Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Juan 16:1-33

LI KʼUSITIK YICHʼOJE

  • Yikʼaluk van xlajik ta milel li yajchankʼoptak Jesuse (1-4 sbavokʼal)

  • Ti kʼusi yabtel li chʼul espiritue (4 xchaʼvokʼal kʼalal ta 16)

  • Chkʼataj ta xkuxetel oʼontonal li yatel yoʼonton jchankʼopetike (17-24)

  • Tsal yuʼun balumil li Jesuse (25-33)

16  »Ti jech laj kalboxuke jaʼ sventa mu xavichʼ makbel avokik.  Chavichʼik nutsel lokʼel li ta nail tsobobbaile. Jech onoʼox ta melel, chkʼot skʼakʼalil ti skotol li buchʼutik tsmiloxuke tsnopik ti tspasik chʼul abtelal* ta stojolal Diose.  Pe ti jech tspasike jaʼ ta skoj ti mu xojtikinik li Totile xchiʼuk ti mu xojtikinikun eke.  Pe ti jech laj kalboxuke, jaʼ sventa chvul ta ajolik ti jech xa onoʼox laj kalboxuk kʼalal mi kʼot yoraile. »Li kʼusitik taje muʼyuk laj kalboxuk ta slikebal, yuʼun liʼ toʼox jchiʼinojoxuke.  Yan li avie chisut batel ta stojolal li Buchʼu la stakun tale, akʼo mi jech, mi junuk buchʼu xi tsjakʼbun avuʼunike: ‹¿Bu chabat?›.  Pe ta skoj ti jech laj kalboxuke naka at-oʼonton batem ta avoʼontonik.  Akʼo mi jech, xi chkalboxuk avaʼiik ta melele: jaʼ sventa alekilalik ti chibate. Yuʼun mi muʼyuk bu chibate, muʼyuk bu chtal ta atojolalik li jkoltavaneje, pe mi libate ta jtakboxuk tal maʼ taje.  Vaʼun kʼalal mi vul taje, jamal chakʼbe snaʼ krixchanoetik ta sventa li smulike, ta sventa li tukʼilale xchiʼuk ta sventa li chapanele:  jaʼ baʼyel chakʼbe snaʼ smul li krixchanoetike, yuʼun muʼyuk bu yakal chakʼ xchʼunel yoʼontonik ta jtojolal; 10  mi laj une jaʼ ta sventa li tukʼilale, yuʼun chibat ti bu oy li Totile, vaʼun muʼyuk xa bu chavilikun; 11  ta slajeb une jaʼ ta sventa li chapanele, yuʼun yichʼoj xa chapanel li ajvalil ta balumil liʼe. 12  »Oy to ep kʼusitik ta jkʼan chkalboxuk, pe mu stsʼik avuʼunik li avie. 13  Pe mi vul li jkoltavaneje, li chʼul espiritu ti chakʼ ta naʼel li kʼusi melele, jaʼ tsbeiltasoxuk batel ta skotol li kʼusi melele, yuʼun maʼuk chal li kʼusi chlokʼ ta yoʼonton stuke, jaʼ chal li kʼusitik chaʼie, vaʼun jaʼ chalboxuk skʼoplal li kʼusitik chtale. 14  Jaʼ tstoybun jkʼoplal maʼ taje, yuʼun jaʼ chalboxuk li kʼusi chaʼi ta jtojolale. 15  Jaʼ kuʼun skotol li kʼusi oy yuʼun li Totile. Jaʼ yuʼun laj kalboxuk ti jaʼ chalboxuk li kʼusi chaʼi ta jtojolal li chʼul espiritue. 16  Mu xa jaluk skʼan ti muʼyuk xa chavilikune, pe jech xtok, mu xa jaluk skʼan ti chavilikune». 17  Jech oxal xi lik yalbe sbaik jayvoʼuk yajchankʼoptake: «¿Kʼusi smelolal ti xi chalbutike: ‹Mu xa jaluk skʼan ti muʼyuk chavilikune, pe jech xtok, mu xa jaluk skʼan ti chavilikune› xchiʼuk ti ‹yuʼun chibat ti bu oy li Totile›?». 18  Jech oxal xi chalilanike: «¿Kʼusi smelolal ti xi chale ‹mu xa jaluk skʼan›, ti xie? Mu jnaʼtik kʼusi chalbe skʼoplal». 19  Li Jesuse laj yakʼ venta ti oy kʼusi tskʼan tsjakʼik li yajchankʼoptake, jaʼ yuʼun xi laj yale: «¿Yakal van chajakʼilanbe abaik ta skoj ti xi laj kale: ‹Mu xa jaluk skʼan ti muʼyuk chavilikune, pe jech xtok, mu xa jaluk skʼan ti chavilikune›? 20  Chkalboxuk avaʼiik ta batsʼi melel: cha-okʼik xchiʼuk xa-avetik ta at-oʼonton, yan li krixchanoetike xkuxet noʼox yoʼontonik;* akʼo mi chavat avoʼontonik, pe chkʼataj ta xkuxetel oʼontonal li yatel avoʼontonike. 21  Kʼalal yakal ch-alaj li antse oy svokol, yuʼun kʼot xa yorail ch-alaj; pe kʼalal vokʼem* xaʼox yuʼun li uni olole, mu xa xvul ta sjol li stsatsal vokol la snuptane, yuʼun xkuxet yoʼonton ti vokʼ xa yuʼun jun neneʼ ta balumile. 22  Jaʼ jech li voʼoxuk eke, oy avokolik li avie; pe chkiloxuk yan velta, vaʼun xkuxet xa avoʼontonik xchiʼuk muʼyuk buchʼu tspojboxuk li xkuxetel avoʼontonike. 23  Li vaʼ kʼakʼale muʼyuk kʼusi chajakʼbeikun ta jyalel. Chkalboxuk avaʼiik ta batsʼi melel: kʼusiuk noʼox ti chakʼanbeik li Totile, jaʼ chakʼboxuk ta jbi. 24  Li avie muʼyuk to kʼusi akʼanojik ta jbi. Kʼanik, vaʼun chavichʼik akʼbel sventa xkuxet-o avoʼontonik ta j-echʼel. 25  »Li kʼusitik laj kalboxuke naka ta skoʼoltasobil laj kalboxuk. Chkʼot yorail ti muʼyuk xa ta jtunes skoʼoltasobil kʼalal ta jkʼoponoxuke, yuʼun lek jamal chkalboxuk skʼoplal li Totile. 26  Li vaʼ kʼakʼale ta jbi chakʼanbeik vokol li Totile; kʼalal jech chkale maʼuk skʼan xal ti voʼon ta jkʼan vokol ta atojolalike. 27  Kʼux chaʼioxuk li Totile, yuʼun kʼux chavaʼiikun xchiʼuk achʼunojik ti talemun ta yajkʼopojel li Diose. 28  Te likemun tal ta stojolal Totil kʼuchaʼal yajkʼopojel ti liyal tal ta balumile. Li avi une chkikta komel li balumile xchiʼuk chibat ta stojolal li Totile». 29  Xi laj yal li yajchankʼoptake: «¡Laj avil chaʼa! Jamal xa chakʼopoj maʼ avie, muʼyuk xa bu chatunes mi junuk skoʼoltasobil. 30  Tanae jnaʼojkutik xa ti xanaʼ skotole xchiʼuk ti mu persauk buchʼu kʼusi tsjakʼbote. Ta skoj taje ta jchʼunkutik ti likemot tal ta stojolal li Diose». 31  Xi takʼbatik yuʼun li Jesuse: «¿Mi chachʼunik un li avie? 32  ¡Kʼelo avilik! Chkʼot yorail, ta melel kʼot xa yorail ti chavichʼik pukel batel ta jujuntal ta anaike xchiʼuk ti jtuk chaviktaikune. Pe mu jtukuk chikom, yuʼun liʼ xchiʼinojun li Totile. 33  Jaʼ jech laj kalboxuk sventa junuk avoʼontonik ta jtojolal. Chavil tsots avokolik liʼ ta balumile, pe ¡tsotsuk avoʼontonik!, jtsaloj xa li balumile».

Tsʼibetik ta yok vun

Kʼelo glosario.
O: «pʼij noʼox yoʼnik»; «nichim noʼox yoʼontonik».
O: «ayanem».