Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Galatas 6:1-18

LI KʼUSITIK YICHʼOJE

  • Kuchbo me aba avikatsik ta jujuntal (1-10)

    • Chichʼ tsobbel sat li kʼusi chichʼ tsʼunele (7, 8)

  • Muʼyuk sbalil li yichʼel sirkunsisione (11-16)

    • Li kʼusi achʼ pasbile (15)

  • Stsutseb loʼil (17, 18)

6  Ermanoetik, mi muʼyuk to yakʼoj venta ti chʼay ta be li jun vinike, li voʼoxuk ti lek yijoxuk ta mantale ta slekil me avoʼontonik xatukʼibtasik li vinik taje. Pe kʼelo me aba lek atukik, yuʼun me yikʼaluk xavichʼik akʼel ta preva ek.  Jech-o me xakuchbe aba avikatsik ta jujuntal, vaʼun jaʼ jech chkʼot ta pasel avuʼunik li smantal Kristoe.  Yuʼun mi oy buchʼu tsnop ti tsots skʼoplal chaʼi sba akʼo mi muʼyuk bu tsots skʼoplale, yakal tsloʼla sba stuk.  Pe ta jujuntal kʼelo abaik ta skoj li kʼusi chapasike, vaʼun oy srasonal sventa xkuxet noʼox avoʼontonik* ta atojolal atukik, maʼuk xamuyubajik ta skoj ti chakoʼoltas abaik xchiʼuk li yantike.  Yuʼun ta jujuntal chabainik li kʼusi chapas atukike.  Jech xtok, buchʼuuk noʼox ti chichʼ chanubtasel ta skʼop Diose, teuk me tsakal skʼoplal ta yakʼbel skotol kʼusitik lek li buchʼu laj yakʼ li chanubtasel taje.  Mu xaloʼla aba atukik: mu me stakʼ loʼlael li Diose. Yuʼun kʼusiuk noʼox ti yakal tstsʼun li jun krixchanoe jaʼ tstsobbe sat xtok;  yuʼun li buchʼu jaʼ noʼox yakal tstsʼun ta sventa sbekʼtale jaʼ tstsobbe sat ta sbekʼtal xtok li kʼusi snaʼ xkʼaʼe; pe li buchʼu jaʼ noʼox yakal tstsʼun ta sventa chʼul espiritue jaʼ tstsobbe sat li chʼul espiritue, ti jaʼ li kuxlejal sbatel osile.  Jaʼ yuʼun mu me xkikta jbatik ta spasel li kʼusitik toj leke, yuʼun mi muʼyuk lijlubtsaje ta jtsobbetik sat mi sta skʼakʼalile. 10  Jech oxal, yoʼ to xuʼ kuʼuntike jaʼ jpasbe jba jkotoltik li kʼusi leke, pe jaʼ mas tsots skʼoplal ti jech jpasbetik li buchʼutik koʼol xchʼunel koʼontontik jchiʼuktike. 11  Kʼelo avilik kʼu to smukʼtikil jletra la jtsʼibaboxuk tal ta jkʼob jtuk. 12  Skotol li buchʼutik lek skʼoplal tskʼan ch-ilatik ta sventa bekʼete* jaʼ li buchʼutik tsujoxuk ti akʼo xavichʼik sirkunsisione, ti jech tspasike jaʼ ta skoj ti mu skʼan xichʼik kontrainel ta sventa li jtel teʼ sventa vokolil* ti bu laj yichʼ jokʼanel li Kristoe. 13  Yuʼun mi jaʼuk bu tspasik kʼusi chal Mantal ek li buchʼutik chichʼik sirkunsisione, pe tskʼanik ti akʼo xavichʼik sirkunsision sventa oyuk srasonal ti xtoyetik xa chaʼi sbaik ta skoj li kʼusi laj avichʼ pasbel ta abekʼtalike. 14  Pe li voʼone mi jaʼuk bu xitoyet xa chkaʼi jba, jaʼ noʼox xitoyet xa chkaʼi jba yuʼun li jtel teʼ sventa vokolil ti bu laj yichʼ milel li Kajvaltik Jesukristoe, ti jaʼ ta sventa Jesukristo ti laj yichʼik jokʼanel ta jtel teʼ chkil li krixchanoetike, ti laj kichʼ jokʼanel ta jtel teʼ chilikun ek li krixchanoetike. 15  Yuʼun muʼyuk sbalil li yichʼel sirkunsisione xchiʼuk muʼyuk sbalil mi muʼyuk ichʼbil sirkunsisione, pe jaʼ oy sbalil li kʼusi achʼ pasbile. 16  Jech xtok, skotol li buchʼutik lek tspas batel stalelalik jech kʼuchaʼal li mantal sventa talelale, oyuk jun oʼontonal xchiʼuk oyuk kʼuxubinel ta stojolalik, jech, ta stojolal li Israel yuʼun Diose. 17  Pe liʼ ta ora xchiʼuk ta jelavele mu xa me buchʼu xakʼbun jvokol, yuʼun oy smarkail jbekʼtal ti chakʼ ta ilel ti smosoun Jesuse. 18  Ermanoetik, teuk me oy ta atojolalik li slekil yutsil yoʼonton Kajvaltik Jesus ta skoj ti lek chavakʼ ta ilel atalelalike. Jechuk.

Tsʼibetik ta yok vun

O: «pʼij noʼox avoʼnik»; «nichim noʼox avoʼontonik».
O: «li buchʼutik lek skʼoplal tskʼan ch-ilatik ta spat xokonike».
Kʼelo glosario.