Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Juan 14:1-31

LI KʼUSITIK YICHʼOJE

  • Jaʼ noʼox stuk Jesus li be sventa xijnopaj ta stojolal Totile (1-14)

    • «Voʼon li beune, voʼon li melelune xchiʼuk voʼon li kuxlejalune» (6)

  • Jamal laj yal Jesus ta sventa li chʼul espiritue (15-31)

    • «Jaʼ mas mukʼ skʼoplal li Totile, jaʼ mu sta li voʼone» (28)

14  «Mu me xavat avoʼontonik.* Akʼo xchʼunel avoʼontonik ta stojolal Dios xchiʼuk akʼo xchʼunel avoʼontonik ta jtojolal ek.  Oy ep avilal bu stakʼ xijnaki li ta sna Jtote. Ti yuʼun muʼyukuke laj kalboxuk ti jechuke, yuʼun chbat jchapan avavilik.  Jech xtok, kʼalal mi la jtam batel jbe sventa chbat jchapanboxuk avavilike, chisut tal yan velta, vaʼun ta jchʼamoxuk jtuk li ta nae, yuʼun jech teuk oyoxuk ek ti bu oyune.  Xanabeik sbelel ti bu chibate.»  Xi albat yuʼun li Tomase: «Kajval, mu jnaʼkutik bu chabat. ¿Kʼuxi xa noʼox ta jnaʼkutik bu li sbelele?».  Xi albat yuʼun li Jesuse: «Voʼon li beune, voʼon li melelune xchiʼuk voʼon li kuxlejalune. Muʼyuk buchʼu xuʼ xtal ta stojolal li Totile, jaʼ noʼox ta jventa.  Ti lajuk avojtikinikune, laj avojtikinik jechuk ek li Jtote. Liʼ ta ora xchiʼuk ta jelavele xavojtikinik xa xchiʼuk avilojik xa».  Xi albat yuʼun li Felipee: «Kajval, akʼbun kilkutik li Totile, vaʼun muʼyuk xa kʼusi mas ta jkʼankutik».  Xi albat yuʼun li Jesuse: «Jal xa tajek ti liʼ jchiʼinojoxuke, Felipe, akʼo mi jech, ¿mi mu to van xavojtikinun? Yuʼun yiloj xa Totil ek li buchʼu yilojune. ¿Kʼuxi xa noʼox ti xi chavale: ‹Akʼbun kilkutik li Totile›? 10  ¿Mi mu xachʼun ti oyun ta stojolal li Totile xchiʼuk ti oy ta jtojolal ek li Totile? Maʼuk chlokʼ ta koʼonton jtuk li kʼusitik chkalboxuke; yuʼun jaʼ yakal tspas yabtel li Totil ti oy ta jtojolale. 11  Chʼunbeikun ti oyun ta stojolal li Totile xchiʼuk ti oy ta jtojolal ek li Totile; o mi moʼoje, chʼunik ta skoj li abtelaletik ta jpase. 12  Chkalboxuk avaʼiik ta batsʼi melel ti buchʼu chakʼ xchʼunel yoʼonton ta jtojolale, jaʼ jech abtelal tspas kʼuchaʼal ta jpase; xchiʼuk mas to mukʼ abtelal tspas, jaʼ xkom to liʼe, yuʼun ta jtam batel jbe ta stojolal li Totile. 13  Jech xtok, chkakʼboxuk skotol li kʼusitik chakʼanik ta jbie, sventa jech xichʼ toybel skʼoplal ta stojolal Nichʼonil li Totile. 14  Kʼusiuk noʼox ti chakʼanik ta jbie chkakʼboxuk. 15  »Mi akʼanojikune, chachʼunik li jmantaltake. 16  Vaʼun ta jkʼanbe Totil ti akʼo yakʼboxuk yan jkoltavanej ti te oy-o ta atojolalik sbatel osile, 17  jaʼ li chʼul espiritu ti chakʼ ta naʼel li kʼusi melele, jaʼ li kʼusi muʼyuk chichʼ li krixchanoetike, yuʼun mi jaʼuk xilik xchiʼuk mi jaʼuk xojtikinik. Yan li voʼoxuke xavojtikinik, yuʼun te oy ta atojolalik xchiʼuk te chkom-o ta atojolalik. 18  Muʼyuk bu abol aba* chakomik kuʼun. Chtal jkʼeloxuk. 19  Mu xa bu jal chilun li krixchanoetike, yan li voʼoxuke chavilikun, yuʼun kuxulun xchiʼuk chakuxiik ek. 20  Li vaʼ kʼakʼale chanaʼik ti jmoj oyun xchiʼuk li Jtote xchiʼuk ti jmoj oyoxuk ta jtojolale, vaʼun jmoj oyun ta atojolalik ek. 21  Jaʼ skʼanojun li buchʼu xchʼamoj li jmantaltak xchiʼuk ti chchʼune. Jech xtok, chkʼanat yuʼun Jtot li buchʼu skʼanojune, vaʼun ta jkʼan ek xchiʼuk jamal chkakʼ jba ta ilel ta stojolal». 22  Xi albat yuʼun li Judase, pe maʼuk li Iskariotee: «Kajval, ¿kʼu yuʼun ti jamal chavakʼ aba ta ilel ta jtojolalkutik ta tsʼakale, ti jaʼ muʼyuk ta stojolal li krixchanoetike?». 23  Xi takʼbat yuʼun li Jesuse: «Mi oy buchʼu skʼanojune, chchʼun li kʼusi chkale, vaʼun chkʼanat yuʼun li Jtote, vaʼun chtal jchiʼinkutik xchiʼuk ta jchiʼinkutik ta naklej. 24  Muʼyuk skʼanojun li buchʼu muʼyuk chchʼun kʼusi chkale. Maʼuk kuʼun li kʼusi chkal avaʼiike, jaʼ yuʼun li Totil ti la stakun tale. 25  »Jech ta xkalboxuk li kʼusitike, yoʼ to liʼ jchiʼinojoxuke. 26  Pe li jkoltavanej ti jaʼ li chʼul espiritue, ti jaʼ tstak tal ta jbi li Totile, jaʼ chchanubtasoxuk skotol xchiʼuk jaʼ tsvules ta ajolik skotol li kʼusi kalojboxuke. 27  Chkakʼboxuk komel li jun oʼontonale; chkakʼboxuk li jun oʼontonal kuʼune. Maʼuk jech chkakʼboxuk jech kʼuchaʼal chakʼ li krixchanoetike. Mu me xavat avoʼontonik xchiʼuk mu me xa-alubik ta xiʼel. 28  Avaʼiojik ti xi laj kalboxuke: ‹Chibat xchiʼuk chisut tal yan velta ta atojolalik›. Ti yuʼunuk akʼanojikune xamuyubajik* jechuk ti chibat ta stojolal li Totile, yuʼun jaʼ mas mukʼ skʼoplal li Totile, jaʼ mu sta li voʼone. 29  Jaʼ yuʼun kalojboxuk xa avaʼiik yoʼ to muʼyuk kʼotem ta pasel taje, sventa xachʼunik mi kʼot ta pasele. 30  Muʼyuk xa bu ep ta jchiʼinoxuk ta loʼil, yuʼun chtal xa li ajvalil ta balumile, akʼo mi jech, muʼyuk bu sventainojun. 31  Pe sventa snaʼ krixchanoetik ti jkʼanoj li Totile, jaʼ jech yakal ta jpas ti kʼu yelan yalojbun mantal li Totile. Vaʼlanik, batik xa.

Tsʼibetik ta yok vun

Kʼelo glosario.
O: «maʼuk meʼon olol».
O: «pʼij avoʼnik»; «nichim avoʼontonik».