Kʼelo li kʼusi yichʼoje

Batan ta saʼobil

Juan 2:1-25

LI KʼUSITIK YICHʼOJE

  • Skʼinal nupunel ta Kana. Laj yichʼ kʼatajesel ta vino li voʼe (1-12)

  • La xchʼuba templo li Jesuse (13-22)

  • Xojtikin skotol kʼusitik oy ta yoʼonton krixchanoetik li Jesuse (23-25)

2  Jech xtok li ta yoxibal kʼakʼale, la spasbeik skʼinal nupunel ta Kana ta Galilea, te oy li smeʼ Jesuse.  Takbilik ta ikʼel ta skʼinal nupunel ek li Jesus xchiʼuk li yajchankʼoptake.  Kʼalal laj li vinoe, xi albat yuʼun smeʼ li Jesuse: «Chʼabal xa svinoik».  Pe xi la stakʼbe smeʼ li Jesuse: «Ants, ¿kʼusi jventa-o xchiʼuk kʼusi aventa-o ek?* Muʼyuk to bu kʼotem korail».  Xi albatik yuʼun smeʼ Jesus li jtuneletike: «Pasik skotol li kʼusitik chalboxuke».  Vaʼun, oy te vakpʼej yav voʼ ti pasbil ta tone, jech onoʼox kʼuchaʼal nopem xaʼiik li judaetik sventa tsakubtas sbaike, li jujupʼej yav voʼ taje te van chaʼpʼisuk o oxpʼisuk* yaʼlel yichʼoj.  Xi albatik yuʼun li Jesuse: «Nojesik li yav voʼe». Vaʼun xjaxet kʼalal to ta stiʼil la snojesik.  Te une xi albatike: «Lupik lokʼel jutukuk, bat akʼbeik li buchʼu sbainoj kʼine». Vaʼun bat yakʼbeik.  Kʼalal la spas preva li voʼ ti kʼatajesbil xa ta vino li buchʼu sbainoj kʼine mi jaʼuk snaʼ bu lokʼ tal (pe li jtuneletike snaʼojik ti voʼ la slupik tale), te une la stak ta ikʼel jnupunel li buchʼu sbainoj kʼine, 10  vaʼun xi laj yalbee: «Skotol li yan krixchanoetike jaʼ baʼyel chakʼ ta uchʼel li lekil vinoe, pe kʼalal chyakubik xae jaʼ to chakʼ ta uchʼel li vino ti bu mu masuk leke. Pe li voʼote jaʼ to chavakʼ ta uchʼel avi li lekil vinoe». 11  Taje te ta Kana ta Galilea la spas kʼuchaʼal slikebal senyailtak* li Jesuse xchiʼuk laj yakʼ ta ilel smukʼulal; vaʼun li yajchankʼoptake laj yakʼ xchʼunel yoʼontonik ta stojolal. 12  Kʼalal kʼot xaʼox ta pasel taje, yal batel ta Kapernaum xchiʼuk li smeʼe, li yitsʼinabe xchiʼuk li yajchankʼoptake, pe jayib noʼox kʼakʼal te jalijik. 13  Vaʼun jutuk xaʼox skʼan li kʼin Koltael* yuʼun judaetike, jech oxal muy batel ta Jerusalen li Jesuse. 14  Te la sta ta templo* li jchonvakaxetike, li jchonchijetike, li jchonpalomaetike xchiʼuk te chotajtik la sta li jvokʼtakʼinetike. 15  Vaʼun kʼalal laj xaʼox stsʼot jlik chʼojone, la snuts lokʼel ta templo skotol li krixchanoetik xchiʼuk li xchijike xchiʼuk li xvakaxike, jech xtok la stanibe* stakʼin li jeltakʼinetike xchiʼuk la svalkʼunbe li xmexaike. 16  Xi laj yalbe li jchonpalomaetike: «¡Lokʼesik batel skotol li kʼusitik liʼe! ¡Mu xapasik ta chʼivit li sna Jtote!». 17  Vul ta sjol yajchankʼoptak ti xi onoʼox tsʼibabile: «Jaʼ tstsan-o koʼonton yuʼun ti oy tajek ta koʼonton li anae». 18  Vaʼun xi albat yuʼun li judaetike: «¿Kʼusi senyail xuʼ xavakʼ kilkutik ta skoj ti jech chapase?». 19  Vaʼun xi takʼbatik yuʼun li Jesuse: «Jinesik li templo liʼe, vaʼun ta oxib noʼox kʼakʼal ta jvaʼan». 20  Jech oxal xi la stakʼ li judaetike: «Laj yichʼ 46 jabil yoʼ xvaʼi li templo liʼe, ¿kʼuxi xa noʼox ti ta oxib noʼox kʼakʼal chavaʼan li voʼote?». 21  Pe li templo chalbe skʼoplale jaʼ skʼoplal li sbekʼtale. 22  Pe kʼalal chaʼkuxi* xaʼoxe, li yajchankʼoptake vul ta sjolik ti jech onoʼox nopem xaʼi chal taje, jech oxal la xchʼunik li kʼusi chal tsʼibetike xchiʼuk li kʼusi laj yal Jesuse. 23  Pe kʼalal ay ta Jerusalen ta kʼin Koltaele, li ta kʼin taje, ep laj yakʼ xchʼunel yoʼontonik ta stojolal* kʼalal laj yilik li senyailtak la spase. 24  Pe muʼyuk bu spatoj yoʼonton Jesus ta stojolal li krixchanoetik taje, yuʼun xojtikinan skotolik 25  xchiʼuk mu persauk buchʼu x-albat kʼu yelan li krixchanoetike, yuʼun xojtikin skotol li kʼusitik oy ta yoʼonton li krixchanoetike.

Tsʼibetik ta yok vun

S.gr.: «¿Kʼusi li voʼone xchiʼuk kʼusi li voʼote ants?». Jaʼ jpʼel kʼop ti chakʼ ta aʼiel ti mu lekuk chichʼ aʼiel li kʼusi chichʼ jakʼele. Kʼalal «ants», xie, maʼuk skʼan xal ti muʼyuk bu ichʼbil ta mukʼe.
Te van 44 kʼalal 66 litrouk yaʼlel li jujupʼej yav voʼ taje.
Kʼelo glosario.
Kʼelo glosario.
Kʼelo glosario.
O: «stakibe»; «stenbe».
Kʼelo glosario.
O: «ta sbi».