Kʼelo li kʼusi yichʼoje

Batan ta saʼobil

Lukas 17:1-37

LI KʼUSITIK YICHʼOJE

  • Kʼusi tsmak okil, spasel perton xchiʼuk xchʼunel oʼontonal (1-6)

  • Mosoilunkutik ti mu kʼusi xitunkutik-oe (7-10)

  • Poxtaj lajunvoʼ viniketik ti ipik ta kʼaʼemal chamele (11-19)

  • Chtal li Ajvalilal yuʼun Diose (20-37)

    • «Liʼ oy ta oʼlol avuʼunik li Ajvalilal yuʼun Diose» (21)

    • Vuleso me ta ajolik li yajnil Lote (32)

17  Vaʼun xi laj yalbe li yajchankʼoptake: «Persa onoʼox chtal li kʼusitik tsmak okile. Pe ¡toj abol sba li buchʼu tsmak okile!  Jaʼ me mas lek jechuk ti akʼo sjokʼanbeik mukʼta ton* ta snukʼ xchiʼuk ti akʼo yichʼ jipel ochel ta nabe, ti jaʼ mu smakbe yok junuk li buchʼutik bikʼit yakʼoj sbaik liʼe.  Kʼelo me aba atukik. Mi oy bu la spas smul junuk velta li avermanoe, tsots albo mantal, vaʼun pasbo perton mi la sutes yoʼontone.  Manchuk mi vukub to velta ta kʼakʼal tspas smul ta atojolal xchiʼuk ti vukub to velta xi chtal yalbote: ‹Pasbun perton›, skʼan me xapasbe perton».  Vaʼun, xi laj yalbeik Kajvaltik li jtakboletike: «Akʼbun mas xchʼunel koʼontonkutik».  Vaʼun xi laj yal li Kajvaltike: «Ti jechuk smukʼul xchʼunel avoʼontonik kʼuchaʼal bekʼ mostasae,* xi chavalbeik jechuk li teʼ* liʼe: ‹¡Bulo aba lokʼel, bat tsʼuno aba ta nab!›, vaʼun ta xchʼunboxuk.  »¿Buchʼu junukal avuʼunik ti oy junuk smoso ti yakal tslok osil o ti yakal ta xchabi jtsop chij ti xi chalbe mi sut tal ta osiltike: ‹Laʼ ta anil liʼe, chotlan ta veʼel›, mi xi van?  Mu jechuk, ¿mi mu van xiuk chalbee: ‹Meltsano jutuk kʼusi ta jlajes, lapo amak* sventa xavakʼbun jveʼel xchiʼuk xavakʼbun kʼusi chkuchʼ, vaʼun jaʼ to xaveʼ xavuchʼ voʼ mi laj koʼontone›?  Muʼyuk bu tstojbe ta vokol li smoso ti la spas skotol li kʼusitik sbainoje, ¿mi mu jechuk? 10  Jaʼ jech li voʼoxuk eke, kʼalal mi laj xaʼox apasik skotol li kʼusitik akʼbil ta abaik spasele, xi xavalike: ‹Mosoilunkutik ti mu kʼusi xitunkutik-oe. Li kʼusi la jpaskutike jaʼ onoʼox li kʼusi skʼan jpaskutike›». 11  Vaʼun kʼalal jaʼo yakal chbat ta Jerusalene, te echʼ ta yosilal* Samaria* xchiʼuk Galilea. 12  Kʼalal jaʼo yakal ch-och batel ta jun bikʼit lume te nupat ta be yuʼun lajunvoʼ viniketik ti ipik ta kʼaʼemal chamele, pe nom noʼox la svaʼan sbaik. 13  Avanik xchiʼuk xi laj yalike: «¡Jesus, Jchanubtasvanej, oyuk xkʼuxul avoʼonton ta jtojolalkutik!». 14  Kʼalal ilatike, xi albatike: «Batanik, bat akʼo abaik ta ilel ta stojolal li paleetike». Pe kʼalal jaʼo chanavik batele poxtajik. 15  Oy jun ti kʼalal laj yil ti kole, sut tal, tsots x-avet tal sventa tstoybe skʼoplal Dios. 16  Vaʼun la spatan sba ta yok Jesus, la stojbe ta vokol. Jaʼ to noʼox jun jsamaria vinik xtok. 17  Xi laj yal li Jesuse: «Lajunvoʼ ta akotolalik ti laj avichʼik poxtaele, ¿mi mu jechuk? Vaʼun chaʼa, ¿bu oyik li balunvoʼ achiʼiltake? 18  ¿Mi muʼyuk buchʼu yan sut tal sventa tstoybe skʼoplal Dios, ti jaʼ noʼox sut tal li jyanlum vinik liʼe?». 19  Vaʼun xi laj yalbe li vinike: «Likan, tamo batel abe, lapoxtaj xa ta skoj li xchʼunel avoʼontone». 20  Kʼalal jakʼbat yuʼun jfariseoetik bakʼin chtal li Ajvalilal yuʼun Diose, xi la stakʼe: «Mu yuʼunuk lek xa tajek xvinaj chtal li Ajvalilal yuʼun Diose, 21  mi jaʼuk xi chalike: ‹¡Kʼelo avilik liʼe!› o ‹¡Leʼe!›. Yuʼun ¡kʼelo avilik!, liʼ oy ta oʼlol avuʼunik li Ajvalilal yuʼun Diose». 22  Vaʼun xi laj yalbe li yajchankʼoptake: «Chkʼot skʼakʼalil ti oy ta avoʼontonik chakʼan chakʼelbeik junuk skʼakʼalil li Xnichʼon krixchanoe, pe muʼyuk bu chavilik. 23  Xchiʼuk xi cha-albatike: ‹¡Kʼelo avilik leʼe!› o ‹¡Kʼelo avilik liʼe!›. Mu me xabatik, mi jaʼuk xatsʼakliik batel ta anil. 24  Yuʼun jech kʼuchaʼal saksevul ti xlebluj lokʼel ta vinajel ti chbat kʼalal to ta jot vinajel li xojobale, jaʼ jech ek li Xnichʼon krixchano kʼalal mi kʼot skʼakʼalile. 25  Pe persa baʼyel chil svokol xchiʼuk chichʼ pʼajel yuʼun li jkʼol kuxlejal liʼe. 26  Jech xtok, jech kʼuchaʼal kʼot ta pasel ta skʼakʼalil Noee, jaʼ jech chkʼot ta pasel li ta skʼakʼalil Xnichʼon krixchanoe: 27  li vaʼ kʼakʼale ta xveʼik, ta x-uchʼbolajik noʼox li krixchanoetike, ta saʼ yajnil li viniketike xchiʼuk chakʼ ta malijel stsebik li krixchanoetike; jaʼ to la xkechanik kʼalal och ta arka li Noee, vaʼun vul li Nojelal ta voʼe xchiʼuk laj skotolik. 28  Jech xtok, jech kʼuchaʼal kʼot ta pasel ta skʼakʼalil Lote: ta xveʼik, ta x-uchʼbolajik noʼox li krixchanoetike, ta xmanolajik, ta xchonolajik, ta stsʼunolajik xchiʼuk ta svaʼan snaik. 29  Pe kʼalal jaʼo lokʼ ta Sodoma li Lote, yal tal kʼokʼ xchiʼuk asufre ta vinajel, vaʼun laj skotolik. 30  Jaʼ jech chkʼot ta pasel ek li vaʼ kʼakʼal kʼalal chakʼ sba ta ilel ta stojolal krixchanoetik li Xnichʼon krixchanoe. 31  »Li vaʼ kʼakʼale, li buchʼu te oy ta sjol snae akʼo mu xyal yichʼ li kʼusitik oy yuʼun ta yut snae, xchiʼuk xtok, li buchʼu te oy ta yosile mu me sut skʼel li kʼusitik yiktaoj komele. 32  Vuleso me ta ajolik li yajnil Lote. 33  Li buchʼu tspoj yaʼi xkuxlejal stuke ta me xchʼay yuʼun, yan li buchʼu chchʼay yuʼune jaʼ me chkuxi-o. 34  Chkalboxuk avaʼiik ti vaʼ akʼobale te puchʼul* ta jun tem chaʼvoʼ krixchanoetik: li june ch-ikʼat batel, li yane te ch-iktaat komel. 35  Oy chaʼvoʼ antsetik ti jmoj yakal chjuchʼunike: li june ch-ikʼat batel, pe li yane te ch-iktaat komel». 36  *—— 37  Jech oxal chaʼa, xi la stakʼbeike: «¿Bu taje, Kajval?». Xi albatike: «Jaʼ te chbat stsob sbaik li aguilaetik ti bu oy li bekʼtalile».

Tsʼibetik ta yok vun

Kʼelo glosario.
Jaʼ jtos bikʼit bekʼ tsʼunobil ti chchʼi ta Palestinae. Taje te van chanibuk metro staylej chchʼi xchiʼuk oy skʼobkʼobtak.
Taje jaʼ jtekʼ teʼel makom. Jaʼ jun tsatsal teʼ ti te van vakibuk metro staylej chbate, ti setajtik yanale xchiʼuk ti lek tsoj o ti ikʼ chakʼ sate.
O: «amandil».
Xuʼ van ta stsʼak Samaria xchiʼuk Galilea.
Kʼelo glosario.
O: «metsel»; «mochol»; «taʼal».
Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.