Kʼelo li kʼusi yichʼoje

Batan ta saʼobil

 XCHANOBIL 2

Tskʼan akʼo xmuyubaj yuʼun Jeova li Rebekae

Tskʼan akʼo xmuyubaj yuʼun Jeova li Rebekae

Li Rebekae jaʼ jun ants ti skʼanoj li Jeovae. Jaʼ sbi Isaak li smalale. Skʼanoj Jeova ek. ¿Kʼuxi laj yojtikin Isaak li Rebekae? ¿Kʼuxi laj yakʼ ta ilel ti tskʼan akʼo xmuyubaj li Jeovae? Kalbetik baʼyel skʼoplal li smalal Rebekae, li Isaake.

Li stot smeʼ Isaake jaʼ Abraan xchiʼuk Sara. Li Abraane tskʼan ti jaʼ akʼo xikʼ jun tseb ti chichʼ ta mukʼ Jeova li Isaake. Pe te nakalik ta yosilal Kanaan, muʼyuk chichʼik ta mukʼ Jeova li krixchanoetik tee. Jaʼ yuʼun la stak batel smoso ta yosilal Aran, ti jaʼ van li Eliezere. ¿Kʼu yuʼun? Jaʼ sventa xbat sabe tal yajnil li Isaake, yuʼun te nakal yutsʼ yalal li Abraane.

Ta sjunul yoʼonton tsots abtej Rebeka sventa xuchʼ voʼ li kameyoetike

Bat ta Aran li Eliezer xchiʼuk li yan smosotak Abraane. Toj nom tajek ti bu batike. Yikʼoj batel lajunkot skameyoik sventa xkuch batel sveʼelik xchiʼuk matanaletik. Pe ¿kʼuxi tsnaʼ Eliezer buchʼu tsebal tstʼuj sventa xnupun xchiʼuk li Isaake? Te kʼot ta jun poso ta Aran li Eliezer xchiʼuk li yan mosoiletike, yuʼun snaʼoj ti te chkʼot slup yaʼal li krixchanoetike. Xi laj yalbe li Jeovae: ‹Mi laj kalbe jun tseb ti akʼo yakʼbun kuchʼ jutebuk voʼe, vaʼun mi laj yakʼbune xchiʼuk mi laj yakʼbe yuchʼ voʼ li jkameyotak eke, jaʼ jech chkakʼ venta ti jaʼ li tseb atʼujoje›.

Vaʼun te kʼot ta poso li Rebekae. Li Vivliae chal ti toj kʼupil sbae. Li Eliezere  la skʼanbe voʼ li tsebe, vaʼun xi la stakʼe: ‹Lek oy, uchʼan xchiʼuk chkakʼbe yuchʼ voʼ li akameyotak eke›. ¡Toj labal xa noʼox sba! Yuʼun kʼalal chtakij tajek li kameyoetike toj ep voʼ chuchʼik, jaʼ yuʼun ep ta velta la slup voʼ li Rebekae. ¿Kʼu yelan ch-abtej chavil li Rebekae?... Toj labal sba chil Eliezer ti kʼu yelan tslup voʼ li Rebekae: ¡Takʼbat li s-orasione!

Li Eliezere ep kʼupil sba matanaletik laj yakʼbe li Rebekae. Vaʼun laj yikʼ batel ta sna Rebeka li Eliezer xchiʼuk li xchiʼiltake. Kʼalal kʼotike laj yal ti kʼu yuʼun laj yichʼ takel tal yuʼun Abraan li Eliezere. Laj yal kʼuxi takʼbat s-orasion yuʼun Jeova xtok. Xmuyubajik tajek kʼalal laj yaʼiik li yutsʼ yalal Rebekae. Xi laj yalike: ‹Xuʼ xnupun xchiʼuk li Isaake›.

Li Rebekae bat ta Kanaan xchiʼuk Eliezer sventa xnupun xchiʼuk li Isaake

Pe ¿mi tskʼan van chnupun xchiʼuk Isaak xanaʼ li Rebekae?... Snaʼoj ti jaʼ takvan tal li Jeovae. Jaʼ yuʼun kʼalal jakʼbat yuʼun yutsʼ yalal li Rebeka mi tskʼan chbat ta Kanaan sventa chnupun xchiʼuk li Isaake, xi la stakʼe: ‹Xuʼ, chibat›. Ta ora noʼox bat xchiʼuk li Eliezere. Vaʼun kʼalal kʼot ta Canaane nupun xchiʼuk li Isaake.

Laj yakʼbe bendision Rebeka li Jeovae, yuʼun jaʼ la spas li kʼusi tskʼan Jeovae. Maʼuk noʼox taje, ¡yuʼun jaʼ te vul ta lokʼel ta yutsʼ yalal Rebeka li Jesuse! Mi jaʼ jechot kʼuchaʼal Rebekae xchiʼuk mi xmuyubaj avuʼun li Jeovae, ta me xakʼbot bendision ek.

KʼELO TA AVIVLIA:

  • Génesis 12:4, 5; 24:1-58, 67