Kʼelo li kʼusi yichʼoje

Batan ta saʼobil

Lukas 9:1-62

LI KʼUSITIK YICHʼOJE

  • Laj yichʼik mantal sventa cholmantal li lajchaʼvoʼe (1-6)

  • Mu xa snaʼ kʼusi tspas li Erodese (7-9)

  • La smakʼlin voʼmil krixchano li Jesuse (10-17)

  • Laj yojtikin Kristo li Pedroe (18-20)

  • Baʼyel xa onoʼox laj yichʼ albel skʼoplal li slajel Jesuse (21, 22)

  • Melel jchankʼopetik (23-27)

  • La skʼatajes sba li Jesuse (28-36)

  • Kol jun kerem ti ochem jun pukuj ta yoʼontone (37-43 sbavokʼal)

  • Baʼyel xa onoʼox laj yichʼ albel skʼoplal yan velta li slajel Jesuse (43 xchaʼvokʼal kʼalal ta 45)

  • La svulilan sbaik ta sventa ti buchʼu junukal mas mukʼ skʼoplal yuʼunike (46-48)

  • Li buchʼu muʼyuk tskontrainoxuke jaʼ achiʼilik (49, 50)

  • Muʼyuk bu la xchʼamik Jesus li ta jun bikʼit lum yuʼun jsamariaetike (51-56)

  • Kʼuxi ta tsʼakliel li Jesuse (57-62)

9  Vaʼun la stak ta ikʼel li lajchaʼvoʼike, laj yakʼbe sjuʼelik xchiʼuk laj yakʼbe yabtelik sventa tspasik ta mantal skotol li pukujetike xchiʼuk sventa chpoxtaik jchameletik.  Vaʼun la stak batel sventa chbat xcholbeik skʼoplal li Ajvalilal yuʼun Diose xchiʼuk sventa chpoxtavanik,  xchiʼuk xi laj yalbee: «Mu me kʼusi xavichʼik batel ti bu chabatike, mu xavichʼ batel anamteʼik, amoralik, apanik,* atakʼinik* mi jaʼuk chaʼchop akʼuʼ apokʼik.*  Pe buyuk noʼox jpʼejukal na ti cha-ochike, te komanik-o xchiʼuk lokʼanik batel te.  Xchiʼuk buyuk noʼox ti mu skʼan xchʼamoxuke, lilino komel li spukukal* avokik kʼalal mi lalokʼik li ta jteklum taje, sventa xakʼik venta ti mu lekuk oyike».  Vaʼun la stam batel sbeik, batik ta jujun bikʼit lumetik, la xcholik batel li lekil aʼyejetike xchiʼuk ta buyuk noʼox poxtavanik.  Vaʼun, kʼot ta xchikin ajvalil Erodes* skotol li kʼusitik yakal chkʼot ta pasele, mu xa snaʼ kʼusi tspas, yuʼun oy buchʼutik chalik ti laj xa la yichʼ chaʼkuxesel li Juane,  pe li yantike chalik ti jaʼ la vul ta lokʼel li Eliase, li yantik xtoke chalik ti laj xa la yichʼ chaʼkuxesel junuk j-alkʼop ta voʼnee.  Xi laj yal li Erodese: «Voʼon la jtuchʼbe sjol li Juane. ¿Buchʼu xa noʼox skʼoplal ti vaʼ yelan kʼusitik tspase?». Jech oxal oy ta yoʼonton tskʼel yaʼi. 10  Kʼalal sutik tal li jtakboletike, laj yalbeik Jesus skotol li kʼusitik la spasike. Vaʼun laj yikʼ batel xchiʼuk batik ti bu stuktuk bu chʼikil ta jun jteklum ti Betsaida sbie. 11  Kʼalal laj yaʼi epal krixchanoetik taje, la stsʼakliik batel. Lek chʼamatik yuʼun li Jesuse xchiʼuk lik albatikuk skʼoplal li Ajvalilal yuʼun Diose xchiʼuk poxtaatik li buchʼutik skʼanik poxtaele. 12  Kʼalal lik chʼayuk batel li Kʼakʼale, li lajchaʼvoʼike te nopajik batel ta stojolal xchiʼuk xi laj yalbeike: «Tako xa batel li krixchanoetik sventa xbatik ta bikʼtal lumetik ti te oy ta sjoylejale xchiʼuk li ta stiʼiltak jteklum sventa tsaʼ bu xuʼ xvayik xchiʼuk kʼusi tslajesik, yuʼun nom ti bu oyutik ti stuk chʼikile». 13  Pe xi albatike: «Makʼlinik voʼoxuk». Xi laj yalike: «Chʼabal kʼusi oy kuʼunkutik, kʼajomal voʼob pan xchiʼuk chaʼkot choy, jaʼ xa noʼox mi chbat jmanbekutik tal sveʼel skotol li krixchanoetik liʼe». 14  Ta melel, te van voʼmiluk yepal li viniketike. Pe xi laj yalbe li yajchankʼoptake: «Albeik mantal ti akʼo xchotiik sventa stsob sbaik te van 50 ta voʼ jujuvokʼe». 15  Jaʼ jech la spasik, laj yalbeik ti akʼo xchoti skotolike. 16  Vaʼun la stsak li voʼob pane xchiʼuk li chaʼkot choye, la skʼel muyel vinajel, la stoj ta vokol. Laje la svokʼ,* te une laj yakʼbe li jchankʼopetike, vaʼun li jchankʼopetike bat yakʼbeik li krixchanoetike. 17  Jech oxal, veʼ skotolik xchiʼuk lek noj xchʼutik, vaʼun la stsobbeik li skomenale, noj lajcheb moch. 18  Ta tsʼakale, kʼalal jaʼo yakal tspas orasione, te batik ta stojolal Jesus li jchankʼopetike, vaʼun xi jakʼbatike: «¿Buchʼuun la chalik li krixchanoetike?». 19  Xi la stakʼbeike: «Voʼot la li Juan J-akʼ-ichʼvoʼe; pe li yantike chalik ti voʼot la li Eliase; li yantik xtoke chalik ti voʼot la junuk j-alkʼop ta voʼne ti laj yichʼ chaʼkuxesele». 20  Vaʼun xi albatike: «Pe li voʼoxuk une, ¿buchʼuun avalojik?». Xi la stakʼ li Pedroe: «Voʼot li Kristoot yuʼun Diose». 21  Vaʼun tsots albatik mantal, albatik ti mu me buchʼu xalbeike, 22  pe xi laj yale: «Toj ep chil svokol li Xnichʼon krixchanoe xchiʼuk chpʼajat yuʼun li moletike, li bankilal paleetike xchiʼuk li jchanubtasvanejetik ta Mantale, xchiʼuk chlaj ta milel, vaʼun chchaʼkuxi ta yoxibal kʼakʼal». 23  Vaʼun xi laj yalbe skotolike: «Mi oy buchʼu tskʼan chtal ta jtojolale akʼo sten ta yoʼonton xkuxlejal, akʼo xkuch li jtel teʼ sventa vokolil* jujun kʼakʼale xchiʼuk akʼo stsʼakliun-o batel. 24  Yuʼun li buchʼu tspoj yaʼi xkuxlejale ta me xchʼay yuʼun, yan li buchʼu chchʼay xkuxlejal ta jkoje jaʼ me tspoj. 25  Ta melel, ¿mi oy kʼusi lek tspas jun krixchano ti chuʼunin skotol li kʼusi oy ta balumil, pe ti jaʼ chbat ta chʼayel li stuke o ti chil svokole? 26  Yuʼun li buchʼu chkʼexav ta jtojolal xchiʼuk ta sventa li kʼusi chkale, li Xnichʼon krixchanoe jaʼ jech ta xkʼexav ta stojolal ek kʼalal mi vul tal xchiʼuk smukʼulal stuk xchiʼuk smukʼulal Stot xchiʼuk smukʼulal skotol li chʼul anjeletike. 27  Pe chkalboxuk avaʼiik ta melel ti oy jlom li buchʼutik liʼ vaʼalik ti muʼyuk bu tspasik preva ta jyalel li lajelale, jaʼ to me mi baʼyel laj yilik li Ajvalilal yuʼun Diose». 28  Ta melel, kʼalal echʼ xaʼox van vaxakib kʼakʼal ti laj yal Jesus taje, laj yikʼ muyel ta vits li Pedroe, laj yikʼ batel xtok li Juan xchiʼuk li Santiagoe, bat spas orasion. 29  Kʼalal jaʼo yakal tspas orasione, lik yanijuk* li sate xchiʼuk sakub ta bu kʼalal li skʼuʼ spokʼe. 30  ¡Kʼelo avil xtok!, te yakal chchiʼinat ta loʼil yuʼun chaʼvoʼ viniketik, jaʼ li Moises xchiʼuk Eliase. 31  Vinaj xojobalik xchiʼuk lik yalbeik skʼoplal ti chbate, ti jech onoʼox albil skʼoplal ti poʼot xkʼot ta pasel ta stojolal ta Jerusalene. 32  Vaʼun li Pedro xchiʼuk li buchʼutik te xchiʼinoje solel tsmutsʼ xa sba stuk li satike, pe kʼalal vikʼ xaʼox lek satike, laj yilbeik li xojobal Jesuse xchiʼuk laj yilik li chaʼvoʼ viniketik ti te vaʼalike. 33  Kʼalal chchʼak xa sbaik batel li chaʼvoʼ viniketike, xi laj yalbe Jesus li Pedroe: «Jchanubtasvanej, toj lek ti liʼ oyunkutike. Jaʼ yuʼun akʼo jvaʼankutik oxpʼej karpana, jpʼej avuʼun, jpʼej yuʼun Moises xchiʼuk jpʼej yuʼun Elias». Pe mu snaʼ li kʼusi yakal chale. 34  Pe kʼalal yakal to chal li kʼusitik taje la svol sba tal jvol tok xchiʼuk pixatik ta yaxinal. Xiʼik tajek kʼalal yakal chpixatik yuʼun li toke. 35  Vaʼun te vinaj tal jun yechʼomal eil ta tok ti xi chale: «Liʼe jaʼ Jnichʼon, jaʼ li buchʼu tʼujbile. Chikintaik li kʼusi chale». 36  Kʼalal vinaj li yechʼomal eile, stuk xa te oy li Jesuse. Pe muʼyuk kʼusi xalik li vaʼ kʼakʼale xchiʼuk muʼyuk buchʼu laj yalbeik li kʼusitik laj yilike. 37  Ta yokʼomale, kʼalal yalik tal li ta vitse, bat nupatuk ta be yuʼun epal krixchanoetik. 38  ¡Kʼelo avil!, tsots kʼopoj jun vinik ti bu oy epal krixchanoetike, xi laj yale: «Jchanubtasvanej, ta jkʼanbot vokol ti akʼo xakolta li jnichʼone, yuʼun jun noʼox, 39  yuʼun, ¡kʼelo avil!, ch-ilbajinat yuʼun jun pukuj, ta anil noʼox chlik avanuk, tstupʼbe yikʼ xchiʼuk chvokan ye yuʼun, xchiʼuk vokol chikta kʼalal laj xaʼox syayijese. 40  La jkʼanbe vokol avajchankʼoptak ti akʼo slokʼesbeike, pe muʼyuk bu xuʼ yuʼunik». 41  Xi la stakʼ li Jesuse: «¡Ay, jkʼol kuxlejal ti chʼabal xchʼunel yoʼonton xchiʼuk ti jpasmulile!, ¿kʼu to van sjalil liʼ ta jchiʼinoxuke xchiʼuk kʼu to van sjalil ta jtsʼikboxuk xkal? Ikʼo tal li anichʼone». 42  Pe kʼalal jaʼo chnopaj xa batel li Jesuse, li pukuje la sjip ta lum li kereme xchiʼuk tsots la slikesbe stupʼ-ikʼ. Pe li Jesuse la stsak ta utel li ibal sba pukuje xchiʼuk la xpoxta li kereme, vaʼun laj yakʼbe sutel skerem li totile. 43  Vaʼun toj chʼayal to kʼot yoʼonton skotolik ta skoj li smukʼul juʼel Diose. Kʼalal jaʼo chʼayal yoʼonton skotolik ta skoj li kʼusitik la spase, xi laj yalbe li yajchankʼoptake: 44  «Chikintaik lek xchiʼuk vuleso me ta ajolik li kʼusitik chkale, yuʼun li Xnichʼon krixchanoe ta xichʼ akʼel ta skʼob krixchanoetik». 45  Pe muʼyuk bu laj yaʼibeik-o smelolal li kʼusi laj yale. Ta melel, laj yichʼik mukbel sventa mu xaʼibeik smelolal, vaʼun muʼyuk kʼusi la sjakʼbeik ta sventa li kʼusi laj yale, yuʼun xiʼik ta sjakʼel. 46  Vaʼun lik svulilan sbaik ta sventa ti buchʼu junukal mas mukʼ skʼoplal yuʼunike. 47  Ta skoj ti snaʼoj Jesus li kʼusi yakal tsnop ta yoʼontonike, laj yikʼ tal jun uni olol, la svaʼan ta xokon, 48  vaʼun xi albatike: «Li buchʼu tstsak ta venta junuk uni olol ta jbi jech kʼuchaʼal li uni olol liʼe, tstsakun ta venta ek; xchiʼuk li buchʼu tstsakun ta ventae tstsak ta venta ek li Buchʼu la stakun tale. Yuʼun li buchʼu bikʼit chakʼ sba avuʼunike jaʼ li buchʼu mas mukʼ skʼoplale». 49  Xi la stakʼ li Juane: «Jchanubtasvanej, oy buchʼu laj kilkutik ti yakal tslokʼes pukujetik kʼalal tstunes abie, laj ox jpajeskutik, yuʼun maʼuk jchiʼiltik ta xanbal». 50  Pe xi albat yuʼun li Jesuse: «Mu xapajesik, yuʼun li buchʼu muʼyuk tskontrainoxuke jaʼ achiʼilik». 51  Ta skoj ti chkʼot xa skʼakʼalil ti chichʼ ikʼel muyele, jpʼel ta yoʼonton laj yakʼ batel sat sventa chbat ta Jerusalen. 52  Jaʼ yuʼun la stak jelavel jayvoʼuk yajkʼopojel. Vaʼun batik li buchʼutik takatik batele xchiʼuk te kʼotik ta jun bikʼit lum yuʼun jsamariaetik* sventa chchapanbeik li kʼusitik chtun yuʼune. 53  Pe muʼyuk bu la xchʼamik li Jesus ta skoj ti jpʼel ta yoʼonton chbat ta Jerusalene. 54  Kʼalal laj yil li jchankʼop Santiago xchiʼuk Juan taje, xi laj yalike: «Kajval, ¿mi chakʼan ta jkʼankutik akʼo yaluk tal kʼokʼ ta vinajel sventa xlajesatik?». 55  Pe joypʼij li Jesuse, vaʼun la stsak ta utel. 56  Jech oxal batik ta yan bikʼit lum. 57  Pe kʼalal jaʼo te xbatik ta bee, oy buchʼu xi albate: «Ta jtsʼakliot batel ti buyuk noʼox chabate». 58  Pe xi takʼbat yuʼun li Jesuse: «Oy xchʼen li vetetike xchiʼuk oy stas li mutetik chvil ta vinajele, yan li Xnichʼon krixchanoe muʼyuk bu xuʼ smetsan sjol». 59  Vaʼun xi laj yalbe yan vinike: «Laʼ tsʼakliun». Xi laj yal li vinike: «Kajval, baʼyel akʼo bat jmuk li jtote». 60  Pe xi albat yuʼun li Jesuse: «Akʼo smuk yanima stukik li animaetike, pe batan li voʼote, bat cholbo skʼoplal ta buyuk noʼox li Ajvalilal yuʼun Diose». 61  Oy to yan buchʼu xi laj yale: «Ta jtsʼakliot batel Kajval, jaʼ noʼox ti baʼyel akʼo bat jkʼopon komel li buchʼutik te oy ta jnae». 62  Xi albat yuʼun li Jesuse: «Li buchʼu stsakoj ta skʼob slokobil osile, mi tskʼel sutel li kʼusitik yiktaoje, mu xtun ta sventa li Ajvalilal yuʼun Diose».

Tsʼibetik ta yok vun

Kʼelo glosario.
S.gr.: «aplataik».
O: «jchop smasil akʼuʼ apokʼik».
O: «spolvoal»; «stsʼubil lumal»; «stanil».
Jaʼ skʼoplal li Erodes Antipase. Kʼelo glosario.
O: «la xetʼ»; «la xut».
Kʼelo glosario.
O: «lik jeluk».
Kʼelo glosario.