Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Filemon 1:1-25

LI KʼUSITIK YICHʼOJE

  • Kʼopoj batel (1-3)

  • Xchʼunel yoʼonton xchiʼuk kʼanvanem li Filemone (4-7)

  • La skʼanbe vokol Onesimo li Pabloe (8-22)

  • Kʼopoj batel slajeb velta (23-25)

 Voʼon Pabloun xchiʼuk li kermanotik Timoteoe, jchukelun ta skoj Kristo* Jesus, sventa Filemon ti kʼanbil kuʼuntike xchiʼuk ti jchiʼiltik ta abtele,  xchiʼuk li kermanatik Apfiae, li Arkipo ti jchiʼilkutik ta soltaroile xchiʼuk li tsobobbail* te ta anae:  Oyuk slekil yutsil oʼontonal* xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.  Skotol onoʼox ora chkalbe koliyal Dios kʼalal ta jtaot ta naʼel ta j-orasione,  yuʼun jech-o chkaʼi ti oy xchʼunel avoʼonton xchiʼuk ti akʼanoj li Kajvaltik Jesus xchiʼuk skotol li buchʼutik chʼule.*  Ta jpas orasion ta sventa li xchʼunel avoʼonton ti yakal chavalbe skʼoplale, ti jaʼ tstij avoʼonton ti akʼo xanaʼ skotol li kʼusitik lek oy kuʼuntik ta stojolal Kristoe.  Ermano, ximuyubaj* tajek xchiʼuk la jta spatobil koʼonton kʼalal laj kaʼi ti kʼanvanemote, yuʼun xkuxet yoʼonton laj yaʼi avuʼun li buchʼutik chʼule.  Jaʼ yuʼun, akʼo mi jamal tajek jnaʼ xikʼopoj ta sventa Kristo sventa chkalbot ti akʼo xapas li kʼusi skʼan pasele,  jaʼ mas lek chkaʼi ti ta jtijbot avoʼonton ta sventa li kʼanelale, jech, voʼon Pabloun ti molun xae xchiʼuk ti jchukelun ta skoj Kristo Jesus xtoke. 10  Ta jkʼanbot vokol ta sventa li jnichʼon Onesimo ti likʼot kʼuchaʼal stot kʼalal chukulune. 11  Ti mu toʼox jtuneluk avuʼune, pe ti jtunel xa avuʼun li avie xchiʼuk ti jtunel xa kuʼun eke. 12  Ta jtakbot sutel tal, jech, jaʼ li buchʼu toj kʼux ta koʼontone. 13  Ta jkʼan ox ti liʼ xkom jchiʼin-oe, yuʼun jech jaʼ akʼexol chkʼot sventa liʼ xtun kuʼun ti kʼalal liʼ tikʼilun ta chukel ta sventa li lekil aʼyeje.* 14  Pe muʼyuk kʼusi xuʼ jpas mi muʼyuk kʼusi avaloje, sventa mu ta sujeluk xapas li kʼusi lek chapase, jaʼ lek ti akʼo xlokʼ ta avoʼonton atuke. 15  Xuʼ van jaʼ ta skoj ti ta melel la xchʼak sba lokʼel kʼuk sjalil* sventa teuk xa achiʼuk-o sbatel osile, 16  pe maʼuk xa kʼuchaʼal jun mosoil, x-echʼ to kʼuchaʼal jun mosoil, jaʼ xa kʼuchaʼal jun kʼanbil ermano, mas to jech chkaʼi li voʼone, pe mas to van jech chavaʼi ta sventa ti jaʼ amosoe xchiʼuk ti jaʼ avermano abaik ta sventa Kajvaltike. 17  Jaʼ yuʼun chaʼa, mi kamigo jbatik chavaʼie, ta slekiluk me avoʼonton xachʼam jech kʼuchaʼal chachʼamune. 18  Jech xtok, akʼo me jbain mi oy kʼusi chopol la spasbot o mi oy yil ta atojolale. 19  Voʼon Pabloun, la jtsʼiba ta jkʼob jtuk ti jech chkalbote: voʼon ta jtojbot sutel —akʼo mi muʼyuk chkalbot ti oy avil kuʼun ek ta skoj li akuxlejale—. 20  Jech ta melel ermano, oy ta koʼonton ti xakoltaun ta sventa li Kajvaltike: siketuk me koʼonton avuʼun ta sventa li Kristoe. 21  Ta jtsʼibabot tal liʼe, yuʼun jpatoj koʼonton ti chkʼot ta pasel avuʼune, jnaʼoj ti maʼuk noʼox chapas li kʼusi chkale. 22  Jech xtok, chapanbun me kavil bu xuʼ xikom, yuʼun jpatoj koʼonton ti xuʼ van xisut batel ti bu oyoxuk ta skoj ti chapasik orasion ta jtojolale. 23  Chabanukot la chal li Epafras ti jchiʼil ta chukel ta skoj Kristo Jesuse, 24  chabanukot la chal ek li Markos, Aristarko, Demas xchiʼuk li Lukase, li jchiʼiltak ta abtele. 25  Teuk me oy ta atojolalik li slekil yutsil yoʼonton Kajvaltik Jesukristo ta skoj ti lek chavakʼ ta ilel atalelalike.

Tsʼibetik ta yok vun

Kʼelo glosario.
Kʼelo glosario.
Kʼelo glosario.
Kʼelo glosario.
O: «pʼij koʼn»; «nichim koʼonton».
Kʼelo glosario.
S.gr.: «junuk ora».