Kʼelo li kʼusi yichʼoje

Batan ta saʼobil

Lukas 6:1-49

LI KʼUSITIK YICHʼOJE

  • «Jaʼ Yajval Savado» li Jesuse (1-5)

  • La xpoxta jun vinik ti xmochʼoj sba jun skʼobe (6-11)

  • Lajchaʼvoʼ jtakboletik (12-16)

  • Chanubtasvan xchiʼuk poxtavan li Jesuse (17-19)

  • Xamuyubajik xchiʼuk abol abaik (20-26)

  • Jkʼan jchiʼiltik (27-36)

  • Mu xa xatikʼik mulil (37-42)

  • Chichʼ ojtikinel ta sat (43-45)

  • Na ti lek vaʼanbile; na ti muʼyuk lek tsots snaklebe (46-49)

6  Vaʼun, kʼalal jaʼo te jelav ta trigoaltik ta skʼakʼalil Savadoe, la xtuchʼik trigo li yajchankʼoptake xchiʼuk la sjuʼilan ta skʼobik, jech oxal lik xkʼuxik.  Ta skoj taje xi laj yal jlom jfariseoetike: «¿Kʼu yuʼun jaʼ yakaloxuk spasel li kʼusi mu stakʼ pasel ta Savadoe?».  Pe xi takʼbatik yuʼun li Jesuse: «¿Mi muʼyuk akʼelojik-o li kʼusi la spas David xchiʼuk sviniktak kʼalal viʼnajike?  ¿Ti och batel ta sna Dios xchiʼuk ti akʼbat li pan ti akʼbil ta stojolal Dios,* ti la sveʼ xchiʼuk ti laj yakʼbe ek li buchʼutik te xchiʼuk batele, ti jaʼ noʼox xuʼ sveʼik li paleetike, ti muʼyuk buchʼu yan xuʼ sveʼe?».  Vaʼun xi albatike: «Jaʼ Yajval Savado li Xnichʼon krixchanoe».  Kʼalal jaʼo skʼakʼalil Savado xtoke, och batel ta nail tsobobbail xchiʼuk te lik chanubtasvanuk. Vaʼun te oy jun vinik ti xmochʼoj sba li sbatsʼikʼobe.  Li jchanubtasvanejetik ta Mantal xchiʼuk li jfariseoetike te tskʼelik batel lek mi chpoxtavan ta skʼakʼalil Savado li Jesuse, yuʼun tskʼelik kʼu yelan xuʼ tsabeik smul.  Pe li stuke snaʼoj li kʼusi tsnopike, jech oxal xi laj yalbe li vinik ti xmochʼoj sba jun skʼobe: «Likan, vaʼano aba ta oʼlol». Vaʼun lik xchiʼuk bat svaʼan sba ta oʼlol.  Vaʼun xi albatik yuʼun li Jesuse: «Oy kʼusi ta jakʼboxuk: ¿Kʼusi stakʼ pasel li ta Savadoe, mi jaʼ li kʼusi leke o mi jaʼ li kʼusi chopole; mi jaʼ ti oy buchʼu ta jpojtike o mi jaʼ ti oy buchʼu ta jmiltike?». 10  Vaʼun kʼalal la skʼel jujujot xokone, xi laj yalbe li vinike: «Xachʼo li akʼobe». La xachʼ, vaʼun lekub li skʼobe. 11  Pe jecheʼ noʼox xkʼakʼetik likel xchiʼuk lik yalilanbe sbaik kʼusi xuʼ spasbeik li Jesuse. 12  Oy jun kʼakʼal ti muy batel ta vits sventa tspas orasione, sjunul akʼobal la skʼopon Dios. 13  Pe kʼalal sakub osile, laj yikʼ tal li yajchankʼoptake, vaʼun la stʼuj lokʼel lajchaʼvoʼ, jtakboletik* laj yakʼbe sbi: 14  jaʼ Simon ti Pedro laj yakʼbe sbie, ti sbankil yitsʼin sbaik xchiʼuk Andrese, Santiago, Juan, Felipe, Bartolome, 15  Mateo, Tomas, Santiago xnichʼon Alfeo, Simon ti «sjunul oʼontonal»* chalbeike, 16  Judas xnichʼon Santiago xchiʼuk Judas Iskariote ti akʼvan ta kʼabal ta tsʼakale. 17  Vaʼun li Jesuse yal tal xchiʼukik, te kʼot ta stenlejal, te oy epal krixchanoetik ti jaʼ yajchankʼoptake xchiʼuk epal krixchanoetik ti likemik tal ta sjunul steklumal Judea, ta Jerusalen, ta yosilal Tiro xchiʼuk Sidon ti ta tiʼ nab oyike, tal yaʼiik li kʼusitik chale xchiʼuk sventa chichʼ poxtabel li xchamelike. 18  Kʼalal ta buchʼutik ilbajinbilik yuʼun ibal sba pukujetik kolik ek. 19  Vaʼun tskʼelik kʼusi xuʼ spasik sventa tstaik ta pikel Jesus li epal krixchanoetike, yuʼun chlokʼ sjuʼel ti chpoxta skotol li krixchanoetike. 20  Vaʼun la stoy muyel sat ta stojolal li yajchankʼoptake xchiʼuk xi laj yalanbee: «Xamuyubajik noʼox* li voʼoxuk ti abol abaike, yuʼun jaʼ avuʼunik li Ajvalilal yuʼun Diose. 21  »Xamuyubajik noʼox li voʼoxuk ti chaviʼnajik avie, yuʼun chavichʼ nojesbel achʼutik. »Xamuyubajik noʼox li voʼoxuk ti cha-okʼik avie, yuʼun chatseʼinik. 22  »Xamuyubajik noʼox me li voʼoxuk kʼalal ta spʼajoxuk li krixchanoetike, kʼalal ta snutsoxuk lokʼel, kʼalal ta xchopol kʼoptaoxuk xchiʼuk kʼalal chakʼik ta kʼexlal abiik ti toj chopoloxuk chalik ta skoj li Xnichʼon krixchanoe. 23  Kuxetuk noʼox me avoʼontonik li vaʼ kʼakʼale xchiʼuk pʼitanik me ta muyubajel, yuʼun ¡kʼelo avilik!, mukʼ li amoton chataik ta vinajele, yuʼun taje jech onoʼox la spasbeik j-alkʼopetik li smoltotakik ta voʼnee. 24  »Pe ¡abol abaik li voʼoxuk ti jkʼulejoxuke, yuʼun lek xa tsʼakal ataojik li spatobil avoʼontonike! 25  »¡Abol abaik li voʼoxuk ti noj achʼutik avie, yuʼun chaviʼnajik! »¡Abol abaik li voʼoxuk ti chatseʼinik avie, yuʼun chavat avoʼontonik xchiʼuk cha-okʼik! 26  »¡Abol abaik mi lek xa akʼoplalik yuʼun li krixchanoetike, yuʼun jech la spasbeik jloʼlavanej j-alkʼopetik li smoltotakik ta voʼnee! 27  »Pe xi chkalboxuk li voʼoxuk ti yakal chachikintaik li kʼusitik chkale: kʼanik-o me li avajkontratakike, lek me kʼusi xapasbeik li buchʼutik tspʼajoxuke, 28  kʼanik akʼo x-akʼbat slekilal li buchʼutik chchopol kʼoptaoxuke, pasik orasion ta stojolal li buchʼutik chayilbajinike. 29  Li buchʼu chtʼaxbot majel ta xokon asate, akʼo xtʼaxbot xtok li ta jote; li buchʼu tspojbot li akʼuʼ alapoj ta sbae, mu xajalanbe xtok li akʼuʼ alapoj ta yute. 30  Akʼbo li buchʼu oy kʼusi tskʼanbote xchiʼuk li buchʼu tspojbot kʼusitik avuʼune, mu xakʼanbe sutel. 31  »Jech xtok, li kʼusitik chakʼan akʼo spasboxuk li krixchanoetike jechuk me xapasbeik ek. 32  »Mi jaʼ noʼox chakʼanik li buchʼutik skʼanojoxuke, ¿kʼusi lek chavakʼik ta ilel li voʼoxuke? Yuʼun kʼalal ta jpasmuliletik skʼanojik ek li buchʼutik chkʼanatike. 33  Xchiʼuk mi lek kʼusi chapasbeik li buchʼutik lek kʼusi tspasboxuke, ¿kʼusi lek chavakʼik ta ilel li voʼoxuke? Yuʼun kʼalal ta jpasmuliletik jech tspasik ek. 34  Jech xtok, mi chavakʼbeik ta chʼamunel* li buchʼu apatoj avoʼontonik tsutesboxuke, ¿kʼusi lek chavakʼik ta ilel li voʼoxuke? Yuʼun kʼalal ta jpasmuliletik chakʼbeik ta chʼamunel jpasmuliletik, yuʼun spatoj yoʼonton tsutesbatik ti kʼu yepal laj yakʼike. 35  Yan li voʼoxuke kʼanik-o me li avajkontratakike, pasbeik kʼusi lek xchiʼuk akʼbeik ta chʼamunel, mu xapat avoʼontonik ti tsutesboxuke; mi jech chapasike mukʼ amoton chataik, xchiʼuk chakʼotik ta xnichʼnab li Buchʼu toj toyol oye, yuʼun li stuke lek yoʼonton ta stojolal li buchʼu mu snaʼ stoj ta vokole xchiʼuk li buchʼu toj chopole. 36  Oyuk-o me xkʼuxul avoʼontonik jech kʼuchaʼal oy xkʼuxul yoʼonton li Atotike. 37  »Jech xtok, mu xa xatikʼik mulil, vaʼun mi jaʼuk bu chavichʼ tikʼbel amulik ek, mu xa xavalik ti tstoj smul li yantike, vaʼun mi jaʼuk bu chavichʼik albel ti chatoj amulik eke. Pasbeik perton smul li yantike sventa chavichʼ pasbel perton amulik ek. 38  Oyuk me kʼusi xavakʼilanbeik li yantike, vaʼun cha-akʼbatik ek. Chtanij xa me lokʼel li kʼusi achupoj ta stiʼ avoʼontonik ti lek tsʼakal spʼisole, ti tsinile, ti lek noje xchiʼuk ti tokol xae. Yuʼun ti kʼu yelan chapʼisvanike jaʼ jech chavichʼik pʼisel ek». 39  Vaʼun albatik jun lokʼolkʼop xtok: «Li jun maʼsate mu xuʼ sbeiltas yan maʼsat, ¿mi mu jechuk? Xchaʼvoʼalik chbalchʼujik ochel ta chʼen, ¿mi mu jechuk? 40  Li jun jchanune* maʼuk mas jelavem skʼoplal kʼotem ta stojolal li yajchanubtasvaneje, pe skotol li buchʼu lek chanubtasbile jaʼ jech chkʼot kʼuchaʼal li yajchanubtasvaneje. 41  Vaʼun chaʼa, ¿kʼu yuʼun chakʼelbe sjobelal sbekʼ sat avermano ti jaʼ mu xavakʼ venta ti te kʼatal jtel tsʼamteʼ ta sbekʼ asat atuke? 42  ¿Kʼuxi ti xi chavalbe avermanoe: ‹Ermano, jlokʼestik li sjobelal sbekʼ asate›, pe ti mu xavil ti te kʼatal jtel tsʼamteʼ ta sbekʼ asat atuke? ¡Jloʼlavanej! Baʼyel lokʼeso li jtel tsʼamteʼ te kʼatal ta sbekʼ asat atuke, sventa xavil lek kʼuxi xuʼ xalokʼesbe sjobelal sbekʼ sat li avermanoe. 43  »Yuʼun chʼabal jtekʼuk lekil teʼ ti chopol chakʼ sate, xchiʼuk chʼabal jtekʼuk teʼ ti kʼoʼ ti lek tajek sat chakʼe. 44  Yuʼun chichʼ ojtikinel ta sat li jujutekʼ teʼe. Jech kʼuchaʼal liʼe, muʼyuk bu chichʼ tsobel igo ta chʼixtik, xchiʼuk muʼyuk bu chichʼ tsobel tsʼusub ta jpets chʼix. 45  Li lekil vinike lek kʼusi tslokʼes li ta slekil kʼulejal ta yoʼontone, pe li vinik ti toj chopole chopol kʼusi tslokʼes li ta skʼulejal ti toj chopole. Yuʼun jaʼ chlokʼ ta ye li kʼusitik oy ta yoʼontone. 46  »Vaʼun chaʼa, ¿kʼu yuʼun ‹¡Kajval! ¡Kajval!›, xavutikun, ti muʼyuk bu chapasik li kʼusitik chkalboxuke? 47  Skotol li buchʼu chtal ta jtojolal xchiʼuk ti chaʼi li kʼusitik chkale xchiʼuk ti tspase, chkalboxuk avaʼiik buchʼu xkoʼolaj-o: 48  jaʼ xkoʼolaj kʼuchaʼal jun vinik ti la svaʼan sna ta sba tone, ti nat la sjom yalel sventa tspasbe lek snaklebe. Jech oxal chaʼa, kʼalal tal nojelale laj ta majel ta ukʼum li na taje, pe muʼyuk bu la svukʼilan, yuʼun lek vaʼanbil. 49  Yan li buchʼu chaʼi li kʼusitik chkale pe ti muʼyuk bu tspase, xkoʼolaj kʼuchaʼal jun vinik ti la svaʼan sna ta ba lum ti muʼyuk bu laj yakʼbe snaklebe. Laj ta majel ta ukʼum, vaʼun ta anil noʼox lom, batsʼi laj ta jyalel li na taje».

Tsʼibetik ta yok vun

Kʼelo glosario.
Kʼelo glosario.
O: «baxbol».
O: «Pʼij noʼox avoʼnik»; «Nichim noʼox avoʼontonik».
Taje jaʼ skʼoplal li kʼusi chichʼ chʼamunel ti muʼyuk chjoline.
O: «jchankʼope».