Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

Apokalipsis 9:1-21

LI KʼUSITIK YICHʼOJE

  • Svoʼobal okʼes (1-11)

  • Jelav xa li baʼyel vokolile, chib to vokolil chtal (12)

  • Svakibal okʼes (13-21)

9  La sjupan yokʼes li svoʼobal anjele. Laj kil jpʼej kʼanal ti pʼaj yalel ta balumil ti ta vinajel lik tale, vaʼun akʼbat li syaveal xabe.*  La sjam li xabe, vaʼun te lokʼ talel chʼail jech kʼuchaʼal xchʼailal jun mukʼta orno, ikʼub li Kʼakʼal xchiʼuk li ikʼ ta skoj li xchʼailal xabe.  Te lokʼ talel kʼulubetik* li ta chʼaile, talik ta sba balumil; vaʼun akʼbat yabtelik, jaʼ jech kʼuchaʼal li yabtel tseketik ta balumile.  Laj yichʼik albel ti mu xilbajinik li tsʼiʼleletik ta balumile xchiʼuk mi jtosuk yaxal xchiʼuk mi jtosuk teʼ, jaʼ noʼox akʼo yilbajinik li krixchanoetik ti muʼyuk bu yichʼoj ta stibaik li seyo Diose.  Akʼbat ti akʼo jech spasik li kʼulubetike, pe maʼuk ti akʼo smilik li krixchanoetike, moʼoj, jaʼ noʼox akʼo yil svokol voʼob u yuʼunik, li svokolike jaʼ jech kʼuchaʼal chakʼ vokolil jkot tsek kʼalal tstiʼ junuk krixchanoe.  Li vaʼ kʼakʼale tsaʼik lajelal li krixchanoetike, pe mi jaʼuk bu tstaik jsetʼuk; tskʼan chchamik, pe chjatav ta stojolalik li lajelale.  Xkoʼolaj kʼuchaʼal kaʼetik ti lek chapalik sventa paskʼop yilel li kʼulubetike; oy kʼusi te li ta sjolike, xkoʼolaj kʼuchaʼal korona ti pasbil ta oroe, xkoʼolaj kʼuchaʼal sat krixchano li satike,  pe xkoʼolaj kʼuchaʼal stsotsil sjol antsetik li stsotsil sjolike. Xkoʼolaj kʼuchaʼal stanal* ye leon li stanal yeike;  xkoʼolaj kʼuchaʼal mak oʼontonal pasbil ta takʼin li smak yoʼontonike. Xkoʼolaj kʼuchaʼal kareta* sventa paskʼop ti jochbil batel ta anil ta epal kaʼetik yaʼel ti kʼu yelan chnik* li xikʼike. 10  Jech xtok oy sneik xchiʼuk oy yakuxail sneik jech kʼuchaʼal li tseke; jaʼ te oy sjuʼel li ta sneik sventa chakʼbeik svokol voʼob u li krixchanoetike. 11  Oy jun ajvalil yuʼunik, jaʼ li anjel sventa xabe. Abadon* sbi li ta evreoe,* yan li ta griegoe* Apolion* sbi. 12  Jelav xa li baʼyel vokolile. ¡Kʼelo avilik! Chib to vokolil chtal mi echʼ xaʼox li kʼusitik taje. 13  La sjupan yokʼes li svakvoʼal anjele. Vaʼun laj kaʼi yechʼomal eil ti te chlik talel li ta xulub skajleb matanal* pasbil ta oro ti te oy ta yeloval Diose, 14  ti xi albat li svakvoʼal anjel ti stomoj yokʼese: «Koltao li chanvoʼ anjeletik ti te chukulik ta nopol mukʼta ukʼum Eufratese».* 15  Vaʼun laj yichʼik titunel li chanvoʼ anjeletike, ti chapalik xa onoʼox ta sventa li orae, li kʼakʼale, li ue xchiʼuk li jabile, sventa junuk xa noʼox kuarto kuxul xiktaik li krixchanoetike. 16  Li yepal soltaroetik kajajtik ta kaʼe jaʼ 200 miyon ta voʼ: laj kaʼi ti kʼu yepalike. 17  Xi li-akʼbat kil* ti kʼu yelan li kaʼetik xchiʼuk li buchʼutik te kajajtik batele: tsoj smak yoʼontonik kʼuchaʼal kʼokʼ, asul kʼuchaʼal jasinto xchiʼuk kʼon kʼuchaʼal asufre; xkoʼolaj kʼuchaʼal sjol leon li sjol kaʼetike, jech xtok chlokʼ talel kʼokʼ, chʼail xchiʼuk asufre li ta yeike. 18  Jun xa noʼox kuarto kuxul kom krixchanoetik ta skoj li oxtos vokolil taje, li kʼokʼe, li chʼaile xchiʼuk li asufre chlokʼ ta yeike. 19  Yuʼun ta ye xchiʼuk ta sne oy sjuʼel li kaʼetike; yuʼun xkoʼolaj kʼuchaʼal chon* li sneike, jech xtok oy sjolik xchiʼuk jaʼ chakʼ vokolil li sneike. 20  Pe li yantik krixchanoetik ti muʼyuk chamik ta skoj li vokoliletik taje muʼyuk la sutes yoʼontonik ta skoj li yabteltak skʼobike; muʼyuk bu xiktaik ta yichʼel ta mukʼ li pukujetike* mi jaʼuk bu xiktaik ta yichʼel ta mukʼ li santoetik pasbil ta oro, ta plata, ta kovre, ta ton xchiʼuk ta teʼe, ti mu xilik osile, ti mu xaʼiik kʼoponel xchiʼuk ti mu xanavike. 21  Jech xtok muʼyuk la sutes yoʼontonik ta skoj ti jmilvanejetike, ta skoj ti tspasilanik espiritismoe,* ta skoj ti jmulivajeletike* xchiʼuk ta skoj ti j-elekʼetike.

Tsʼibetik ta yok vun

Kʼelo glosario.
Kʼelo glosario.
O: «sbakil».
Kʼelo glosario.
O: «chbakʼ».
Jaʼ xkaltik, Lajelal.
Kʼelo glosario.
Kʼelo glosario.
Jaʼ xkaltik, Jlajesvanej.
Kʼelo glosario.
Kʼelo glosario.
Kʼelo glosario.
O: «kiletel chon».
Kʼelo glosario.
Kʼelo glosario.
Por·nei·a ta griego. Kʼelo glosario.