Kʼelo li kʼusi yichʼoje

Batan ta saʼobil

Galatas 3:1-29

LI KʼUSITIK YICHʼOJE

  • Li spasel kʼusi chal mantale skontrainoj sbaik xchiʼuk li xchʼunel oʼontonale (1-14)

    • Ta skoj xchʼunel yoʼonton chkuxi li buchʼu tukʼe (11)

  • Li kʼusi laj yichʼ albel Abraane maʼuk te likem tal ta mantal (15-18)

    • Kristo ti jaʼ snitilulal Abraane (16)

  • Ti bu lik talel xchiʼuk ti kʼusi sventa li Mantale (19-25)

  • Xnichʼnab Dios ta skoj xchʼunel oʼontonal (26-29)

    • Snitilulaloxuk Abraan. Yuʼunoxuk Kristo (29)

3  ¡Muʼyuk apʼijilik jgalasiaetik! Akʼo mi jamal laj avaʼibeik smelolal ti laj yichʼ bajel ta jtel teʼ li Jesukristoe, ¿buchʼu xa onoʼox ti la sloʼlaoxuke?  Jaʼ noʼox oy ta koʼonton ta jakʼboxuk li kʼusi liʼe: ¿Mi jaʼ ta skoj ti la apasik li kʼusi chal mantal ti laj avichʼik li chʼul espiritue,* o mi jaʼ ta skoj ti laj avakʼ xchʼunel avoʼontonik ta skoj li kʼusi laj avaʼiike?  ¿Mi yuʼun solel muʼyuk apʼijilik? Yuʼun mi lik xaʼox apasik li kʼusi tskʼan xchʼul espiritu Diose, ¿mi jaʼ xa yakal chapasik li kʼusi tskʼan bekʼete?  ¿Mi ta jech noʼox ep laj avil avokolik? Mi yuʼun ta melel jech noʼox laj avil avokolike.  Jaʼ yuʼun, li buchʼu chakʼboxuk chʼul espiritu xchiʼuk ti tspas tsatsal skʼelobil juʼelal* ta atojolalike, ¿mi jaʼ ta skoj ti chapasik li kʼusi chal mantale, o mi jaʼ ta skoj ti oy xchʼunel avoʼontonik ta skoj li kʼusi laj avaʼiike?  Jaʼ jech kʼuchaʼal «laj yakʼ xchʼunel yoʼonton ta stojolal Jeova* li Abraane, jech oxal laj yichʼ tsakel ta mukʼ ti tukʼ skʼoplale».  Anaʼojik ta melel ti jaʼ noʼox xnichʼnab Abraan li buchʼutik oy xchʼunel yoʼontonike.  Jaʼ yuʼun, li tsʼibe* snaʼoj xa onoʼox ti ta xchʼunel oʼontonal tukʼ ch-albat skʼoplal yuʼun Dios li jyanlumetike, jech oxal, baʼyel xa onoʼox albat lekil aʼyejetik li Abraane, xi albate: «Tstaik bendision skotol jyanlumetik ta atojolal».  Jaʼ yuʼun li buchʼutik oy xchʼunel yoʼontonike koʼol yakal chichʼik bendision xchiʼuk Abraan ti laj yakʼ xchʼunel yoʼontone. 10  Skotol li buchʼu jaʼ noʼox tspasik li kʼusi chal mantale, chkʼotik ta kʼaʼ krixchano; yuʼun xi tsʼibabile: «Kʼaʼ krixchano chkʼot skotol li buchʼu muʼyuk te oy-o ta stojolal Mantal ti tsʼibabil ta balbalvune* xchiʼuk mi muʼyuk bu tspase». 11  Jech xtok, jamal xvinaj ti chʼabal buchʼu tukʼ ch-albat skʼoplal ta stojolal Dios ta skoj li mantale, yuʼun «ta skoj xchʼunel yoʼonton chkuxi li buchʼu tukʼe». 12  Jaʼ yuʼun, maʼuk ta xchʼunel oʼontonal likem tal li Mantale, moʼoj, yuʼun «li buchʼu tspas li kʼusi chal mantale jaʼ chkuxi-o mi tspas li kʼusi chale». 13  La smanutik li Kristoe, la skoltautik lokʼel ta xchopolil li Mantale, jaʼ chopol kʼot skʼoplal ta jkojtik li Kristoe, yuʼun xi tsʼibabile: «Kʼaʼ krixchano skotol li buchʼu chichʼ jokʼanel ta jtel teʼe». 14  Ti jech kʼot ta pasele jaʼ sventa tstabeik sbendision Abraan ta stojolal Kristo Jesus li jyanlumetike, sventa ta xchʼunel koʼontontik xuʼ jtatik li chʼul espiritu ti albil xa onoʼox skʼoplale. 15  Kermanotak, ta jtunes jun lokʼolkʼop ti oy jech chkʼot ta jkuxlejaltike: akʼo mi ta jun noʼox krixchano oy sbalil chkʼot yuʼun li jun tratoe,* muʼyuk buchʼu xuʼ chchʼaybe sbalil xchiʼuk muʼyuk buchʼu xuʼ chakʼbe xchiʼil li tratoe. 16  Jaʼ yuʼun, jaʼ laj yichʼ albel Abraan xchiʼuk snitilulal* li kʼusi albil xa onoʼox skʼoplale. Mu xiuk chale: «Ta stojolal nitilulaletik», ti xkoʼolaj ep xa chalbe skʼoplal yaʼele. Moʼoj, xi chale: «Ta stojolal anitilulal», jaʼ noʼox jun chalbe skʼoplal, ti jaʼ li Kristoe. 17  Xi chkal xtoke: echʼ 430 jabil, laje vul ta lokʼel li Mantale, pe muʼyuk bu tslajesbe skʼoplal li trato spasoj xa onoʼox Diose, jech xtok muʼyuk tslajesbe sbalil li kʼusi albil xa onoʼox skʼoplale. 18  Yuʼun ti teuk likem tal ta mantal li jpartetike, jechuke maʼuk te likem tal ta sventa li kʼusi albil xa onoʼox skʼoplale; pe li Diose ta slekil yoʼonton laj yakʼbe sparte Abraan ta sventa li kʼusi albil xa onoʼox skʼoplale. 19  Jaʼ yuʼun, ¿kʼu yuʼun oy li Mantale chaʼa? Laj yichʼ akʼel sventa chakʼ ta ilel li muliletike, jaʼ to mi vul ta lokʼel li nitilulal albil xa onoʼox skʼoplale; li mantal taje laj yal anjeletik ta stojolal jun jkʼopojel.* 20  Jaʼ yuʼun, chʼabal jkʼopojel kʼalal jun noʼox krixchano te tsakal skʼoplale, jaʼ noʼox stuk Dios la spas. 21  Jaʼ yuʼun chaʼa, ¿mi skontrainoj kʼusitik yaloj Dios li Mantale? ¡Moʼoj ta melel! Yuʼun ti akʼbiluk junuk mantal ti xuʼ chakʼ kuxlejale, jechuke ta stojolal mantal lokʼ talel li tukʼilale. 22  Pe li Tsʼibe laj yakʼbe ta yok skʼob mulil skotol li kʼusitike, sventa xchʼunel yoʼontonik ta stojol Jesukristo xuʼ chichʼik li kʼusi albil onoʼox skʼoplal li buchʼutik ta xchʼunike. 23  Pe kʼalal muʼyuk toʼox vulem li xchʼunel oʼontonale, smosoinojutik toʼox li mantale, akʼbilutik toʼox ta yok skʼob, yakal ta jmalatik li xchʼunel oʼontonal ti poʼot xa xtale. 24  Jech oxal, jaʼ kʼotem ta jchabivanej* kuʼuntik li Mantal ti jaʼ tsbeiltasutik batel ta stojolal li Kristoe, yoʼ tukʼ chkichʼ albel jkʼoplaltik ta skoj li xchʼunel koʼontontike. 25  Muʼyuk xa jchabivanej kuʼuntik ta skoj ti vul xa ta lokʼel li xchʼunel oʼontonale. 26  Ta melel, xnichʼnaboxuk Dios akotolik ta skoj li xchʼunel avoʼontonik ta stojolal li Kristo Jesuse. 27  Yuʼun akotolik ti buchʼu laj xa avichʼik voʼ ta stojolal li Kristoe, jaʼ xa avichʼojbeik stalelal li Kristoe. 28  Chʼabal juda krixchano mi jaʼuk jgresia krixchano, chʼabal mosoil mi jaʼuk oy buchʼu kolem,* chʼabal vinik mi jaʼuk ants; yuʼun jmoj oyoxuk akotolik jech kʼuchaʼal yajtsʼaklomoxuk Kristo* Jesus. 29  Jech xtok, mi jaʼ yuʼunoxuk li Kristoe jaʼ snitilulaloxuk ta melel li Abraane, chata aparteik ta sventa li kʼusi albil xa onoʼox skʼoplale.

Tsʼibetik ta yok vun

Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
O: «smomnichʼon»; «stsʼunbal»; «stsʼakalul».
Kʼelo glosario.
Li jpʼel kʼop ta griego taje jaʼ skʼoplal li buchʼu vaʼanbil sventa chchabi olole.
Kʼelo glosario.
Kʼelo glosario.