Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Juan 18:1-40

LI KʼUSITIK YICHʼOJE

  • Chakʼ ta kʼabal Jesus li Judase (1-9)

  • La snit lokʼel yespada li Pedroe (10, 11)

  • Laj yikʼik batel ta stojolal Anas li Jesuse (12-14)

  • Baʼyel velta pʼajvan li Pedroe (15-18)

  • Te oy ta stojolal Anas li Jesuse (19-24)

  • Xchibal xchiʼuk yoxibal velta pʼajvan li Pedroe (25-27)

  • Te oy ta stojolal Pilato li Jesuse (28-40)

    • «Maʼuk sventa balumil li Ajvalilal kuʼune» (36)

18  Kʼalal laj xaʼox yal Jesus li kʼusitik taje, jelav batel ta jot Ukʼum Sedron xchiʼuk li yajchankʼoptake, jaʼ te ti bu oy jsep nichimaltike, vaʼun te ochik batel xchiʼuk li yajchankʼoptake.  Vaʼun li Judas ti ch-akʼvan ta kʼabale, yiloj bu xkom li nichimaltik eke, yuʼun te onoʼox ta xkʼot stsobilan sbaik xchiʼuk yajchankʼoptak li Jesuse.  Jaʼ yuʼun li Judase laj yikʼ batel jtsop soltaroetik xchiʼuk li yaj-abteltakik bankilal paleetik xchiʼuk jfariseoetike, te yichʼoj kʼotel skʼokʼik, skantilik xchiʼuk yabtejebik.  Ta skoj ti snaʼoj skotol kʼusitik tsnuptan li Jesuse, bat snup ta be xchiʼuk xi laj yale: «¿Buchʼu chasaʼik?».  Xi la stakʼbeike: «Jaʼ li Jnasaretal Jesuse». Xi takʼbatike: «Voʼon maʼ taje». Te oy li Judas eke, jaʼ li j-akʼvanej ta kʼabale.  Pe kʼalal xi laj yal li Jesuse: «Voʼon maʼ taje», valopat sutik xchiʼuk yalik ta lum.  Jaʼ yuʼun xi la sjakʼ yan veltae: «¿Buchʼu chasaʼik?». Xi la stakʼbeike: «Jaʼ li Jnasaretal Jesuse».  Xi la stakʼ li Jesuse: «Laj kalboxuk ti voʼone. Jaʼ yuʼun mi voʼon chasaʼikune, akʼo batikuk li viniketik liʼe».  Taje jaʼ sventa ta xkʼot ta pasel li kʼusi xi onoʼox yaloje: «Mi junuk buchʼu chʼay kuʼun ti jayvoʼ laj avakʼbune». 10  Vaʼun li Simon Pedro ti yichʼoj batel yespadae, la snit lokʼel, la syayijesbe smoso li mero bankilal palee, yuʼun la xtuchʼbe sbatsʼichikin. Malko sbi li mosoil taje. 11  Pe xi laj yalbe Pedro li Jesuse: «Tikʼo ochel ta sna li avespadae. ¿Mi mu skʼanuk chkuchʼbe sbel xanaʼ li kopa* ti yakʼojbun Jtote?». 12  Vaʼun li soltaroetike, li komandante yuʼun soltaroetik* xchiʼuk li yaj-abteltak judaetike la stsakik li Jesuse xchiʼuk la xchukik. 13  Baʼyel laj yikʼik batel ta stojolal Anas, yuʼun jaʼ li smolniʼ* Kaifas ti jaʼo ochem ta mero bankilal pale li vaʼ jabile. 14  Jaʼ onoʼox li Kaifas ti laj yalbe judaetik ti jaʼ tstabeik mas sbalil mi cham jun vinik ta sventa li jteklume. 15  Vaʼun te tijil batel ta spat Jesus li Simon Pedroe xchiʼuk te tijil batel yan jchankʼop. Taje x-ojtikinat yuʼun li mero bankilal palee, te koʼol och batel xchiʼuk Jesus ta yamakʼ* li mero bankilal palee, 16  pe li Pedroe te vaʼal kom ta pana, ta tiʼ na. Jaʼ yuʼun lokʼ tal li yan jchankʼope, jaʼ li buchʼu x-ojtikinat yuʼun li mero bankilal palee, lokʼ skʼopon jchabitiʼna yoʼ xuʼ x-och batel ek li Pedroe. 17  Vaʼun li kiara ti te chchabi tiʼ nae, xi laj yalbe li Pedroe: «Jaʼ yajchankʼopot ek li vinik leʼe, ¿mi mu jechuk?». Xi takʼave: «Maʼukun». 18  Jech xtok te vaʼajtik li mosoiletik xchiʼuk li j-abteletik ta stsʼel akʼal ti stsanojike, yuʼun oy sik, jech oxal te chkʼatinik. Te vaʼal chkʼatin ek li Pedroe. 19  Jaʼ yuʼun li bankilal palee oy kʼusitik la sjakʼbe Jesus ta sventa li yajchankʼoptake xchiʼuk ta sventa li chanubtasel chakʼe. 20  Xi takʼbat yuʼun li Jesuse: «Ta sba ta sat la jkʼopon li krixchanoetike. Te onoʼox lichanubtasvan ta nail tsobobbail xchiʼuk ta templo, jaʼ ti bu tstsob sbaik skotol li judaetike, muʼyuk kʼusi laj kal ta mukul. 21  ¿Kʼu yuʼun ti voʼon chajakʼbune? Jaʼ jakʼbo li buchʼutik laj yaʼiik li kʼusi laj kale. ¡Kʼelo avil! Jaʼ snaʼojik li kʼusi laj kale». 22  Kʼalal laj yal li kʼusitik taje, oy jun j-abtel ti te nopol vaʼale, la xtʼaxbe majel ta sat li Jesuse xchiʼuk xi laj yalbee: «¿Mi jaʼ jech chatakʼbe li bankilal palee?». 23  Xi la stakʼ li Jesuse: «Mi oy kʼusi chopol laj kale, albun ti kʼusi chopol laj kale; pe mi lek li kʼusi laj kale, ¿kʼu yuʼun ti chamajune?». 24  Vaʼun li Anase chukul la stak batel ta stojolal Kaifas ti jaʼ li mero bankilal palee. 25  Kʼalal te vaʼal chkʼatin li Simon Pedroe, xi albate: «Jaʼ yajchankʼopot ek, ¿mi mu jechuk?». Laj yal ti mu xojtikine xchiʼuk xi laj yale: «Maʼukun». 26  Oy te jun smoso li mero bankilal palee, jaʼ yutsʼ yalal li vinik ti tuchʼbat xchikin yuʼun Pedroe, xi laj yale: «¿Mi mu voʼotukot ti laj kilot ta nichimaltik xchiʼuk li vinik leʼe?». 27  Pe laj yal yan velta ti mu xojtikine, te une jaʼo okʼ jkot kots.* 28  Vaʼun laj yikʼik lokʼel ti bu oy Kaifas li Jesuse, laj yikʼik batel ta sna ajvalil. Sob to tajek. Pe li stukike muʼyuk bu ochik li ta sna ajvalile yoʼ mu sokes sbaik, sventa xuʼ tslajesik li veʼlil sventa kʼin Koltaele. 29  Jaʼ yuʼun lokʼ kʼelatikuk yuʼun li Pilatoe xchiʼuk xi albatike: «¿Kʼusi smul avuʼunik li vinik liʼe?». 30  Xi la stakʼbeike: «Ti maʼukuk jpaschoplejale muʼyuk bu tal kakʼkutik ta atojolal ti jechuke». 31  Jech oxal xi albatik yuʼun li Pilatoe: «Ikʼik batel, bat chapano atukik kʼuchaʼal chal li mantal avuʼunike». Xi la stakʼ li judaetike: «Mu stakʼ ximilvankutik maʼ voʼonkutike». 32  Taje jaʼ sventa chkʼot ta pasel li kʼusi yaloj Jesus ta sventa ti kʼu yelan poʼot xa ta xchame. 33  Vaʼun li ajvalil Pilatoe och batel yan velta ta sna, laj yikʼ tal li Jesuse xchiʼuk xi laj yalbee: «¿Mi voʼot Ajvalilot yuʼun li judaetike?». 34  Xi la stakʼ li Jesuse: «¿Mi voʼot lokʼ ta avoʼonton atuk ti jech chajakʼbune, o mi yuʼun oy buchʼutik jech chalik avaʼi?». 35  Xi la stakʼ li Pilatoe: «¿Mi yuʼun judaun chavil? Jaʼ laj yikʼoxuk tal ta jtojolal li alumale xchiʼuk li bankilal paleetike. ¿Kʼusi la apas?». 36  Xi la stakʼ li Jesuse: «Maʼuk sventa balumil li Ajvalilal kuʼune. Ti jaʼuk sventa balumile la spasik kʼop jechuk li kajtuneltake, sventa muʼyuk xkichʼ akʼel jechuk ta stojolal li judaetike. Pe jech kʼuchaʼal laj kalbote, maʼuk liʼ likem li Ajvalilal kuʼune». 37  Jech oxal xi albat yuʼun li Pilatoe: «Vaʼun chaʼa, ¿mi ajvalilot?». Xi la stakʼbee: «Voʼot laj aval atuk ti ajvalilune». Jaʼ ta skoj ti livokʼe* xchiʼuk jaʼ ta skoj ti lital ta balumile, sventa chkalbe skʼoplal li kʼusi melele. Ta me xaʼi kʼusi chkal skotol li buchʼutik te oy ta stojolal li kʼusi melele». 38  Xi albat yuʼun li Pilatoe: «¿Kʼusi jaʼ li melele?». Kʼalal laj xaʼox yal taje, lokʼ skʼel yan velta li judaetike xchiʼuk xi laj yale: «Muʼyuk bu la jtabe jsetʼuk spaltail. 39  Jech xtok, nopem onoʼox xavaʼiik ti ta jkoltaboxuk lokʼel junuk jchukel li ta kʼin Koltaele. Vaʼun chaʼa, ¿mi jaʼ chakʼanik ta jkoltaboxuk lokʼel li Ajvalil yuʼun judaetike?». 40  Xi tsots avanik yan veltae: «¡Maʼuk xakolta li vinik leʼe, jaʼ koltao li Barrabase!». Pe li Barrabase jaʼ jun j-elekʼ.

Tsʼibetik ta yok vun

Li kopae jaʼ skʼan xal ti jaʼ jech la skʼan Dios ti akʼo xcham Jesus ta skoj ti pakʼtaat ta jchopolkʼoptavaneje.
Jaʼ li buchʼu sbainoj o ti tspas ta mantal jmil soltaroe.
O: «smuniʼ»; «sniʼmol».
Kʼelo glosario.
O: «kelem»; «totorin».
O: «li-ayane».