Kʼelo li kʼusi yichʼoje

Batan ta saʼobil

Echos 20:1-38

LI KʼUSITIK YICHʼOJE

  • Te oy ta Masedonia xchiʼuk ta Gresia li Pabloe (1-6)

  • Li Eutikoe laj yichʼ chaʼkuxesel ta Troas (7-12)

  • Lik ta Troas kʼalal to ta Mileto (13-16)

  • Li Pabloe la stsob sba xchiʼuk li moletik ta Efesoe (17-38)

    • Chanubtasvan ta naetik (20)

    • «Mas xmuyubaj li buchʼu chakʼe» (35)

20  Kʼalal laj xaʼox li vochlajetele, la stak ta ikʼel jchankʼopetik li Pabloe, vaʼun bat ta Masedonia kʼalal laj xaʼox spatbe yoʼontonik xchiʼuk kʼalal laj xaʼox yal ti chbate.  Kʼalal echʼ xaʼox batel ta jayibuk yosilal ti bu taje, xchiʼuk kʼalal ep xaʼox la xchiʼin ta loʼil sventa tspatbe yoʼonton li buchʼutik te nakalike, bat ta Gresia.  Vaʼun te kom oxib u, pe kʼalal poʼot xaʼox ch-och batel ta varko sventa chbat ta Siriae, li judaetike lik snopik sventa tsmilik, jaʼ yuʼun lik stikʼ ta yoʼonton ti tskʼan tsut batel ta Masedoniae.  Te chiʼinat batel yuʼun Sopater ti jaʼ xnichʼon Pirro ti likem ta Bereae, Aristarko xchiʼuk Segundo ti likemik ta Tesalonikae, Gayo ti likem ta Derbee, Timoteo, jech xtok te oy Tikiko xchiʼuk Trofimo ti likemik ta yosilal Asiae.  Jelavik batel li viniketik taje, te la smalaunkutik ta Troas,  pe li voʼonkutike li-ochkutik batel ta varko ti te lilikutik batel ta Filipos kʼalal echʼ xaʼox li Skʼakʼalil pan muʼyuk slevaduraile, kʼalal echʼ xaʼox voʼob kʼakʼale te la jtakutik ta Troas li yantike; vaʼun te lijalijkutik vukub kʼakʼal.  Li ta sba kʼakʼal ta xemanae, kʼalal te tsobolunkutik sventa chiveʼkutike, li Pabloe lik loʼilajuk xchiʼukik, jaʼ ta skoj ti ta yokʼomal xa chbate; vaʼun li mantal laj yale jalij kʼalal to ta oʼlol akʼobal.  Jech oxal li ta kuarto ta akʼol ti bu tsobolunkutike oy te ep kantiletik.  Te chotol ta ventana jun kerem ti Eutiko sbie, och tajek svayel kʼalal yakal chkʼopoj li Pabloe, vaʼun pʼaj yalel ta yoxibal piso ta skoj ti solel ochem svayele, jaʼ yuʼun chamem xa la stoyik. 10  Vaʼun yal talel li Pabloe, la spatan sba ta stojolal, la smey xchiʼuk xi laj yale: «Iktao abaik ta vochlajetel, yuʼun kuxul». 11  Jaʼ yuʼun muy batel yan velta, lik li veʼele, vaʼun veʼ. Jech xtok, jal to loʼilaj batel, jaʼ to ti kʼalal sakub osile, vaʼun bat. 12  Jaʼ yuʼun kuxul xa laj yikʼik batel li kereme xchiʼuk xpatet xa tajek kom yoʼontonik. 13  Vaʼun tukʼ libatkutik ta varko li voʼonkutike, jaʼ yuʼun libatkutik ta Ason ti bu kalojkutik ti jaʼ te ta jmuyeskutik ta varko li Pabloe, yuʼun kʼalal laj xaʼox yal ti akʼo jech yichʼ pasele, oy ta yoʼonton chanav batel li stuke. 14  Jaʼ yuʼun kʼalal te la staunkutik ta Asone, laj kikʼkutik muyel, vaʼun libatkutik ta Mitilene. 15  Kʼalal li-ochkutik batel ta varko ta yokʼomale, te likʼotkutik ta yeloval Kios, pe li ta yokʼomale te lipajkutik jlikel ta Samos, jech xtok libatkutik ta Mileto li ta yokʼomale. 16  Snopoj xa onoʼox ti muʼyuk chjelav ta Efeso li Pabloe, yuʼun mu xa skʼan te xjalij li ta yosilal Asiae, yuʼun sujom xa chbat ta Jerusalen yoʼ chkʼot li ta skʼakʼalil Skʼinal Pentekostes* mi xuʼ to yuʼun chile. 17  Akʼo mi jech, kʼalal te toʼox oy ta Miletoe la stak batel mantal ta Efeso sventa tstak ta ikʼel li moletik ta tsobobbaile. 18  Kʼalal talik ta stojolale, xi albatike: «Anaʼojik onoʼox lek kʼu yelan jtalelal ta atojolalik kʼalal livul ta sba kʼakʼal li ta yosilal Asiae, 19  ti litun kʼuchaʼal smoso Kajvaltike, ti solel bikʼit laj kakʼ jbae, ti lokʼ yaʼlel jsate, jech xtok, tal prevaetik ta jtojolal ta skoj ti la snop ox tsmilikun li judaetike, 20  akʼo mi jech, muʼyuk onoʼox laj kikta jba ta yalbel krixchanoetik li kʼusitik oy sbalile, jech xtok muʼyuk laj kikta jba ta yakʼel chanubtasel ta stojolal krixchanoetik xchiʼuk ta jujupʼej na. 21  Ti kʼusi la jpase, jaʼ ti lek tsʼakal laj kalbe skʼoplal mantal* li judaetik xchiʼuk jgresiaetik ta sventa li sutesel oʼontonal ta stojolal Diose xchiʼuk li xchʼunel oʼontonal ta sventa li Kajvaltik Jesuse. 22  Jaʼ yuʼun, ¡kʼelo avilik!, tsujun li chʼul espiritue, jaʼ yuʼun skʼan xibat ta Jerusalen, akʼo mi mu jnaʼ kʼusitik chkʼot ta jtojolal te, 23  li kʼusi noʼox chalilanbun ta jujun jteklum li chʼul espiritue jaʼ ti chkichʼ la chukele xchiʼuk ti ta la jta tsots jvokoltake. 24  Akʼo mi jech, maʼuk tsots skʼoplal chkil li jkuxlejale jaʼ noʼox venta mi tsuts* li anilajel kuʼune xchiʼuk li abtelal ti laj kichʼ ta stojolal li Kajvaltik Jesuse, ti skʼan lek tsʼakal chkalbe skʼoplal li mantal sventa li lekil aʼyejetik ta sventa li slekil yutsil yoʼonton Diose. 25  »Li avi une, ¡kʼelo avilik!, li voʼoxuk ti la jcholboxuk mantal ta sventa li Ajvalilal yuʼun Diose, muʼyuk xa chavilik yan velta li jsate. 26  Jaʼ yuʼun, li avie la jtakoxuk ta ikʼel sventa xakʼotik ta testigo ti muʼyuk jmul ta sventa li xchʼichʼel skotol krixchanoetike, 27  yuʼun muʼyuk onoʼox laj kikta jba ta yalbel krixchanoetik skotol li tojobtasel yuʼun Diose. 28  Jaʼ yuʼun kʼelo me aba atukik xchiʼuk skotol li chijetike, yuʼun li chʼul espiritue jaʼ svaʼanojoxuk kʼuchaʼal jkʼelvanejetik* sventa xachabiik li stsobobbail Dios ti jaʼ la sman ta xchʼichʼel li Xnichʼone. 29  Kʼalal mi libate jnaʼoj ti ch-och talel ta atojolalik jtiʼvanej okʼiletik ti muʼyuk bu chkʼuxubinik li chijetike, 30  jech xtok, te noʼox chlokʼ ta atojolalik viniketik ti jecheʼ chanubtaseletik chakʼik ta chanele sventa chjochik batel ta stojolal stukik li jchankʼopetike. 31  »Jaʼ yuʼun vikʼiluk-o me asatik xchiʼuk teuk-o me ta ajolik ti oxib jabil ta kʼakʼal-akʼobal ta yaʼlel jsat muʼyuk bu laj kikta jba ta stojobtaseloxuk ta jujuntale. 32  Li avi une ta jkʼubanoxuk ta stojolal Dios xchiʼuk li ta skʼop ta sventa li slekil yutsil yoʼontone, li kʼop taje xuʼ tstsatsubtasoxuk xchiʼuk xuʼ jmoj chakʼ avichʼik li kʼusitik chichʼik li buchʼutik chʼultajesbilik xae. 33  Muʼyuk bu xpichʼ koʼonton ta plata, ta oro xchiʼuk ta skʼuʼ spokʼ yantik. 34  Anaʼojik ti li-abtej ta jkʼob jtuk ta sventa li kʼusitik chtun kuʼune xchiʼuk ta sventa li buchʼutik te xchiʼinojikune. 35  Laj kakʼboxuk ta ilel ta skotol ti kʼalal cha-abtejike jaʼ jech xuʼ xakoltaik li buchʼutik kʼunike. Jech xtok skʼan teuk ta ajolik li kʼusi xi laj yal stuk li Kajvaltik Jesuse: ‹Jaʼ mas xmuyubaj* li buchʼu chakʼe, jaʼ mu sta li buchʼu chichʼe›». 36  Kʼalal laj xaʼox yal li kʼusitik taje, la skejan sba skotolik xchiʼuk li Pabloe, vaʼun la spas orasion. 37  Ta melel, ep lik okʼikuk skotolik xchiʼuk lik smeyik li Pabloe, jech xtok la skʼunil tsʼutsʼik,* 38  yuʼun toj kʼux laj yaʼiik ta skoj ti albatik ti muʼyuk xa chilbeik yan velta sate. Vaʼun la xchiʼinik batel kʼalal to ti bu oy li varkoe.

Tsʼibetik ta yok vun

Kʼelo glosario.
O: «lek tsʼakal la jcholbe mantal».
O: «laj».
Kʼelo glosario.
O: «pʼij yoʼn»; «nichim yoʼonton».
O: «butsʼik»; «tsʼutsʼunik».