Kʼelo li kʼusi yichʼoje

Batan ta saʼobil

Galatas 1:1-24

LI KʼUSITIK YICHʼOJE

  • Kʼopoj batel (1-5)

  • Muʼyuk yan lekil aʼyejetik (6-9)

  • Li lekil aʼyejetik la xcholbe skʼoplal Pabloe likem talel ta stojolal Dios (10-12)

  • La sjel kuxlejal li Pabloe xchiʼuk laj yikta li kʼusitik toʼox tspase (13-24)

1  Voʼon Pabloun, ti jaʼ jtakbolune* maʼuk ta skoj krixchanoetik mi jaʼuk ta skoj jun vinik, yuʼun jaʼ ta skoj Jesukristo xchiʼuk Dios ti jaʼ Totile, ti la xchaʼkuxes* li Kristoe,*  xchiʼuk skotol li ermanoetik ti liʼ oy jchiʼuke, ta sventa li tsobobbailetik* ta Galasiae:  Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.  Ti jaʼ laj yakʼ sba stuk ta skoj jmultik sventa tskoltautik lokʼel ta skotol li kʼusitik chopol oy ta balumil* avie, jech kʼuchaʼal tskʼan yoʼonton Dios ti jaʼ Totile,  jaʼuk noʼox stuk akʼo yichʼ ichʼel-o ta mukʼ sbatel osil. Jechuk.*  Chʼayal tajek koʼonton chkaʼi ti chachʼak abaik ta anil ta stojolal li Buchʼu la stakoxuk ta ikʼel ta slekil yutsil yoʼonton Kristoe, ti chavakʼ abaik ta stojolal yan lekil aʼyejetike.*  Pe muʼyuk yan lekil aʼyejetik; jaʼ noʼox oy jayvoʼuk ti yakal chakʼ avokolike xchiʼuk tskʼan tsokesik li lekil aʼyejetik ta sventa li Kristoe.  Akʼo mi jech, manchuk mi voʼonkutik o mi jaʼ junuk anjel* ta vinajel ti yan xa-o lekil aʼyejetik ta jcholkutik ti mu xkoʼolaj kʼuchaʼal li lekil aʼyejetik ti laj xa onoʼox jcholkutik ta atojolalike, akʼo kʼotuk ta kʼaʼ krixchano.  Chkalboxuk yan velta li kʼusi laj xa onoʼox kalkutik avaʼiike: buchʼuuk noʼox ti chal yan-o lekil aʼyejetik ti jelel kʼuchaʼal la achʼamike, akʼo kʼotuk ta kʼaʼ krixchano. 10  ¿Mi ta melel jaʼ yakal ta jsaʼ ti akʼo lek xilun li krixchanoetike o mi jaʼ li Diose? ¿O mi jaʼ noʼox van ta jkʼan ti akʼo lek xilun li krixchanoetike? Ti yuʼun yakaluk to ta jkʼan lek chilun li krixchanoetike, maʼuk smosoun Kristo ti jechuke. 11  Yuʼun oy ta koʼonton ti akʼo xanaʼike kermanotak, ti maʼuk yuʼun krixchanoetik li lekil aʼyejetik la jcholboxuke; 12  yuʼun muʼyuk bu la jchʼam ta stojolal junuk krixchano xchiʼuk muʼyuk bu laj kichʼ chanubtasel, yuʼun li-akʼbat jnaʼ ta stojolal Jesukristo. 13  Ta melel, li voʼoxuke avaʼiojik ti kʼu toʼox yelan jtalelal kʼalal oyun toʼox ta srelijion judaetike,* ti tsots tajek la jkontrain li stsobobbail Diose xchiʼuk ti oy toʼox ta koʼonton ta jlajese, 14  xchiʼuk voʼon x-echʼ to jelavemun li ta srelijion judaetike ti jaʼ mu sta li buchʼutik ep jmoj jabilal jchiʼuk ti jmoj jtsʼunbalkutike, yuʼun mas oy tajek ta koʼonton li kʼusitik nopem xaʼi tspasik jmoltotak ta voʼnee. 15  Pe kʼalal la xchʼakun lokʼel ta yalajeb jmeʼ li Diose xchiʼuk ti la stakun ta ikʼel ta slekil yutsil yoʼontone, lek laj yil ti 16  voʼon la stunesun sventa laj yakʼ ta ilel li Xnichʼone, sventa voʼon chkalbe batel lekil aʼyejetik li jyanlumetike, muʼyuk bu la jsabe smelolal ta ora ta stojolal junuk krixchano. 17  Jech xtok, muʼyuk limuy batel ta Jerusalen ta stojolal li buchʼutik baʼyel xa onoʼox kʼotemik ta jtakboletik kʼalal maʼuk toʼox jtakbolune, jaʼ noʼox libat ta Arabia, laje lisut batel ta Damasko. 18  Kʼalal echʼem xaʼox oxib jabile, limuy batel ta Jerusalen sventa chbat jvulaʼan li Sefase,* vaʼun voʼlajuneb kʼakʼal te likom xchiʼuk. 19  Pe muʼyuk bu laj kil mi junuk li yantik jtakboletike, jaʼ noʼox laj kil li Santiago ti jaʼ yitsʼin li Kajvaltike. 20  Vaʼun chaʼa, ta sventa li kʼusitik ta jtsʼibaboxuk talele muʼyuk bu yakal ta jut kʼop,* jamal chkalboxuk ta stojolal Dios. 21  Kʼalal laj xaʼox taje, li-och batel ta yosilal Siria* xchiʼuk Silisia. 22  Li tsobobbailetik ta Judea ti jmoj oyik xchiʼuk Kristoe mi jsetʼuk xojtikinikun. 23  Jaʼ noʼox nopem xaʼiik ti xi chaʼiike: «Li vinik ti tsnutsutik toʼoxe, avie yakal xa chcholbe skʼoplal li lekil aʼyejetik ta sventa li xchʼunel oʼontonal ti tskʼan toʼox tslajese». 24  Jaʼ yuʼun lik stoybeik skʼoplal Dios ta jkoj.

Tsʼibetik ta yok vun

Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.
Pedro sbi xtok.
O: «jnop kʼop»; «chi-epal kʼopoj».
Kʼelo glosario.