¿Mi laj xa avil li viniketik te oy ta lokʼole?... Leʼe jaʼ Mateo, Markos, Lukas, Juan, Pedro, Santiago, Judas xchiʼuk Pablo. Jmoj kuxiik xchiʼuk li Jesuse, jaʼ yuʼun laj yalbeik skʼoplal. Kalbetik mas skʼoplalik.

¿Buchʼutik li viniketik liʼe?

Oxvoʼ jtakboletik jmoj la xcholik mantal xchiʼuk li Jesuse. ¿Mi xanaʼ buchʼutik taje?... Jaʼ Mateo, Juan xchiʼuk Pedro. Laj yojtikinik lek Jesus li jtakbol Mateo xchiʼuk Juane, jaʼ yuʼun la stsʼiba julik slivroik ta sventa li xkuxlejal  Jesuse. Li jtakbol Juane la stsʼiba jlik livro ti jaʼ sbi Apokalipsise xchiʼuk la stsʼiba oxlik karta ti jaʼ sbi Baʼyel skarta Juan, Xchibal skarta Juan xchiʼuk Yoxibal skarta Juan. Li jtakbol Pedro eke la stsʼiba chaʼlik karta ti te oy ta Vivliae. Jaʼ sbi Baʼyel skarta Pedro xchiʼuk Xchibal skarta Pedro. Li ta Xchibal skarta Pedroe te la stsʼibabe skʼoplal kʼalal kʼopoj tal ta vinajel li Jeovae. Xi laj yal ta sventa li Jesuse: ‹Liʼe jaʼ Jnichʼon, lek jkʼanoj xchiʼuk ximuyubaj yuʼun›.

Li yan viniketik ta lokʼole oy kʼusitik la stsʼibaik ta sventa Jesus ek. June jaʼ sbi Markos. Jaʼo van te oy kʼalal la xchukik batel li Jesuse, jaʼ yuʼun laj yil li kʼusitik kʼot ta pasele. Oy to yan, jaʼ li Lukase. Jaʼ jun doktor, jaʼo van pas ta yajtsʼaklom Kristo kʼalal chamem xaʼox li Jesuse.

Li chaʼvoʼ jtsʼibajometik ta Vivlia ti te chavil ta lokʼole jaʼ yitsʼinab li Jesuse. ¿Mi xanaʼ kʼusi sbiik?... Jaʼ Santiago xchiʼuk Judas. Ta slikebale muʼyuk toʼox yakʼoj xchʼunel yoʼontonik ta stojolal li Jesuse, yuʼun likem jutuk xchuvaj yalojik. Pe ta mas tsʼakale laj yakʼ xchʼunel yoʼontonik ta stojolal, jaʼ yuʼun pasik ta yajtsʼaklom.

Li slajeb jtsʼibajom ta Vivlia ti te chavil ta lokʼole, jaʼ li Pabloe. Kʼalal maʼuk toʼox yajtsʼaklom Kristoe, Saulo toʼox sbi. Solel mu toʼox skʼan tajek li yajtsʼaklomtak Kristoe xchiʼuk chilbajinan tajek. ¿Mi xanaʼ kʼu yuʼun pas ta yajtsʼaklom Kristo li Pabloe?... Kʼalal yakal chanav jun veltae, laj yaʼi ti oy buchʼu chkʼoponat tal ta vinajele. ¿Buchʼu ti chkʼopoje? ¡Jaʼ chkʼopoj li Jesuse! Xi jakʼbat li Pabloe: ‹¿Kʼu yuʼun chavilbajin li buchʼutik oy xchʼunel yoʼontonik ta jtojolale?›. Kʼalal jech kʼot ta pasele, la sjel stalelal li Pabloe xchiʼuk pas ta yajtsʼaklom Kristo. La stsʼiba chanlajunlik livro ta Vivlia, chlik ta Romanos kʼalal ta Evreos.

¿Mi mu jechuk ti ta jkʼan ta jchantik jujun kʼakʼal li Vivliae?... Mi jech ta jpastike ta me xkojtikintik mas li Jesuse. ¿Mi oy ta avoʼonton jech chapas?...