Ebreos 13:1-25

  • Slajeb velta chal mantal xchiʼuk chabanuk xi batel xtok (1-25)

    • Mu me xchʼay xavaʼiik ti lek xachʼamvanike (2)

    • Ichʼbiluk me ta mukʼ avuʼun li nupunele (4)

    • Chʼunbeik me smantal li buchʼutik jbabee (7, 17)

    • Kakʼtik milbil matanaletik sventa skʼupil kʼoptael Diose (15, 16)

13  Jechuk-o xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele.*  Mu me xchʼay xavaʼiik ti lek xachʼamvanike,* yuʼun ti jech la spasik li junantike muʼyuk laj yakʼik venta ti anjeletik la xchʼamike.  Vuleso me ta ajolik li buchʼutik tikʼajtik ta chukele, te xa oyoxuk ta chukel xavaʼi abaik ek, vuleso me ta ajolik xtok li buchʼutik chichʼik ilbajinele, yuʼun liʼ oyoxuk ta balumil eke.  Ichʼbiluk me ta mukʼ avuʼun akotolik li nupunele, mu me sokes sbaik li buchʼutik nupunemike, yuʼun chchapan jmulivajeletik* li Diose xchiʼuk li buchʼutik tsloʼla snup xchiʼilike*.  Maʼukuk me batem ta avoʼontonik skʼanel takʼin ti kʼu yelan kuxuloxuke, muyubajanik* noʼox me ta skoj ti kʼusi oy avuʼunik avie. Yuʼun xi yaloje: «Muʼyuk chkiktaot jutebuk xchiʼuk muʼyuk ta jkomtsanot jutebuk».  Jaʼ yuʼun lek tsots koʼontontik xi chkaltike: «Jaʼ jkoltavanej kuʼun li Jeovae; muʼyuk chixiʼ. ¿Kʼusi xuʼ spasbun li krixchanoe?».  Vuleso me ta ajolik li buchʼutik jbabe avuʼunik ti jaʼ yalojboxuk li skʼop Diose, kʼalal chakʼelbeik lek tajek li kʼusi chkʼot ta pasel yuʼun li stalelalike chanbeik me li xchʼunel yoʼontonike.  Mu snaʼ xjel-o li Jesukristoe, jaʼ jech-o li voljee, li avie xchiʼuk sbatel osil.  Mu me xalajik ta loʼlael yuʼun li yantik chanubtasele xchiʼuk li chanubtaseletik ti mu xavojtikinike; yuʼun mas lek mi chichʼ tsatsubtasel ta slekil yutsil oʼontonal li avoʼontonike, ti maʼuk li ta veʼliletike,* yuʼun muʼyuk la stabeik sbalil li buchʼutik jaʼ bat ta yoʼontonike. 10  Oy jun skajleb matanal kuʼuntik ti mu stakʼ slajesik li kʼusitik te oy ta sba li buchʼu sbainojik ta spasel chʼul abtelal ta karpanae. 11  Yuʼun chichʼ chikʼel ta spat karpanaetik li sbekʼtal chonbolometik taje, pe li xchʼichʼele chichʼ ichʼel ochel ta Batsʼi Lekil Chʼul Kuarto jech kʼuchaʼal matanal sventa mulil, ti jaʼ chichʼ ochel li mero bankilal palee.* 12  Jech oxal ta spat stiʼ jteklum laj yil svokol ek li Jesuse, sventa xchʼultajes ta xchʼichʼel li jteklume. 13  Jaʼ yuʼun batik ta stojolal li ta spat karpanaetike, kuchuk kuʼuntik li chopol kʼoptael jech kʼuchaʼal kuch yuʼune, 14  yuʼun muʼyuk kuʼuntik junuk jteklum ti liʼ oy-oe, jaʼ ta jsaʼtik ta sjunul koʼontontik ti jaʼ to chtale. 15  Ta sventa Jesus jech-o me kakʼtik milbil matanaletik ti jaʼ skʼupil kʼoptael li Diose, jaʼ xkaltik, jaʼ li kʼusi chlokʼ ta ketik ti jamal chalbe skʼoplal ta stojolal krixchanoetik li sbie. 16  Jech xtok, mu me xchʼay ta ajolik spasel li kʼusi leke xchiʼuk ti xavakʼbeik yantik li kʼusi oy avuʼunike, yuʼun lek tajek chil Dios li milbil matanaletik taje. 17  Chʼunbeik me smantal li buchʼutik jbabe avuʼunike xchiʼuk akʼo me abaik ta ventainel ta stojolalik, yuʼun yakal chchabioxuk xchiʼuk chichʼik chapanel ti kʼu yelan chchabioxuke, sventa xmuyubaj noʼox tspasik, mu ta jikʼ oʼontonuk, yuʼun mi tsjikʼ yoʼonton avuʼunike yikʼaluk me oy kʼusi chopol chkʼot ta atojolalik un bi. 18  Pasik-o me orasion ta jtojolalkutik, yuʼun jpatoj koʼontonkutik ti sak* jol koʼontonkutike, yuʼun oy ta koʼontonkutik ti sakuk jtalelalkutik ta skotol li kʼusitike. 19  Pe li kʼusi mas ta jkʼane jaʼ ti xapasik orasion sventa xbat noʼox jkʼeloxuk ta orae. 20  Jaʼ yuʼun chaʼa, li Dios ti chakʼ jun oʼontonale, ti la xchaʼkuxes li mukʼta jchabichij, ti jaʼ li Kajvaltik Jesuse, xchiʼuk li xchʼichʼel ti jaʼ sventa trato sbatel osile, 21  akʼo yakʼboxuk skotol kʼusitik lek sventa xapasbeik li kʼusi tskʼan yoʼontone xchiʼuk ta stojolal Jesukristo tstij koʼontontik ta spasel li kʼusi lek tajek chil ta sate, jaʼuk noʼox stuk akʼo yichʼ ichʼel-o ta mukʼ sbatel osil. Jechuk.* 22  Jaʼ yuʼun ta jtij avoʼontonik kermanotak ti tsʼikuk me avuʼunik kʼalal chachikintaik li spatobil oʼontonal liʼe, yuʼun jutuk noʼox kʼusitik la jtsʼibaboxuk li ta jkartae. 23  Ta jkʼan chanaʼik ti la skoltaik xa lokʼel li kermanotik Timoteoe. Mi tal noʼox ta orae, ta jchiʼin talel kʼalal chtal jkʼeloxuke. 24  Chabanuk xavalbeik skotol li buchʼutik jaʼ jbabe avuʼunike xchiʼuk skotol li buchʼutik chʼule. Chabanukoxuk la chalik ek li buchʼutik te oyik ta Italiae. 25  Teuk me oy ta atojolalik li slekil yutsil oʼontonale.

Tsʼibetik ta yok vun

O: «ayanele».
O: «ti xavakʼ ta ilel slekil avoʼontonik ta stojolal li jyanlumetike».
Por·nei·a ta griego. Kʼelo glosario.
Kʼelo glosario.
O: «pʼijuk avoʼnik»; «nichimuk avoʼontonik».
Jaʼ xkaltik, jaʼ li kʼusitik stakʼ lajesel xchiʼuk li kʼusitik mu stakʼ lajesel jech kʼuchaʼal chal Smantal Moisese.
Kʼelo glosario.
O: «lek».
Kʼelo glosario.