Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Mateo 18:1-35

LI KʼUSITIK YICHʼOJE

  • Li buchʼu mas mukʼ skʼoplal li ta Ajvalilale (1-6)

  • Kʼusitik tsmak koktik (7-11)

  • Lokʼolkʼop ta sventa chʼayemal chij (12-14)

  • Kʼuxi xuʼ xakolta avermano (15-20)

  • Lokʼolkʼop ta sventa mosoil ti muʼyuk tspas pertone (21-35)

18  Li vaʼ orae nopajik tal ta stojolal Jesus li jchankʼopetike, xi laj yalbeike: «¿Buchʼu ti mas mukʼ skʼoplal ta melel li ta Ajvalilal ta vinajele?».  Vaʼun laj yikʼ tal jun uni olol, laj yakʼ ta oʼlol ti bu oyike  xchiʼuk xi laj yale: «Ta melel chkalboxuk avaʼiik, jaʼ to me cha-ochik li ta Ajvalilal ta vinajel mi chajel li anopbenike xchiʼuk mi jechoxuk kʼuchaʼal li uni ololetike.  Jaʼ yuʼun chaʼa, ti buchʼu bikʼit chakʼ sba jech kʼuchaʼal li uni olol liʼe jaʼ me li buchʼu mas mukʼ skʼoplal li ta Ajvalilal ta vinajele,  xchiʼuk li buchʼu tstsak ta venta junuk uni olol ta jbi jech kʼuchaʼal liʼe, yakal me tstsakun ta venta ek.  Pe li buchʼu tsmakbe yok junuk li buchʼu bikʼit yakʼoj sba ti oy xchʼunel yoʼonton ta jtojolale, mas me lek ti akʼo sjokʼanbeik mukʼta ton* ta snukʼ jech kʼuchaʼal li bu tsjoyoyin vuroe, vaʼun akʼo yichʼ jipel ochel ta oʼlol nab.  »¡Abol sba li krixchanoetik ti tsmakbe yok yantike! Yuʼun persa onoʼox chtal li kʼusi tsmak okile, pe ¡mas to toj abol sba li vinik ti jaʼ tsmak okile!  Jaʼ yuʼun chaʼa, mi tsmakot li avok o li akʼobe tuchʼo lokʼel xchiʼuk jipo batel. Yuʼun jaʼ mas lek mi koxoot o mi tunkoot chata akuxlejale, jaʼ vokol mi te oy xchibal avok o akʼob chavichʼ jipel batel ta kʼokʼ sbatel osile.  Jech xtok, mi yakal tsmak avok li sbekʼ asate pitso lokʼel xchiʼuk jipo batel. Yuʼun jaʼ mas lek mi jpʼej noʼox sbekʼ asat chata akuxlejale, jaʼ vokol mi te oy xchaʼpʼejal sbekʼ asat chavichʼ jipel ochel ta Jeena* ti bu xtiltun skʼakʼale. 10  Kʼelo me abaik, mu me xapʼajik junuk li buchʼutik liʼ oy ti bikʼit chakʼ sbaike; yuʼun chkalboxuk avaʼiik ti yaj-anjelik te ta vinajele te skʼelojbeik-o sat li Jtot ta vinajele. 11  *—— 12  »¿Kʼu xachiik? Mi oy jun vinik ti oy 100 ta kot xchije, pe ti chʼay jkote, ¿mi mu teuk van chikta ta vitstik li 99 ta kot sventa chbat saʼ tal li jkot ti chʼayeme? 13  Vaʼun mi la stae, ta melel chkalboxuk avaʼiik ti mas to xkuxet yoʼonton* ta stojolal li jkot taje, jaʼ mu sta jech ta stojolal li 99 ta kot ti muʼyuk bu xchʼaye. 14  Jaʼ jech muʼyuk lek chaʼi Jtot ta vinajel ek ti xlaj junuk li buchʼutik liʼ oy ti bikʼit chakʼ sbaike. 15  »Jech xtok, mi la saʼ smul ta atojolal li avermanoe, batan, bat kʼopono stuk sventa xavalbe yaʼi li smule.* Mi la xchikinta li kʼusi laj avalbee, vaʼun laj xa me akolta sventa jaʼ spas li kʼusi tukʼe. 16  Pe mi mu xchikintae, ikʼo batel junuk o chaʼvoʼuk achiʼil sventa jaʼ jech lek chotol xkom li kʼusi chichʼ chapanel kʼalal chkʼopoj chaʼvoʼ o oxvoʼ testigoe. 17  Pe mi mu skʼan x-aʼibatik eke, albo li tsobobbaile. Pe mi mu skʼan x-aʼibat ek li tsobobbaile, jaʼuk me jech xavil kʼuchaʼal jun jyanlum xchiʼuk jaʼuk me jech xavil kʼuchaʼal jun jtsobpatan. 18  »Ta melel chkalboxuk avaʼiik ti kʼusiuk noʼox ti chachukik liʼ ta sba balumile jaʼ me li kʼusitik chukbil xa ta vinajele, xchiʼuk kʼusiuk noʼox ti chatitunik liʼ ta sba balumile jaʼ me li kʼusitik titunbil xa ta vinajele. 19  Ta melel chkalboxuk avaʼiik yan velta ti mi oy chaʼvoʼoxuk liʼ ta sba balumil ti jmoj chanop akʼopik chapasik orasion ta sventa kʼusiuk noʼox ti tsots skʼoplale, ta xkʼot ta pasel koliyal li Jtot ta vinajele. 20  Yuʼun ti bu oyik chaʼvoʼ o oxvoʼ ta jventae, te oyun ta oʼlol ti bu oyike». 21  Vaʼun nopaj tal li Pedroe xchiʼuk xi laj yalbe li Jesuse: «Kajval, ¿jayib to velta skʼan jpasbe perton kʼalal tsaʼ smul ta jtojolal li kermanoe? ¿Mi vukub to velta?». 22  Vaʼun xi takʼbat yuʼun li Jesuse: «Muʼyuk chkalbot ti vukub to ta veltae, moʼoj, 77 to ta velta* skʼan jech xapas. 23  »Jaʼ yuʼun chaʼa, li Ajvalilal ta vinajele xuʼ xichʼ koʼoltasel kʼuchaʼal jun ajvalil ti tskʼan akʼo stoj yil li smosotake. 24  Kʼalal lik skʼan li ilile, laj yikʼbeik tal jun vinik ti oy lajunmil talento* yile. 25  Ta skoj ti muʼyuk kʼusi stoj-oe, albat yuʼun yajval ti akʼo yichʼ chonel li stuke, li yajnile, li xnichʼnabe xchiʼuk skotol li kʼusitik oy yuʼun sventa xtoj li yile. 26  Jaʼ yuʼun la skejan sba li mosoile, xi la skʼanbe vokol li yajvale: ‹Malabun to, ta jsutesbot skotol›. 27  Kʼuxubaj tajek ta yoʼonton, vaʼun la skolta batel smoso li ajvalile xchiʼuk la xchʼaybe li yile. 28  Pe kʼalal lokʼ batel li mosoil taje, te la sta ta be jun xchiʼil ta mosoil ti oy sien denario* yil yuʼune, la stsak xchiʼuk lik xmichʼbe snukʼ, xi laj yalbee: ‹Tojbun skotol li avile›. 29  Jaʼ yuʼun la skejan sba li xchiʼil ta mosoile, xi lik skʼanbe vokole: ‹Malabun to, ta jsutesbot›. 30  Pe muʼyuk bu la skʼan la smala, moʼoj, lokʼ batel, bat stikʼ ta chukel, jaʼ to tslokʼes mi toj yuʼun li yile. 31  Chopol tajek laj yilik li xchiʼiltak ta mosoil kʼalal laj yilik li kʼusitik kʼot ta pasele, vaʼun lokʼik batel, bat yalbeik skotol yajvalik li kʼusitik kʼot ta pasele. 32  Vaʼun takat ta ikʼel yuʼun li yajvale, xi albate: ‹Chopol mosoilot ta jyalel, la jchʼaybot skotol li avil kʼalal xavokolet la-ay ta jtojolale. 33  ¿Kʼu yuʼun ti muʼyuk xkʼuxubaj ta avoʼonton li achiʼil ta mosoil jech kʼuchaʼal laj kakʼ ta ilel xkʼuxul koʼonton ta atojolale?›. 34  Ta skoj taje ilin tajek li yajvale, bat yakʼ ta skʼob jchukvanejetik, jaʼ to tslokʼes mi la stoj skotol li yile. 35  Jaʼ me jech tspasboxuk Jtot ta vinajel ek mi mu ta sjunuluk avoʼontonik chapasbe abaik perton ta jujuntal xchiʼuk li avermanotakike».

Tsʼibetik ta yok vun

Kʼelo glosario.
Jaʼ ti bu chchikʼik kʼaʼep ta spat Jerusalene. Kʼelo glosario.
Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
O: «pʼij yoʼn»; «nichim yoʼonton».
S.gr.: «sventa xavakʼbe mantal».
O: «70 ta velta li vukube».
Li lajunmil talento platae smakoj 60 miyon ta sep denario. Kʼelo glosario.
Kʼelo glosario.