Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Galatas 2:1-21

LI KʼUSITIK YICHʼOJE

  • Tstsob sbaik xchiʼuk jtakboletik ta Jerusalen li Pabloe (1-10)

  • Li Pabloe laj yalbe mantal Pedro (Sefas) (11-14)

  • Tukʼ ch-albat skʼoplal jun krixchano ta skoj xchʼunel yoʼonton (15-21)

2  Vaʼun limuy batel yan velta ta Jerusalen xchiʼuk Bernabe kʼalal echʼ xaʼox chanlajuneb jabile, laj kikʼ batel ek li Titoe.  Limuy batel ta skoj ti oy kʼusi li-akʼbat kile xchiʼuk laj kakʼbe snaʼik li lekil aʼyejetik ti yakal ta jchol batel ta stojolal jyanlumetike. Taje ta jun bikʼit tsobajel laj yichʼ pasel xchiʼuk li buchʼutik tsots skʼoplalike, sventa chkakʼ lek venta ti muʼyuk bu ta jecheʼ noʼox yakalun ta anil o ti ta jecheʼ noʼox li-anilaje.  Akʼo mi jech, mi jaʼuk bu laj yichʼ sujel sventa xichʼ sirkunsision* ek li Tito ti te jchiʼuke, akʼo mi jaʼ jgresia.*  Pe taje jaʼ lik ta skoj li buchʼutik ermanoetik ta alel ti nakʼal ochike, ti mu xvinaj kʼu yelan ochik sventa tspaʼiik* ti kʼu yelan ta jkʼupinkutik li jkolelkutik ti jmoj oyunkutik xchiʼuk Kristo Jesuse, yuʼun tskʼan tsmosoinunkutik ta jyalel;  pe mi jsetʼuk* bu laj kakʼ jbakutik ta ventainel ta stojolalik, sventa teuk-o ta atojolalik li kʼusi melel ta sventa li lekil aʼyejetike.  Pe li buchʼutik tsots skʼoplalik yilele —mu jventa-o buchʼu jech nopem toʼox xaʼi tspas sbaik, maʼuk tskʼel kʼu yelan spat xokon krixchanoetik li Diose— li viniketik taje, ti tsots tajek skʼoplalike, muʼyuk kʼusi achʼ laj yakʼbeikun jchan.  Ti kʼusi noʼox la spasike, jaʼ ti kʼalal laj yakʼik venta ti voʼon kʼubanbilun li lekil aʼyejetik ta sventa li buchʼutik muʼyuk yichʼojik sirkunsisione, jech kʼuchaʼal ti jaʼ kʼubanbil Pedro ek ta sventa li buchʼutik yichʼojik sirkunsisione  —yuʼun li Buchʼu laj yakʼbe sjuʼel Pedro sventa xkʼot ta jtakbol ta stojolal li buchʼutik yichʼojik sirkunsisione jaʼ laj yakʼbun juʼel ek ta stojolal li jyanlumetike—  xchiʼuk ti kʼalal laj yilik li slekil yutsil oʼontonal akʼbilune, li Santiago, Sefas* xchiʼuk Juan ti jech ilbilik kʼuchaʼal yoyal* tsobobbaile, laj yakʼbunkutik sbatsʼikʼobik li voʼon xchiʼuk Bernabe ti jaʼ svinajeb ti jmoj kʼusi oy ta koʼontonkutike, sventa voʼonkutik xbat jkʼelkutik li jyanlumetike, ti jaʼ xbat skʼelik buchʼutik yichʼoj sirkunsision li stukike. 10  Jaʼ noʼox laj yalbunkutik ti teuk ta jolkutik li povreetike, jech oxal kakʼojbe tajek yipal spasel taj eke. 11  Pe ta sat laj kalbe mantal Sefas kʼalal tal ta Antiokiae, yuʼun lek jamal ta kʼelel ti mu jechuk li kʼusi tspase. 12  Yuʼun nopem toʼox xaʼi jmoj chveʼ xchiʼuk jyanlumetik kʼalal skʼan toʼox xvulik li viniketik likemik tal ta stojolal Santiagoe; pe mu xa jechuk la spas kʼalal vulik li viniketike xchiʼuk la xchʼak sba lokʼel, yuʼun chiʼta li buchʼutik yichʼoj sirkunsisione. 13  Jaʼ jech la spasik ek li yantik judaetik kʼuchaʼal loʼlavan stuke, kʼalal ta Bernabe te tijil batel yuʼunik ek ti kʼu yelan loʼlavanike. 14  Jaʼ yuʼun, kʼalal laj kakʼ venta ti maʼuk jech tspasik jech kʼuchaʼal li kʼusi melel ta sventa li lekil aʼyejetike, xi laj kalbe Sefas ta sat skotolike: «Akʼo mi judaot, jech akuxlejal jech kʼuchaʼal jyanlumetik, maʼuk jech akuxlejal jech kʼuchaʼal li judaetike, ¿kʼuxi ti chasuj jyanlumetik ti akʼo jechuk xkuxlejalik jech kʼuchaʼal nopem xaʼi tspas li judaetike?». 15  Voʼotik ti judautik onoʼox lijvokʼe* xchiʼuk ti maʼuk jpasmulilutik ta stojolal jyanlumetike, 16  jnaʼojtik ti maʼuk tukʼ xa chichʼ albel skʼoplal li jun krixchano ta skoj ti tspas li kʼusi chal mantale,* jaʼ noʼox ta sventa li xchʼunel yoʼonton ta stojolal Jesukristoe. Jaʼ yuʼun kakʼoj xchʼunel koʼontontik ta stojolal Kristo Jesus ek sventa tukʼ chkichʼtik albel jkʼoplaltik ta sventa li xchʼunel koʼontontik ta stojolal Kristoe, maʼuk ti tukʼ chij-albat jkʼoplaltik ta skoj ti ta jpastik li kʼusi chal mantale, yuʼun mi junuk buchʼu ti tukʼ xa chichʼ albel skʼoplal ta skoj li buchʼu tspas li kʼusi chal mantale. 17  Pe mi lijtabat jmultik ek kʼalal jaʼo tukʼ chkichʼ albel jkʼoplaltik ta sventa Kristoe, ¿mi jaʼ van skʼan xal ti tstij koʼontontik Kristo ti akʼo jpas jmultike? ¡Moʼoj ta melel! 18  Mi ta jchaʼvaʼan li kʼusi la jines ta voʼnee jaʼ skʼan xal ti jpasmulilune. 19  Chamemun ta stojolal li mantale. Pe ti jech kʼot ta pasele jaʼ sventa xikuxi ta sventa li Diose. 20  Bajalun ta jtel teʼ* xchiʼuk Kristo li avie. Maʼuk xa voʼon ti kuxulune, maʼuk, jaʼ xa Kristo ti kuxul ta jtojolale. Ta melel, jech kuxulun avi jech kʼuchaʼal jun krixchano ti oy xchʼunel yoʼonton ta stojolal li Xnichʼon Diose, ti jaʼ li buchʼu la skʼanun xchiʼuk ti laj yakʼ sba ta jtojolale. 21  Muʼyuk bu ta jpʼajbe li slekil yutsil yoʼonton Diose; ti jaʼuk te chichʼ tael tukʼilal* ta skoj ti chichʼ chʼunel mantale, jecheʼ noʼox cham ta melel jechuk li Kristoe.

Tsʼibetik ta yok vun

Kʼelo glosario.
Kʼelo glosario.
O: «tspamukʼtaik»; «tspayik».
S.gr.: «junuk ora».
Pedro sbi xtok.
Kʼelo glosario.
O: «lij-ayane».
Kʼelo glosario.
Kʼelo glosario.
Kʼelo glosario.