Echos 17:1-34

  • Te oyik ta Tesalonika li Pablo xchiʼuk Silase (1-9)

  • Te oyik ta Berea li Pablo xchiʼuk Silase (10-15)

  • Te oy ta Atenas li Pabloe (16-22 sbavokʼal)

  • Laj yal mantal ta Areopago li Pabloe (22 xchaʼvokʼal kʼalal ta 34)

17  Vaʼun echʼik batel ta Anfipolis, ta Apolonia, vaʼun kʼotik ta Tesalonika ti bu oy jun nail tsobobbail yuʼun judaetike.  Och batel Pablo ti bu oyike, jech onoʼox kʼuchaʼal nopem xaʼie, vaʼun oxib Savado rasonaj xchiʼuk krixchanoetik ta sventa li Tsʼibetike,  te chchapbe smelolal xchiʼuk chakʼ ta ilel ta tsʼibetik ti persa onoʼox chil svokol li Kristoe xchiʼuk ti chchaʼkuxie, xi chale: «Li Jesus liʼe, jaʼ li Kristo ti yakal chkalboxuk skʼoplale».  Ti kʼusi kʼot ta pasele jaʼ ti oy jayvoʼuk pasik ta jchʼunolajele, jaʼ yuʼun te la xchiʼinik li Pablo xchiʼuk Silase, jech xtok, jaʼ jech la spasik ep jgresiaetik ti chichʼik ta mukʼ Diose xchiʼuk ep antsetik ti tsots skʼoplalike jech la spasik ek.  Pe lik itʼixajikuk li judaetike, vaʼun lik stsobik junantik chopol viniketik ti jecheʼ te chchʼayik kʼakʼal ta chʼivite, jaʼ yuʼun lik stsob sba epal krixchanoetik, lik sokbeik sjol li jteklume. Jech oxal ochik ta persa ta sna Jason, yuʼun tskʼan tslokʼesik batel li Pablo xchiʼuk Silas yoʼ bu oy li epal krixchanoetike.  Pe kʼalal muʼyuk bu la staike, la xjochik batel ta stojolal ajvaliletik ta jteklum li Jason xchiʼuk jayvoʼuk ermanoetike, xi tsots chalike: «Liʼ oyik ek li viniketik ti la sokbe sjol li jnaklejetik ta balumile,  jech xtok, lek la xchʼam kʼuchaʼal yajvulaʼal li Jasone. Skotol li buchʼutik liʼ oyike skontrainojik li smantaltak Sesare,* yuʼun chalik ti oy la yan ajvalile, jaʼ li Jesuse».  Kʼalal laj yaʼi epal krixchanoetik xchiʼuk ajvaliletik ta jteklum li kʼusitik taje, likik ta vochlajetel;  vaʼun, kʼalal laj xaʼox skʼanbeik takʼin li Jason xchiʼuk li yantike, laj yakʼik akʼo batikuk. 10  Li vaʼ ora akʼobale, li Pablo xchiʼuk Silase ta anil noʼox laj yichʼik takel batel ta Berea yuʼun li ermanoetike. Ochik ta nail tsobobbail yuʼun judaetik kʼalal kʼotike. 11  Li krixchanoetik taje mas oy ta yoʼontonik kʼusi chchanik, yuʼun mas oy tajek ta yoʼontonik chchʼamik li skʼop Diose xchiʼuk tskʼelbeik lek smelolal skotol kʼakʼal li Tsʼibetik sventa tskʼelik mi jech ta melel li kʼusitike, jaʼ mu sta li buchʼutik ta Tesalonikae. 12  Jaʼ yuʼun ep pasik ta jchʼunolajel, pasik ta jchʼunolajel ek li jgresia antsetik ti tsots skʼoplalike xchiʼuk junantik viniketik. 13  Pe kʼalal laj yaʼiik li judaetik ta Tesalonika ti te chalbe skʼop Dios ta Berea li Pabloe, bat stijbeik yoʼonton li epal krixchanoetike xchiʼuk la sokbeik sjol. 14  Ta skoj taje, li ermanoetike la stakik batel ta anil sventa xbat ta tiʼ nab li Pabloe, pe li Silas xchiʼuk Timoteoe te komik. 15  Pe li buchʼutik xchiʼinojik batel Pabloe laj yikʼik batel kʼalal to ta Atenas, pe sutik talel kʼalal albatik xaʼox mantal yuʼun Pablo ti akʼo stakik batel ta anil li Silas xchiʼuk Timoteo ti bu oye. 16  Kʼalal te chmalavan ta Atenas li Pabloe, chopol laj yaʼi ta yoʼonton kʼalal laj yil ti noj ta santoetik li jteklume. 17  Jaʼ yuʼun lik rasonajuk xchiʼuk judaetik ta nail tsobobbail xchiʼuk li yan krixchanoetik ti yichʼojik ta mukʼ Diose, rasonaj xchiʼuk xtok li krixchanoetik ti te tsta ta chʼivit skotol kʼakʼale. 18  Pe oy jlom j-epikuroetik* xchiʼuk j-estoikoetik* ti jaʼik jfilosofoetike, lik svul sbaik xchiʼuk, xi chalik li jlome: «¿Kʼusi tskʼan chalbutik li mu bosane?».* Xi chal xtok li yantike: «Yakal chalbe skʼoplal yan santoetik yilel». Taje jaʼ ta skoj ti yakal chalbe skʼoplal li lekil aʼyejetik ta sventa li Jesuse xchiʼuk ta sventa li chaʼkuxesele. 19  Jaʼ yuʼun la stsakik xchiʼuk laj yikʼik batel ta Areopago,* xi laj yalike: «¿Mi xuʼ van xavakʼ jnaʼkutik kʼusi jaʼ li achʼ chanubtasel ti yakal chavalbe skʼoplale? 20  Yuʼun muʼyuk bu kaʼiojkutik-o li kʼusitik chavale, jaʼ yuʼun ta jkʼan ta jnabekutik smelolal li kʼusitik taje». 21  Yuʼun li krixchanoetik ta Atenas xchiʼuk li yan krixchanoetik ti yan-o bu likemik tal* ti te oyik eke, muʼyuk kʼusi xchʼay-o mas skʼakʼalik jaʼ noʼox ti oy kʼusi achʼ chalike xchiʼuk ti oy kʼusi achʼ chaʼiike. 22  Jech oxal vaʼi ta oʼlol Areopago li Pabloe, xi laj yale: «Viniketik ta Atenas, ta skotol li kʼusitik chapasik chkile jaʼ mas chavichʼik ta mukʼ li santoetike, jaʼ mu jechuk tspas li yantike. 23  Kʼalal lixanav xchiʼuk kʼalal la jkʼel lek li kʼusitik chavichʼik ta mukʼe, laj kil xtok jun skajleb matanal* ti oy kʼusi xi tsʼibabile: ‹Sventa jun Dios ti Muʼyuk Ojtikinbile›. Jaʼ yuʼun jaʼ yakal chkalbe skʼoplal li kʼusi chavichʼik ta mukʼ ti mu xavojtikinike. 24  Jaʼ li Dios ti buchʼu la spas balumil xchiʼuk skotol li kʼusitik te oye, li buchʼu taje, ta skoj ti jaʼ Kajvaltik ta vinajel xchiʼuk ta balumile mu xnaki ta templo ti pasbil ta kʼabale, 25  jech xtok muʼyuk chtun yuʼun krixchanoetik sventa xkoltaat, yuʼun li stuke jaʼ chakʼbe xkuxlejal xchiʼuk jaʼ chakʼbe yichʼ ikʼ skotol li krixchanoetike xchiʼuk li yan kʼusitike. 26  Jech xtok, ta jun noʼox vinik la spas krixchanoetik ta spʼejel balumil sventa akʼo nakiikuk ta spʼejel li balumile, jech oxal yalojbe xa onoʼox yorailtak xchiʼuk ti butik noʼox xuʼ xnakiik li krixchanoetike, 27  sventa akʼo saʼik li Diose, yuʼun mi tsaʼilanik ta melele, ta onoʼox staik, yuʼun muʼyuk onoʼox bu nom oy ta jtojolaltik ta jujuntal. 28  Jaʼ kuxulutik yuʼun, chijnikutik* xchiʼuk ti oyutike, jech onoʼox kʼuchaʼal xi yaloj jayvoʼuk j-alnichimalkʼop avuʼunike: ‹Yuʼun xnichʼnabutik ek›. 29  »Jech kʼuchaʼal chkiltike jaʼutik xnichʼnabutik Dios, jaʼ yuʼun mu stakʼ jnoptik ti koʼol kʼuchaʼal oro, plata o pasbil ta ton li Diose o ti pasbil noʼox ta skʼob krixchanoetik jech kʼuchaʼal xtal noʼox ta snopbenike. 30  Ta melel, li Diose laj xa yorail yuʼun ti jech toʼox tspasik ta skoj ti mu snaʼike; pe li avie yakal chalbe skotol krixchanoetik ta buyuk noʼox ti akʼo sutes yoʼontonike. 31  Jech oxal xchʼakojbe xa jun skʼakʼalil sventa lek tukʼ* chchapan skotol li krixchanoetik ta spʼejel balumile, taje svaʼanoj jun vinik, jaʼ yuʼun kʼalal la xchaʼkuxese jaʼ kʼot ta spatobil yoʼonton skotol li krixchanoetike». 32  Vaʼun kʼalal laj yaʼiik ta sventa ti oy chaʼkuxesele oy junantik ti lik labanvanikuke, pe li junantike xi laj yalike: «Chkaʼikutik to ta yan velta li kʼusitik chavale». 33  Vaʼun iktaatik komel yuʼun li Pabloe, 34  pe oy junantik viniketik ti la xchiʼinik batel Pablo ti kʼotik ta jchʼunolajele. Te oy ek li Dionisio ti jaʼ jchapanvanej li ta nail chapanobbail ta Areopagoe, te oy jun ants ti Damaris sbie xchiʼuk te oy yantik.

Tsʼibetik ta yok vun

Kʼelo glosario.
Kʼelo glosario.
Kʼelo glosario.
O: «chʼitane».
Kʼelo glosario.
O: «ti te oyik ta vulaʼale».
Kʼelo glosario.
O: «chijbakʼutik».
Kʼelo glosario.