼanoj jun vinik». Li Jchapanvanej taje jaʼ li Jesukristo ti chaʼkuxiem xae (Juan 5:22). Pe ¿bakʼin chlik li Skʼakʼalil Chapanele xchiʼuk kʼu sjalil chjalij?

Li slivroal Apokalipsise chal ti jaʼo chlik kʼalal echʼem xaʼox li Armajedone, ti jaʼ tslajesbe skʼoplal li sbalumil Satanase (Apokalipsis 16:14, 16; 19:19–20:3). * Kʼalal echʼem xaʼox li Armajedone, chichʼ chukel jmil jabil ta xab li Satanas xchiʼuk spukujtake. Kʼalal jaʼo li jmil jabile, li 144 mil ti koʼol kʼusi chuʼuninik xchiʼuk li Kristoe chchapanik li krixchanoetike xchiʼuk «[tspasik] mantal jmil jabil xchiʼuk li Kristoe» (Apokalipsis 14:1-3; 20:1-4; Romanos 8:17). Jech kʼuchaʼal chkiltike, li Skʼakʼalil Chapanele maʼuk jun kʼakʼal ti anil chjelav ti jaʼ noʼox 24 ora chjalije, jaʼ skʼoplal jmil jabil.

Kʼalal jaʼo yakal li jmil jabile, li Jesukristoe persa «chchapan li buchʼutik kuxul xchiʼuk li buchʼutik chameme» (2 Timoteo 4:1). Kʼalal «buchʼutik kuxul» xie, jaʼ chalbe skʼoplal li «epal krixchanoetik» ti kuxul chkomik ta Armajedone (Apokalipsis 7:9-17). Li jtakbol Juane laj yil xtok li «buchʼutik chamemik ti te vaʼajtik ta yeloval li chotlebal sventa ajvalilale» sventa xichʼik chapanel. Jech kʼuchaʼal laj yal li Jesuse, «li buchʼutik oy ta smukinalike chaʼibeik yechʼomal ye [Kristo] vaʼun chlokʼik tal» (Juan 5:28, 29; Echos 24:15). Pe ¿kʼusi chichʼ tsakel ta venta kʼalal chichʼik chapanel skotol li krixchanoetike?

Kʼalal oy kʼusitik akʼbat yil li jtakbol Juane, «lik jamuk balbalvunetik» xchiʼuk «li buchʼutik chamemike laj yichʼik chapanel jech kʼuchaʼal li kʼusi te tsʼibabil ta balbalvunetike» (Apokalipsis 20:12). ¿Mi te tsʼibabil li kʼusitik spasojik ta baʼyel li krixchanoetike? Muʼyuk. Kʼalal chichʼik chapanele, muʼyuk chichʼ tsakel ta venta li kʼusitik la spasik kʼalal muʼyuk toʼox bu chamemike. ¿Kʼuxi jnaʼojtik? Yuʼun li Vivliae chal ti «tupʼbil xa smul li buchʼu chamem xae» (Romanos 6:7). Xuʼ xkaltik ti chchʼay yilik li buchʼutik chchaʼkuxiike. Jech oxal, li vunetik taje xuʼ xkaltik ti jaʼ li achʼ smantaltak Diose. Sventa xkuxiik ta sbatel osile,  li buchʼutik chchaʼkuxiik xchiʼuk li buchʼutik kuxul chkomik ta Armajedone persa skʼan xchʼunbeik li smantaltak Diose. Li ta mantaletike te me oy ek li mantaletik chakʼ Jeova kʼalal jaʼo yakal li jmil jabile. Jech, chichʼik chapanel ta jujuntal ta sventa li kʼusi tspasik kʼalal jaʼo yakal li Skʼakʼalil Chapanele.

Li ta Skʼakʼalil Chapanele epal miyon krixchano jaʼ to chchanik ta sba velta li kʼusi tskʼan Diose xchiʼuk ti xuʼ xakʼ ta xkuxlejalike. Sventa xchanike, skʼan xichʼ chapanel kʼuxi xuʼ xichʼik chanubtasel. Jech, «cʼalal chchapan sbejel li banamile, jaʼ to te chchanic cʼusi tucʼ ta pasel li cristianoetique» (Isaías 26:9). Pe mu me skotoluk krixchano tspasik li kʼusi tskʼan Diose. Xi chal Isaías 26:10: «Acʼo me toj ep yutsil avoʼnton ta stojol li bochʼotic chopolique, pero mu scʼan spasic o li cʼusi tuqʼue. Puru chopol cʼusi tspasic te ta yosilal li ateclumale; muʼyuc scʼoplal ta yoʼntonic li amucʼul atsatsale». Li chopol krixchanoetike chichʼik lajesel sbatel osil kʼalal jaʼo yakal li Skʼakʼalil Chapanele (Isaías 65:20).

Mi laj li Skʼakʼalil Chapanele, li buchʼutik kuxulik toe xuʼ xa me xkuxiik sbatel osil, yuʼun chʼabal xa smulik (Apokalipsis 20:5). Kʼalal jaʼo yakal li Skʼakʼalil Chapanele, li krixchanoetike chtukʼibik me jech kʼuchaʼal onoʼox ta slikebe (1 Korintios 15:24-28). Vaʼun chtal li slajebal prevae, yuʼun chichʼ koltael li Satanase xchiʼuk ch-albat ti xuʼ sloʼla ta slajeb xa velta li krixchanoetike (Apokalipsis 20:3, 7-10). Li buchʼutik tskontrainik li Diabloe chilik kʼu yelan chkʼot ta pasel li kʼusi xi chal Vivliae: «Ti buchʼu oy slequil ti cʼusi ta spasique, ta xrextoinic ti banomile, sbatel osil ta xnaquiic tey» (Salmo 37:29Ch). Ta melel, li Skʼakʼalil Chapanele jaʼ me jun bendision chilik skotol li tukʼil krixchanoetike.

^ par. 1 Te chatabe mas yaʼyejal Armajedon li ta livro Perspicacia para comprender las Escrituras, volumen 1 pajina 680, 681, 1086, 1087 xchiʼuk ta kapitulo 20 li ta livro Kichʼtik ta mukʼ li jun noʼox melel Diose, ti spasoj stestigotak Jeovae.