Apokalipsis 7:1-17

  • Li chanvoʼ anjeletike tspajesik ikʼ sventa mu sokes li balumile (1-3)

  • Laj yichʼ seyoalik 144 mil (4-8)

  • Epal krixchanoetik slapojik natil sakil kʼuʼil (9-17)

7  Kʼalal kʼot xaʼox ta pasel taje laj kil chanvoʼ anjeletik ti vaʼajtik ta xchanjotal xchikin balumil ti yakal tspajesik li xchanjotal ikʼ ta balumile, taje jaʼ sventa jech mu xtal ikʼ li ta sba balumile, li ta nabe mi jaʼuk ta jtekʼuk teʼ.  Jech xtok laj kil yan anjel ti chlokʼ ta slokʼeb Kʼakʼal ti yichʼojbe jun seyo* kuxul Diose; oy kʼusi tsots laj yalbe li chanvoʼ anjeletik ti jaʼ akʼbil ta sbaik akʼo sokesik li balumil xchiʼuk li nabe,  xi laj yale: «Mu xasokesik li balumile, li nabe mi jaʼuk li teʼetike, jaʼ to xasokesik mi laj xaʼox kakʼbekutik seyoal ta stibaik li smosotak Jdiostike».  Jaʼ yuʼun laj kaʼi ti kʼu yepal laj yichʼ seyoalike, 144 mil laj yichʼ seyoalik ta skotol li snitilulaltak* xnichʼnab Israele:  Li ta snitilulal Judae lajchaʼmil laj yichʼ seyoalik;li ta snitilulal Rubene lajchaʼmil;li ta snitilulal Gade lajchaʼmil;  li ta snitilulal Asere lajchaʼmil;li ta snitilulal Neftalie lajchaʼmil;li ta snitilulal Manasese lajchaʼmil;  li ta snitilulal Simeone lajchaʼmil;li ta snitilulal Levie* lajchaʼmil;li ta snitilulal Isakare lajchaʼmil;  li ta snitilulal Sabulone lajchaʼmil;li ta snitilulal Josee lajchaʼmil;li ta snitilulal Benjamine lajchaʼmil laj yichʼ seyoalik.  Oy kʼusi laj kil kʼalal kʼot xaʼox ta pasel taje, vaʼun, ¡kʼelo avilik!, oy epal krixchanoetik ti muʼyuk buchʼu xchap yuʼune, likemik tal ta skotol lumetik, nitilulaletik, jteklumetik, ta jeltos kʼopetik ti te vaʼajtik ta yeloval li chotlebal sventa ajvalilale xchiʼuk li ta yeloval Chʼiom Chije, slapojik natil sakil kʼuʼil; jech xtok stsakojik yanal xan. 10  Xchiʼuk xi tsots chalilanike: «Jaʼ chakʼ kolebal li Jdiostike, jaʼ li buchʼu te chotol ta chotlebal sventa ajvalilale, xchiʼuk chakʼ ek li Chʼiom Chije». 11  Jech xtok, te vaʼajtik ta spat xokon chotlebal sventa ajvalilal skotol li anjeletike, ta spat xokon li moletike xchiʼuk ta spat xokon li chanib kuxlejaletike, vaʼun la skejan sbaik ta yeloval li chotlebal sventa ajvalilale xchiʼuk laj yichʼik ta mukʼ li Diose, 12  xi laj yalike: «¡Jechuk! Li kʼupil kʼoptaele, li mukʼulale, li pʼijilale, li stojel ta vokole, li ichʼel ta mukʼe, li juʼelale xchiʼuk li tsatsalile jaʼuk noʼox stuk akʼo yichʼ albel-o sbatel osil li Jdiostike. Jechuk». 13  Vaʼun xi laj yalbun jun li ta skotol moletike: «¿Buchʼutik xchiʼuk bu likemik tal li buchʼutik slapoj snatil sakil kʼuʼike?». 14  Jech oxal ta ora noʼox xi laj kalbee: «Voʼot anaʼoj Kajval». Xi laj yalbune: «Liʼe jaʼ li buchʼutik kuxul chkomik li ta mukʼta tsatsal vokolile, ti laj xa xchukʼ li snatil kʼuʼike xchiʼuk ti laj xa sakubtasik ta xchʼichʼel li Chʼiom Chije. 15  Jaʼ yuʼun te oyik ta yeloval li chotlebal sventa ajvalilal yuʼun Diose; te tspasik chʼul abtelal* ta kʼakʼal-akʼobal li ta stemploe; jech oxal li Buchʼu te chotol li ta chotlebal sventa ajvalilale chchapan jun karpana sventa xichʼik chabiel. 16  Jaʼ yuʼun muʼyuk xa bu chilik viʼnal, muʼyuk xa bu chilik takitiʼil, mi jaʼuk xa bu chlajik ta kʼakʼal xchiʼuk mi jaʼuk xa kʼusi chchikʼatik, 17  yuʼun li Chʼiom Chij ti te oy ta yeloval chotlebal sventa ajvalilale chkʼot kʼuchaʼal jchabichij yuʼunik xchiʼuk chbeiltasatik batel ta nioʼ ti chakʼ kuxlejale. Jaʼ yuʼun tskusbat skotol yaʼlel satik yuʼun li Diose».

Tsʼibetik ta yok vun

Kʼelo glosario.
O: «smomnichʼnabtak»; «stsʼunbalilaltak»; «stsʼakalulilaltak».
Kʼelo glosario.
Kʼelo glosario.