Kʼelo li kʼusi yichʼoje

Batan ta saʼobil

Juan 5:1-47

LI KʼUSITIK YICHʼOJE

  • Poxtaj jun vinik ta Betsata ti ipe (1-18)

  • Akʼbat yabtel yuʼun Stot li Jesuse (19-24)

  • Chaʼibeik yechʼomal ye Jesus li animaetike (25-30)

  • Skʼoplal Jesus (31-47)

5  Kʼalal echʼ xaʼox taje, yakal tspasik kʼin li judaetike, vaʼun muy batel ta Jerusalen li Jesuse.  Li ta Jerusalene, li ta xokon Yocheb Chije, oy te jun tanke ti Betsata sbi ta evreoe,* oy te jpʼej kotkot na ti voʼchol yoyale.  Te puchʼajtik* epal jchameletik, oy maʼsatetik, koxoetik xchiʼuk li buchʼutik tsakbilik ta mochʼe.  *——  Pe oy te jun vinik ti oy xa ta 38 jabil ipe.  Kʼalal laj yil Jesus ti te puchʼul li vinike xchiʼuk ti laj yakʼ venta ti voʼne xa tajek ipe, xi laj yalbee: «¿Mi chakʼan chakol?».  Vaʼun xi la stakʼ li vinik ti ipe: «Bankilal, muʼyuk buchʼu xuʼ stikʼun ochel ta tanke kʼalal tsyukʼilan sba li voʼe; yuʼun oy xaʼox buchʼu ochem kʼalal chibate».  Xi takʼbat yuʼun li Jesuse: «¡Vaʼlan! Tamo batel li avayebe,* vaʼun xanavan batel».  Te une ta ora noʼox kol li vinike, la stam batel li svayebe, vaʼun xanav batel. Pe jaʼo Savado* li vaʼ kʼakʼale. 10  Vaʼun xi lik albatuk yuʼun judaetik li vinik ti kolem xae: «Savado li avie, jech oxal mu stakʼ xatam batel avayeb». 11  Pe xi la stakʼ li vinike: «Batsʼi jaʼ xi laj yalbun stuk li buchʼu la xpoxtaune: ‹Tamo batel li avayebe, vaʼun xanavan batel›». 12  Xi la sjakʼbeik li vinike: «¿Buchʼu ti ‹Tamo batel, vaʼun xanavan batel›, xayute?». 13  Pe li vinik ti kolem xae mu snaʼ buchʼu, yuʼun lokʼ xaʼox batel li Jesuse, yuʼun oy epal krixchanoetik te. 14  Kʼalal kʼot xaʼox ta pasel taje, te taat ta templo yuʼun Jesus xchiʼuk xi albate: «Kʼelo avil, kolemot xa. Mu xa xapas amul, sventa mu xanuptan li kʼusi mas to vokole». 15  Vaʼun bat li vinike xchiʼuk laj yalbe judaetik ti jaʼ poxtaat yuʼun li Jesuse. 16  Jech oxal tskontrainik Jesus li judaetike, yuʼun ta Savado la spas li kʼusitik taje. 17  Pe xi takʼbatike: «Yakal-o ta abtel Jtot li avie, jech oxal yakalun-o ta abtel ek». 18  Ta skoj taje, li judaetike mas to jpʼel ta yoʼonton tskʼan tsmil yaʼiik, yuʼun maʼuk noʼox ti muʼyuk la xchabi li Savadoe, yuʼun chal xtok ti jaʼ Stot li Diose, ti tskoʼoltas sba xchiʼuk li Diose. 19  Jaʼ yuʼun xi takʼbatik yuʼun li Jesuse: «Chkalboxuk avaʼiik ta batsʼi melel: mu xuʼ yuʼun spasel jtosuk kʼusi ti chlokʼ ta yoʼonton stuk li Nichʼonile, jaʼ noʼox tspas li kʼusi chil tspas Totile. Yuʼun ti kʼusitik tspas Stuke jaʼ jech tspas ek li Nichʼonile. 20  Yuʼun kʼux chaʼi Nichʼonil li Totile xchiʼuk chakʼbe yil skotol li kʼusitik tspas stuke, xchiʼuk xtok mas to jelavem skʼoplal abtelal chakʼbe yil, jaʼ mu sta liʼe sventa chʼayal to avoʼonton chakʼotik yuʼun. 21  Yuʼun jech kʼuchaʼal tstoy likel xchiʼuk chakʼbe xkuxlejal animaetik li Totile, jaʼ jech ek li Nichʼonile chakʼbe xkuxlejal ti buchʼu tskʼan chakʼbee. 22  Li Totile muʼyuk buchʼu chchapan, yuʼun jaʼ yakʼojbe ta yok skʼob Nichʼonil xchapanel skotol 23  sventa xichʼik ta mukʼ skotolik li Nichʼonil jech kʼuchaʼal chichʼik ta mukʼ li Totile. Li buchʼu muʼyuk chichʼ ta mukʼ li Nichʼonile muʼyuk chichʼ ta mukʼ xtok li Totil ti jaʼ la stak tal li Nichʼonile. 24  Chkalboxuk avaʼiik ta batsʼi melel: tsta xkuxlejal sbatel osil li buchʼu chaʼi kʼusi chkale xchiʼuk ti chakʼ xchʼunel yoʼonton ta stojolal li Buchʼu la stakun tale, jech xtok muʼyuk chichʼ chapanel, yuʼun kom xa yuʼun li lajelale, jelav xa ta kuxlejal. 25  »Chkalboxuk avaʼiik ta batsʼi melel: chkʼot yorail, jaʼ xa yorail ti chaʼibeik yechʼomal ye Xnichʼon Dios li animaetike, vaʼun chkuxiik li buchʼutik tstsʼet chikintaik kʼusi chale. 26  Yuʼun jech kʼuchaʼal oy xkuxlejal stuk li Totile, jaʼ jech yakʼojbe ti oyuk xkuxlejal stuk ek li Nichʼonile. 27  Jech xtok yakʼojbe yabtel sventa xchapanvan, yuʼun jaʼ li Xnichʼon krixchanoe. 28  Mu me chʼayaluk to avoʼontonik xkʼot yuʼun taje, yuʼun chkʼot yorail ti skotol li buchʼutik oy ta smukinalike* chaʼibeik yechʼomal ye, 29  vaʼun chlokʼik tal, chchaʼkuxiik sventa kuxlejal li buchʼutik lek kʼusitik la spasike xchiʼuk chchaʼkuxiik sventa chapanel li buchʼutik toj chopol kʼusitik la spasike. 30  Mu xuʼ kuʼun spasel jtosuk kʼusi ti chlokʼ ta koʼonton jtuke. Yuʼun jech kʼuchaʼal chkaʼie, jaʼ jech chichapanvan xchiʼuk tukʼ chichapanvan, yuʼun maʼuk ta jsaʼ li kʼusi tskʼan koʼonton jtuke, jaʼ li kʼusi tskʼan yoʼonton li buchʼu la stakun tale. 31  »Ti voʼonuk noʼox chkalbe jba jkʼoplal jtuke, mu meleluk li kʼusi chkale. 32  Oy yan ti buchʼu chalbun jkʼoplale xchiʼuk jnaʼoj ti melel li jkʼoplal chale. 33  Li voʼoxuke la atakik batel viniketik ta stojolal Juan, vaʼun laj yalbe skʼoplal li kʼusi melele. 34  Akʼo mi jech, li voʼone mu jchʼam li kʼusi chichʼ alel ti likem tal ta stojolal krixchanoetike, pe sventa chakolike chkalboxuk avaʼiik li kʼusitik taje. 35  Li vinik taje kʼot ta jun kantil ti tsanale xchiʼuk ti laj yakʼ xojobale, vaʼun oy ta avoʼontonik ti lamuyubajik tajek yuʼun kʼuk sjalil li slusale. 36  Pe oy kʼusi mas tsotsik skʼoplal chkal, ti jaʼ mu sta li Juane, yuʼun li abtelaletik laj yakʼbun jpas Jtot xchiʼuk li abtelaletik ta jpas jtuke, jaʼ chakʼ ta ilel ti jaʼ la stakun tal li Totile. 37  Jech xtok, laj yal jkʼoplal ek li Totil ti buchʼu la stakun tale. Mi jaʼuk bu avaʼiojbeik yechʼomal ye junuk velta xchiʼuk mi jaʼuk bu avilojik kʼu yelan spat xokon 38  xchiʼuk muʼyuk bu te oy-o ta atojolalik li skʼope, yuʼun muʼyuk laj avakʼ xchʼunel avoʼontonik ta stojolal ti buchʼu la stak tale. 39  »Chakʼelbeik tajek lek smelolal li Tsʼibetike,* yuʼun chanopik ti jaʼ chata-o akuxlejalike; pe jaʼ li kʼusi chalbun jkʼoplal ta melele. 40  Akʼo mi jech, mu xakʼan xatalik ta jtojolal sventa xata akuxlejalik. 41  Mu jkʼan ti stoyik jkʼoplal li krixchanoetike, 42  pe jnaʼoj lek ti muʼyuk ta avoʼonton chakʼanik li Diose. 43  Ta sbi Jtot talemun, pe mu xachʼamikun. Pe mi yan-o buchʼu chtal ta smantal stuke jaʼ chachʼamik. 44  ¿Kʼuxi xa noʼox chachʼunik ti jaʼ noʼox chatoybe aba akʼoplalik ta jujuntale, ti maʼuk chasaʼik ti stoy akʼoplalik li jun noʼox Diose? 45  Mu xanopik ti ta jtikʼ amulik ta stojolal Totile; yuʼun oy buchʼu tstikʼ amulik, jaʼ li Moisese, jaʼ li buchʼu apatoj avoʼontonik ta stojolale. 46  Ta melel, ti avakʼojuk xchʼunel avoʼontonik ta stojolal Moisese, chavakʼ xchʼunel avoʼontonik ta jtojolal ek ti jechuke, yuʼun jaʼ la stsʼibabun jkʼoplal. 47  Pe mi mu xachʼunik li kʼusitik la stsʼibae, ¿kʼuxi xa noʼox chachʼunik li kʼusi chkale?».

Tsʼibetik ta yok vun

Kʼelo glosario.
O: «metsajtik»; «mochajtik»; «taʼajtik».
Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
O: «akamiyae».
O: «skʼakʼalil kuxob oʼontonal». Kʼelo glosario.
O: «mukinaletik ti chtun sventa svulesobil ta jolile». Kʼelo glosario.
Kʼelo glosario.