2 Tesalonisenses 3:1-18

  • Pasik-o me orasion (1-5)

  • Pʼijubtasel ta sventa li buchʼu mu xichʼ smelole (6-15)

  • Kʼopoj batel slajeb velta (16-18)

3  Ta slajebe kermanotak, pasik-o me orasion ta jtojolalkutik sventa jech-o ta anil xvinaj batel li skʼop Jeovae xchiʼuk akʼo yichʼ toybel skʼoplal jech kʼuchaʼal yakal chkʼot ta pasel ta atojolalike;  jech xtok sventa xikolkutik ta stojolal li chopol viniketik ti chakʼik vokolile, yuʼun maʼuk kuʼuntik jkotoltik li xchʼunel oʼontonale.  Pe tukʼ li Kajvaltike, jaʼ tstsatsubtas avoʼontonik xchiʼuk chchabioxuk ta stojolal li buchʼu chopole.*  Jech xtok, jpatoj koʼontonkutik ta stojolal Kajvaltik ti yakal chapasik xchiʼuk ti chapasik-o batel li kʼusi laj kalkutike.  Jechuk-o akʼo lek sbeiltas batel avoʼontonik Kajvaltik sventa xakʼanik li Diose xchiʼuk ti stsʼik avuʼunik ta skoj li Kristoe.*  Tana un chkalbotkutik avaʼiik ta sbi Kajvaltik Jesukristo ermanoetik, ti xachʼak abaik ta stojolal buchʼuuk ermanoal ti mu xichʼ smelole, ti maʼuk jech yakal tspas jech kʼuchaʼal nopem xavaʼiik spasel ti la achanik* ta jtojolalkutike.  Yuʼun li voʼoxuke anaʼojik kʼuxi xuʼ xachanik jtalelalkutik, yuʼun lek kichʼoj jmelolkutik la jpas jbakutik ta atojolalik,  maʼuk ta matanal la jlajeskutik li kʼusi la jlajeskutike. Tsots li-abtejkutik xchiʼuk tsots laj kakʼ jvokolkutik, kʼakʼal-akʼobal li-abtejkutik sventa mu xikʼotkutik kʼuchaʼal alal ikatsil ta atojolalik.  Maʼuk ti muʼyuk kichʼoj kabtelkutike, moʼoj, yuʼun oy ta koʼontonkutik ti xachanik li kʼusi ta jpaskutike. 10  Jech xtok, kʼalal te toʼox jchiʼukotkutike, laj kalbotkutik li mantal liʼe: «Mi oy buchʼu mu skʼan x-abteje, akʼo mu xveʼ xtok». 11  Yuʼun chkaʼikutik ti oy junantik ta atojolalik ti mu xichʼ smelolike, muʼyuk tspasik jtosuk abtelal, tstikʼ sbaik ta sventa li kʼusi mu sventaik-oe. 12  Li buchʼutik taje ta xkalbekutik mantal xchiʼuk ta jtojobtaskutik ta stojolal Kajvaltik Jesukristo ti ta sjunuluk yoʼonton abtejikuke xchiʼuk ti veʼikuk ta skoj ti tspasik kanale. 13  Yan li voʼoxuke ermanoetik, mu me xavikta abaik ta spasel li kʼusi leke. 14  Pe mi oy buchʼu mu xchʼun li kʼusi chkalkutik ta karta liʼe, akʼbeik me senyail xchiʼuk mu xa xachiʼinik yoʼ xichʼ kʼexlaltasel. 15  Pe mu me avajkontraikuk xavilik, jaʼ lek pʼijubtasik-o kʼuchaʼal jun ermano. 16  Ta kʼusiuk noʼox akʼo yakʼboxuk-o jun oʼontonal li Kajvaltik ti chakʼ jun oʼontonale. Teuk oy ta atojolal akotolik li Kajvaltike. 17  Voʼon Pabloun, chabanukoxuk, voʼon la jtsʼiba ta jkʼob jtuk ti jech chkalboxuke, ti jaʼ jech senyail skotol li jkartae; jaʼ jech chitsʼibaj. 18  Oyuk slekil yutsil yoʼonton Kajvaltik Jesukristo ta atojolalik.

Tsʼibetik ta yok vun

O: «Satanas».
Kʼelo glosario.
O: «la xchanik».