Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Echos 13:1-52

LI KʼUSITIK YICHʼOJE

  • Takatik batel ta abtel li Bernabe xchiʼuk Sauloe (1-3)

  • Spukbel skʼop Dios ta Chipre (4-12)

  • Laj yal mantal ta Antiokia ta Pisidia li Pabloe (13-41)

  • Albatik ti akʼo xbatik ta stojolal li jyanlumetike (42-52)

13  Li ta tsobobbail ta Antiokiae oy te j-alkʼopetik xchiʼuk jchanubtasvanejetik: Bernabe, Simeon ti Nijer yan sbie, Lusio ti likem ta Sirenee xchiʼuk Manaen ti koʼol chanunaj xchiʼuk Erodes ti jaʼ ajvalil ta yosilal Galileae, xchiʼuk Saulo.  Kʼalal yakal chtunik ta stojolal Jeova xchiʼuk tspasik ayunoe,* xi laj yal li chʼul espiritue: «Tʼujbeikun li Bernabe xchiʼuk Saulo ta sventa li abtelal ti kaloj xa onoʼox tspasike».  Vaʼun kʼalal laj xaʼox spasik ayuno xchiʼuk orasione, laj yakʼ skʼobik ta stojolalik, laje laj yakʼik akʼo batikuk.  Jech oxal li viniketik ti takbilik batel yuʼun chʼul espiritue yalik batel ta Seleusia, vaʼun te ochik batel ta varko sventa chbatik ta Chipre.  Vaʼun lik spukbeik skʼoplal skʼop Dios ta nail tsobobbailetik yuʼun judaetik kʼalal kʼotik ta Salaminae. Te xchiʼukik ek li Juane, yuʼun jaʼ yajtunelik.  Kʼalal laj xaʼox xtuchʼik li lum joyol ta nab kʼalal to ta Pafose, te la staik jun juda vinik ti Bar-Jesus sbie, jaʼ jun j-akʼchamel* xchiʼuk jloʼlavanej j-alkʼop.  Te xchiʼuk li ajvalil* Serjio Pauloe, jun pʼijil vinik. La stak ta ikʼel li Bernabe xchiʼuk Sauloe, ta sjunul yoʼonton tskʼan chchikinta skʼop Dios li ajvalil taje.  Pe lik kontrainvanuk li Elimas* ti jaʼ jun j-akʼchamele (taje jech ta alel li sbi kʼalal chichʼ jelubtasele), yuʼun tskʼan chchibajesbe xchʼunel yoʼonton li ajvalile.  Jech oxal li Saulo, ti Pablo yan sbi xtoke, lik ventainatuk yuʼun chʼul espiritu, vaʼun la skʼelbe lek sat 10  xchiʼuk xi laj yale: «Jloʼlavanej vinikot ta jyalel xchiʼuk toj chopolot, xnichʼonot Diablo, akontrainoj skotol li kʼusitik tukʼe, ¿mi muʼyuk chavikta aba ta sokesbel li stukʼil betak Jeovae? 11  ¡Kʼelo avil! Chakʼ atoj amul li Jeovae, maʼsat chakom xchiʼuk muʼyuk chavil xojobal Kʼakʼal kʼuk sjalil». Vaʼun ta anil noʼox la stsin sba talel lumal tok* xchiʼuk ikʼal osil ta stojolal, jech oxal te xa xjoyet tsaʼ buchʼu xuʼ xnitat batel. 12  Jaʼ yuʼun kʼot ta jchʼunolajel li ajvalil kʼalal laj yil li kʼusi kʼot ta pasele, yuʼun chʼayal to kom yoʼonton ta skoj li chanubtasel yuʼun Jeovae. 13  Li Pablo xchiʼuk xchiʼiltake ochik batel ta varko, te likik ta Pafos, kʼotik ta Perga ta Panfilia. Yan li Juane iktavan, vaʼun sut batel ta Jerusalen. 14  Pe li stukike la stam-o batel sbeik, te likik ta Perga, vaʼun kʼotik ta Antiokia ta Pisidia. Ochik batel ta nail tsobobbail li ta skʼakʼalil Savadoe,* vaʼun te chotiik. 15  Kʼalal laj xaʼox yichʼ kʼelel ta stojolal krixchanoetik li Mantale xchiʼuk li kʼusitik yaloj J-alkʼopetike, li bankilal jpasmantaletik ta nail tsobobbaile, xi la stakik batel mantale: «Viniketik, ermanoetik, mi oy kʼusi chavalik sventa chapatbeik yoʼonton li jteklume, alik talel». 16  Jech oxal vaʼi li Pabloe, la spas senya ta skʼob xchiʼuk xi laj yale: «Viniketik ta Israel xchiʼuk voʼoxuk ti axiʼtaojik Diose, aʼiik. 17  Li Dios yuʼun jteklum Israele jaʼ la stʼuj li jmoltotaktik ta voʼnee, xchiʼuk la stoybe skʼoplal li jteklum kʼalal nakiik kʼuchaʼal jyanlumetik ta yosilal Ejiptoe xchiʼuk ta sjuʼel* lokʼesatik tal te. 18  Jech xtok te van 40 jabiluk tsʼikbatik li ta takixokol balumile. 19  Kʼalal laj xaʼox slajes vukub jteklum li ta yosilal Kanaane, akʼbat yosilik sventa chkʼot ta sparteik. 20  Taje jalij van 450 jabil ta skotol. »Kʼalal kʼot xaʼox ta pasel taje akʼbatik jchapanvanejetik, jaʼ to te paj ta skʼakʼalil j-alkʼop Samuel. 21  Kʼalal echʼ xaʼox taje lik skʼanik jun ajvalil li vaʼ kʼakʼale, vaʼun jaʼ akʼbatik yuʼun Dios li Saul xnichʼon Kise, jun vinik ti ta snitilulal* Benjamin likem tale, ajvalilaj 40 jabil. 22  Kʼalal laj xaʼox slokʼese jaʼ vaʼanbatik ta ajvalil li Davide, jaʼ ti buchʼu xi xa onoʼox jamal laj yalbe skʼoplale: ‹Laj xa jta li David xnichʼon Jesee, jun vinik ti xmuyubaj koʼonton* yuʼune, ti tspas skotol li kʼusi oy ta koʼontone›. 23  Jech onoʼox kʼuchaʼal albil skʼoplale, li Diose laj yakʼ jun jkoltavanej ta Israel, jaʼ li Jesuse, ti te lik tal ta snitilulal li vinik taje. 24  Kʼalal skʼan toʼox xvul ta lokʼel li buchʼu taje, li Juane laj xa onoʼox yalbe skʼoplal ta jamal steklumal Israel ti skʼan xichʼik voʼ sventa chakʼik ta ilel ti sutesoj yoʼontonike. 25  Pe xi laj yal li Juan kʼalal tstsuts* xaʼox batel li yabtele: ‹¿Buchʼuun ti avalojike? Maʼukun li buchʼu taje. Pe ¡kʼelo avilik!, oy Buchʼu tsʼakal chtal kuʼun ti mu jta-o sventa ta jtitunbe lokʼel li xonob ta yoke›. 26  »Viniketik, kermanotak, voʼoxuk li xnichʼnaboxuk ta yutsʼ yalal Abraane xchiʼuk li buchʼutik te achiʼukik ti xiʼtaojik Diose, li kʼop ta sventa kolebal liʼe jaʼ laj yichʼ takel tal ta jventatik. 27  Yuʼun li jnaklejetik ta Jerusalen xchiʼuk li jnitvanejetik ta relijion* yuʼunike muʼyuk bu stsakik ta venta li buchʼu taje, yuʼun kʼalal abtejik ta jchapanvanejetike kʼot ta pasel yuʼunik li kʼusi yaloj J-alkʼopetike, ti tsots chichʼ aptael skotol Savadoe. 28  Akʼo mi muʼyuk bu stabeik smul sventa sta-o xichʼ milel, la skʼanbeik ta persa Pilato ti akʼo yichʼ milele. 29  Kʼalal kʼot xaʼox ta pasel skotol li kʼusitik tsʼibabil ta stojolale, la syalesik li ta jtel teʼe, vaʼun te laj yakʼik ta mukinal. 30  Pe li Diose la xchaʼkuxes, 31  jech xtok jal laj yakʼ sba ta ilel ta stojolal li buchʼutik likik batel xchiʼuk ta Galilea kʼalal to ta Jerusalene. Vaʼun jaʼ xa testigo kʼotemik ta stojolal ta sventa li jteklume. 32  »Jaʼ yuʼun li voʼonkutike yakal ta xkalkutik li lekil aʼyejetik ta sventa li kʼusi albilik xa onoʼox li moltotiletik ta voʼnee. 33  Li Diose laj yakʼ kʼotuk ta pasel skotol ta jtojolalkutik ti jaʼunkutik li xnichʼnab totil meʼiletike, taje jaʼo kʼot ta pasel kʼalal la xchaʼkuxes Jesuse, jech kʼuchaʼal xi tsʼibabil ta xchibal salmoe:* ‹Voʼot jnichʼonot, voʼon likʼot ta atot li avi kʼakʼale›. 34  Ti jech la xchaʼkuxese jaʼ sventa mu xichʼ yan velta sbekʼtal jech kʼuchaʼal jun krixchano ti snaʼ xlaje, xi laj yale: ‹Jaʼ chkakʼboxuk li tukʼil kʼanelal ti kalojbe xa onoʼox li Davide, ti jaʼ melelike›. 35  Jaʼ yuʼun xi chal ta yan salmoe: ‹Muʼyuk chavakʼ kʼaʼuk sbekʼtal li buchʼu tukʼ yoʼonton chakʼ sba ta atojolale›. 36  Yan li Davide tun ta stojolal Dios ta sjunul xkuxlejal, vay ta lajelal, te laj yichʼ mukel ti bu mukul smoltotak ta voʼnee, vaʼun kʼaʼ li sbekʼtale. 37  Pe li buchʼu chaʼkuxesat yuʼun Diose muʼyuk bu xkʼaʼ sbekʼtal. 38  »Jech oxal ermanoetik, naʼik me lek ti yakal chichʼ pukbel skʼoplal ti jaʼ ta stojolal ti chichʼ tael perton ta skoj mulile. 39  Jech xtok, ta stojolal li buchʼu taje, xuʼ xal Dios ti chʼabal smulik li buchʼutik chchʼunike. Yan li Smantal Moisese* mu xuʼ xchʼay mulil. 40  Jech oxal chaʼa, kʼelo me abaik lek ti mu me jaʼuk xkʼot ta pasel ta atojolalik li kʼusitik yaloj J-alkʼopetike: 41  ‹Kʼelo avilik jlabanvanejetik, labaluk sba xavaʼiik, lajanik, yuʼun yakal ta jpas jun abtelal li ta akʼakʼalilike, jun abtelal ti mi jaʼuk onoʼox bu chachʼunike, akʼo mi oy buchʼu lek xa xcholet chalboxuk›». 42  Vaʼun, kʼalal yakal xaʼox chlokʼik batele, lik kʼanbatikuk vokol yuʼun krixchanoetik ti akʼo to yalbeik mas skʼoplal ta yan Savado li kʼusitik laj yalike. 43  Kʼalal laj yoʼontonik ta tsobajel li ta nail tsobobbaile, ep judaetik xchiʼuk achʼ jchʼunolajeletik* ti yichʼojik ta mukʼ Diose la stsʼakliik batel li Pablo xchiʼuk Bernabee, kʼalal yakal chkʼopojike laj yalik ti te oyikuk-o li ta slekil yutsil yoʼonton Diose. 44  Li ta yan Savadoe jutuk mu skotoluk jteklum la stsob sbaik sventa chaʼibeik li skʼop Jeovae. 45  Yan li judaetike ch-itʼixajik tajek kʼalal laj yilik li epal krixchanoetike, jech xtok lik yalik ti mu meleluk li kʼusitik chal Pabloe xchiʼuk lik xchopol kʼoptaik tajek. 46  Vaʼun tsots yoʼonton xi laj yal li Pablo xchiʼuk Bernabee: «Persa onoʼox skʼan baʼyel xavichʼik albel voʼoxuk li skʼop Diose. Yuʼun yakal chapʼajik xchiʼuk mu xata-o chavaʼiik ti chata akuxlejalik sbatel osile, ¡kʼelo avilik!, chibatkutik ta stojolal li jyanlumetike. 47  Yuʼun xi laj yalbunkutik Jeova ti akʼo xkalbotkutike: ‹La jvaʼanot kʼuchaʼal lus ta stojolal li jyanlumetike, sventa xakʼot ta jkoltavanej kʼalal to ta stiʼil balumil›». 48  Xkuxet likel yoʼontonik li jyanlumetik kʼalal laj yaʼiik taje, lik stoybeik skʼoplal li skʼop Jeovae xchiʼuk pasik ta jchʼunolajel li buchʼutik oy lek ta yoʼontonik stael li kuxlejal sbatel osile. 49  Jech xtok laj yichʼ pukel batel ta sjunul lum li skʼop Jeovae. 50  Pe li judaetike lik stijbeik yoʼonton li antsetik ti lek ojtikinbilik ti xiʼtaojik Diose, lik stijbeik yoʼonton li viniketik ti tsots skʼoplalik ta jteklume, jech xtok jaʼ la sokbeik sjol sventa skontrainik li Pablo xchiʼuk Bernabee, vaʼun la snutsik lokʼel li ta jteklume. 51  Jaʼ yuʼun la slilin komel spukukal* yokik ta stojolalik, vaʼun batik ta Ikonio. 52  Ventainbilik-o yuʼun chʼul espiritu li jchankʼopetike xchiʼuk xkuxet noʼox yoʼontonik.

Tsʼibetik ta yok vun

O: «chiktaik veʼele»; «chiktaik ixime»; «chikta yotike»; «chtuchʼ xchʼutike». Kʼelo glosario.
Kʼelo glosario.
Jaʼ jun ajvalil ta yosilal Roma.
Jaʼ onoʼox li Bar-Jesus ti laj yichʼ albel skʼoplal ta versikulo 6.
O: «makal osil».
O: «skʼakʼalil kuxob oʼontonal». Kʼelo glosario.
O: «ta stsatsal skʼob».
O: «smomnichʼon»; «stsʼunbal»; «stsʼakalul».
O: «pʼij koʼn»; «nichim koʼonton».
O: «chlaj».
S.gr.: «ajvaliletik».
Kʼelo glosario.
Kʼelo glosario.
Jaʼ li buchʼutik ochemik xa ta srelijion judaetike.
O: «spolvoal»; «stsʼubil lumal»; «stanil».