Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Galatas 5:1-26

LI KʼUSITIK YICHʼOJE

  • Kolelal ta skoj Kristo (1-15)

  • Xanavanik-o ta stojolal chʼul espiritu (16-26)

    • Yabtel jbekʼtaltik (19-21)

    • Talelaletik chakʼ chʼul espiritu (22, 23)

5  Ta sventa li kolelal taje la skoltautik li Kristoe. Jech oxal chaʼa, staojuk-o me yav avoʼontonik xchiʼuk mu me xatikʼ abaik ta mosoil yan velta.  ¡Kʼelo avilik! Voʼon Pabloun, chkalboxuk ti muʼyuk me stu chkʼot avuʼunik Kristo mi chavichʼik sirkunsisione.  Jech xtok, chkal yan velta ti persa skʼan xchʼun skotol Mantal li buchʼu chichʼ sirkunsisione.  Voʼot ti chakʼan tukʼ xa akʼoplal ta stojolal li mantale chʼakalot xa ta stojolal li Kristoe, iktabilot xa yuʼun li slekil yutsil yoʼontone.  Yan li voʼotike, ta sjunul koʼontontik yakal ta jmalatik ta sventa sjuʼel Dios ti tukʼ chijkʼot ta skoj li xchʼunel koʼontontike.  Yuʼun li buchʼutik jmoj xa oyik xchiʼuk li Kristoe muʼyuk xa sbalil mi yichʼojik sirkunsision o mi muʼyuk yichʼojik sirkunsision, yan li xchʼunel oʼontonale ch-abtej ta skoj li kʼanelale.  Lek toʼox yakal cha-anilajik. ¿Buchʼu la smakoxuk ta be sventa mu xa xachʼunik li kʼusi melele?  Li chanubtasel taje maʼuk te likem tal ta stojolal li Buchʼu la stakoxuk ta ikʼele.  Manchuk mi jsetʼ noʼox li levadurae* tspuk sba ta skotol li kʼusi votsʼbile. 10  Jpatoj koʼonton ti mu yanuk kʼusi chkʼot ta nopel avuʼunik li voʼoxuk ti jmoj oyoxuk xchiʼuk Kajvaltike; pe buchʼuuk noʼox ti yakal tsokes anopbenike, jaʼ jech chichʼ chapanel ti kʼu yelan sta-oe. 11  Kermanotak, ti yakaluk to ta jcholbe skʼoplal li sirkunsisione, ¿mi chkichʼ to van kontrainel ti jechuke? Mi jaʼ jeche, li jtel teʼ sventa vokolil* ti chamak-o avokike lajem xa skʼoplal. 12  Ta jkʼan ti akʼo xtuchʼ lokʼel skʼunilik jechuk li viniketik ti tsmakoxuk ta bee. 13  Laj avichʼik ikʼel sventa kolelal kermanotak, pe mu me xatunesik ta sventa kʼusitik tskʼan abekʼtalik ti kolemoxuke, yuʼun ta skoj ti akʼanoj abaike tunanik kʼuchaʼal amoso abaik. 14  Yuʼun xi kʼot ta pasel ta jun noʼox mantal skotol li Mantale: «Kʼano achiʼil jech kʼuchaʼal akʼanoj aba atuke». 15  Pe mi te noʼox xatiʼtiʼ abaik xchiʼuk mi te noʼox xajechʼjechʼ abaike, kʼelo me abaik ti mu me xamil aba atukike. 16  Pe chkalboxuk ti xanavanik-o ta stojolal li chʼul espiritue, vaʼun muʼyuk bu chapasik mi jtosuk li kʼusi tskʼan abekʼtalike. 17  Yuʼun li kʼusi tskʼan jbekʼtaltike skontrainoj li kʼusi tskʼan chʼul espiritue, li kʼusi tskʼan chʼul espiritue skontrainoj li kʼusi tskʼan jbekʼtaltike, skontrainoj sbaik; jaʼ yuʼun muʼyuk chapasik li kʼusitik oy ta avoʼontonik spasele. 18  Jech xtok, mi yakal chavakʼ abaik ta beiltasel yuʼun li chʼul espiritue, muʼyuk bu oyoxuk ta stojolal li mantale. 19  Tana un, li yabtel jbekʼtaltike lek xvinaj xchiʼuk jaʼ liʼe: mulivajel,* kʼusitik ibal sba,* talelal toj kʼexlal sba,* 20  yichʼel ta mukʼ santoetik,* espiritismo,* kontrainejbail, tsakbail ta kʼop, itʼixajel, kʼakʼetel oʼontonal, mu jmojuk kʼusi chichʼ nopel, chʼakbail, xchʼunel kʼusi chakʼik ta chanel krixchanoetik, 21  xpichʼ oʼontael kʼusitik yuʼun yantik, yakubel, kʼinetik ti solel muʼyuk xa smelolale xchiʼuk yan kʼusitik kʼuchaʼal taje. Jaʼ jech ta jpʼijubtasoxuk ta sventa li kʼusitik taje jech kʼuchaʼal laj xa onoʼox jpʼijubtasoxuke, ti buchʼutik jech ta spasike muʼyuk me chuʼuninik li Ajvalilal yuʼun Diose.* 22  Yan li talelaletik* chakʼ chʼul espiritue jaʼ liʼe: kʼanelal, kuxetel oʼontonal, jun oʼontonal, stsʼikel, yutsil oʼontonal, slekil oʼontonal, xchʼunel oʼontonal, 23  manxoal xchiʼuk pajesejbail. Chʼabal mantal ti tskontrain li kʼusitik taje. 24  Jech xtok, li buchʼutik uʼuninbilik xa yuʼun Kristo Jesuse bajal xa ta jtel teʼ cham yuʼunik li sbekʼtalike, ti te jokʼol cham ek li kʼusitik tskʼan tajek sbekʼtalik xchiʼuk yoʼontonike. 25  Mi kuxulutik ta sventa li chʼul espiritue tukʼ xanavkutik-o batel ek ta sventa li chʼul espiritue. 26  Mu me xbat ta koʼontontik ti chkalbe jba jkʼoplal jtuktike, mu me jlikesbetik skʼoplal tsalbail xchiʼuk mu me jpichʼ oʼonta jbatik.

Tsʼibetik ta yok vun

Kʼelo glosario.
Kʼelo glosario.
Por·nei·a ta griego. Kʼelo glosario.
«Aseljeia» ta griego. Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
S.gr.: «sat».