Kʼelo li kʼusi yichʼoje

Batan ta saʼobil

 APENDISE

¿Buchʼu jaʼ li bankilal anjel Miguele?

¿Buchʼu jaʼ li bankilal anjel Miguele?

LI ANJEL ti mu xvinaj ta kʼelel ti Miguel sbie muʼyuk ep ta velta ch-albat skʼoplal li ta Vivliae. Pe kʼalal chichʼ albel skʼoplale, oy onoʼox kʼusi yakal tspas. Li ta slivroal Daniele yakal tspas kʼop xchiʼuk chopol anjeletik; li ta skarta Judase yakal tsvulilan sbaik xchiʼuk li Diabloe; li ta slivroal Apokalipsise yakal tspas kʼop xchiʼuk Satanas xchiʼuk li spukujtake. Jech, tspakbe onoʼox skʼoplal li ajvalilal yuʼun Jeovae xchiʼuk jaʼ tstsak ta kʼop li yajkontratak Diose. Kʼalal jech tspase, chakʼ ta ilel ti jech tspas kʼuchaʼal li smelolal sbi ti xie: «¿Buchʼu Jech Kʼuchaʼal li Diose?». Pe ¿buchʼu jaʼ li Miguele?

Baʼyel jvules ta joltik ti oy chib-oxib sbiik li junantik krixchanoe. Jech kʼuchaʼal liʼe, li Jacob ti jolil echʼ ta jun utsʼ alalile laj yichʼ ojtikinel kʼuchaʼal Israel xtok, li jtakbol Pedro eke laj yichʼ ojtikinel kʼuchaʼal Simon (Génesis 49:1, 2; Mateo 10:2). Jaʼ noʼox jech ek, li Vivliae oy butik chakʼ ta ilel ti Miguele jaʼ yan sbi Jesukristo kʼalal muʼyuk toʼox bu talem ta Balumile xchiʼuk kʼalal sut batel ta vinajele. Jkʼeltik kʼusi chal Vivlia ti kʼu yuʼun jech chkaltike.

 Bankilal anjel. Li Skʼop Diose chakʼ ta ilel ti jaʼ «bankilal anjel» li Miguele (Judas 9). Laj kiltik ti chichʼ biiltasel kʼuchaʼal bankilal anjel li Miguele, ti jaʼ chakʼ ta aʼiel ti kʼajomal noʼox oy jun anjel kʼuchaʼal taje. Jech, kʼalal chal Vivlia li jpʼel kʼop «bankilal anjel» xie, jun noʼox chalbe skʼoplal. Jech xtok, li Jesuse tspas onoʼox li yabtel ta bankilal anjele. Jaʼ jech chal ta 1 Tesalonisenses 4:16 ti bu chakʼ ta ilel kʼusi tspas kʼalal chaʼkuxiem xaʼox li Jesukristoe: «Chyal talel ta vinajel li Kajvaltike, tsots chtakvan ta ikʼel kʼuchaʼal yechʼomal ye bankilal anjel». Taje chal ti tsots ch-avan kʼuchaʼal bankilal anjel li Jesuse. Jech oxal, li tekstoe chakʼ ta aʼiel ti jaʼ Jesus li bankilal anjel Miguele.

Bankilal soltaro. Li Vivliae chal ti «la spasik kʼop xchiʼuk dragon li Miguel xchiʼuk li yaj-anjeltake» (Apokalipsis 12:7). Jamal xvinaj ti jaʼ Bankilal soltaro li Miguele, yuʼun jaʼ Bankilal yuʼun skotol li tukʼil anjeletik ti soltaroetik eke. Li ta slivroal Apokalipsise chakʼ ta ilel ti jaʼ Bankilal soltaro li Jesuse, jaʼ Bankilal yuʼunik li tukʼil anjeletik ti jaʼik kʼuchaʼal soltaroetik eke (Apokalipsis 19:14-16). Li jtakbol Pablo eke chalbe lek skʼoplal «li Kajvaltik Jesus xchiʼuk li yaj-anjeltak ti oy sjuʼelike» (2 Tesalonisenses 1:7). Jech, li Vivliae chalbe skʼoplal li Miguel xchiʼuk yaj-anjeltake, jech xtok chalbe skʼoplal li Jesus xchiʼuk yaj-anjeltake (Mateo 13:41; 16:27; 24:31; 1 Pedro 3:22). Li Skʼop Diose muʼyuk bu chal mi oy chaʼvokʼ tukʼil anjeletik ti jaʼ soltaroetike, ti jvokʼ beiltasbil yuʼun Miguel xchiʼuk ti jvokʼ beiltasbil yuʼun Jesuse. Jech oxal, oy srasonal ti jnoptik ti jaʼ onoʼox Jesukristo li Miguele ti yakal tspas yabtel ta vinajele. *

^ par. 2 Te chatabe mas sprevailtak ti jaʼ onoʼox skʼoplal Xnichʼon Dios li Miguele, te ta volumen 2, pajina 386, 387 ta livro Perspicacia para comprender las Escrituras ti spasoj stestigotak Jeovae.