Kʼelo li kʼusi yichʼoje

Sventa xasut ta xchibal pajina

Batan ta saʼobil

Stestigotak Jeova

tsotsil

Vivlia ti oy ta Internete | TRADUCCIÓN DEL NUEVO MUNDO DE LAS SANTAS ESCRITURAS

1 Pedro 3:1-22

LI KʼUSITIK YICHʼOJE

  • Ajnilaletik xchiʼuk malaliletik (1-7)

  • Kʼano achiʼilik ta chʼunolajel. Saʼik jun oʼontonal (8-12)

  • Chavil avokolik ta skoj li tukʼilale (13-22)

    • Chapalukoxuk me sventa chapakbeik skʼoplal li spatobil avoʼontonike (15)

    • Li ichʼvoʼe xchiʼuk ti lekuk li ajol avoʼontonike (21)

3  Jaʼ jechoxuk ek ajnilaletik, ichʼik me ta mukʼ li amalalike, sventa mi oy buchʼu mu xchʼunbeik smantal Diose xuʼ spasatik ta kanal ta sventa li stalelal yajnilike, akʼo mi muʼyuk kʼusi chichʼik albel jpʼeluk,  yuʼun chil ta satik ti sak atalelalik xchiʼuk ti lek cha-ichʼvanik ta mukʼe.  Maʼukuk me mas tsots skʼoplal xavaʼiik ti chameltsan abaike —ti kʼu yelan chapechʼ ajolike xchiʼuk ti chakʼupiltas abaik ta oro o ta lekil kʼuʼil pokʼile—,  moʼoj, jaʼuk me ta yut avoʼontonik ti chameltsan abaik ti mu snaʼ xkʼaʼ ti chʼan xi xchiʼuk ti manxo atalelalike, yuʼun jaʼ toj ep sbalil ta sat li Diose.  Yuʼun jaʼ jech la smeltsan sbaik li chʼul antsetik ta voʼne ti la spat yoʼontonik ta stojolal Diose, laj yichʼik ta mukʼ li smalalike,  jech kʼuchaʼal Sara ti la xchʼunbe smantal li Abraane, yuʼun «kajval» xi laj yalbe. Kʼotemoxuk ta stsebetak, jaʼ yuʼun jechuk-o xapasik li kʼusi leke xchiʼuk ti mu xavakʼ abaik ta sibtasele.  Jaʼ jechoxuk ek malaliletik, jechuk-o me junuk avoʼontonik xachiʼinik ta naklej li avajnilike, aʼibeik me lek smelolal ti kʼu yelan chaʼi sbaike. Ichʼik me ta mukʼ kʼuchaʼal jun vaso* ti jaʼ mas kʼune, ti jaʼ li antse, yuʼun koʼol chavuʼunin achiʼukik li matanal sventa kuxlejale, sventa mu xmak ta be li a-orasionike.  Ta slajebe, koʼoluk me kʼusi chanop akotolik, koʼoluk me xavil avokolik, jechuk me xakʼan achiʼilik ta chʼunolajel jech kʼuchaʼal skʼanoj sbaik ta jujuntal li buchʼutik xchiʼil sbaik ta vokʼele,* kʼuxuk me ta avoʼonton xavaʼi abaik xchiʼuk bikʼit me xavakʼ abaik.  Mu me xapakbe abaik ta jujuntal li kʼusi chopole xchiʼuk mu me xachopol kʼopta abaik. Ti kʼusi mas leke akʼik noʼox bendision, yuʼun jaʼ sventa ti laj avichʼik-o takel ta ikʼele, sventa xavuʼuninik li bendision eke. 10  Yuʼun «li buchʼu skʼanoj kuxlejal xchiʼuk ti xmuyubaj noʼox* tskʼan chkuxie skʼan spajes yokʼ ta sventa li kʼusi chopole xchiʼuk skʼan spajes ye ta loʼlavanej. 11  Akʼo xchʼak sba lokʼel ta sventa li kʼusi chopole, jaʼuk akʼo spas li kʼusi leke; jaʼuk akʼo saʼ li jun oʼontonale xchiʼuk jaʼuk stsʼakli batel. 12  Yuʼun te yakʼoj sat Jeova ta stojolal li buchʼutik tukʼike xchiʼuk chchikintabe kʼalal xvokoletike, pe kontra ta sat Jeova li buchʼutik tspasik kʼusitik chopole». 13  Ta melel, ¿buchʼu van chakʼ avokolik mi jaʼ oy ta avoʼontonik spasel li kʼusi leke? 14  Pe xamuyubajik onoʼox akʼo mi chavil avokolik ta skoj li tukʼilale. Jaʼ noʼoxe mu me xaxiʼtaik li kʼusi chiʼtaike, mi jaʼuk xavul avoʼontonik. 15  Ti kʼusi noʼoxe chʼuluk xavaʼi ta avoʼontonik li Kristo ti jaʼ Kajvaltike, chapalukoxuk me skotol ora ta spakbel skʼoplal kʼalal oy buchʼu tsjakʼboxuk srasonal ta sventa li spatobil avoʼontonike, pe manxoukoxuk me kʼalal jech chapasike xchiʼuk ichʼvananik me lek ta mukʼ. 16  Lekuk-o me ajol avoʼontonik, yuʼun ta skoj ti kʼusiuk noʼox chavichʼik-o chopol kʼoptaele, jech xuʼ ta xkʼexavik li buchʼutik tskontrainoxuk ta skoj ti toj lek atalelalik li yajtsʼaklomoxuk Kristoe. 17  Yuʼun mas lek mi chavil avokolik ta skoj ti jaʼ chapasik li kʼusi leke, mi jech tskʼan yoʼonton Dios chkʼot ta pasele, jaʼ altik mi chavil avokolik ta skoj ti jaʼ chapasik li kʼusi chopole. 18  Yuʼun jun noʼox velta ta j-echʼel cham Kristo ta sventa li muliletike, cham jun tukʼil vinik ta stojolal epal krixchanoetik ti muʼyuk tukʼike sventa sbeiltasoxuk batel ta stojolal Dios. Cham ta sventa ti oy sbekʼtale, pe chaʼkuxesat yuʼun Dios ta vinajel. 19  Ti vaʼ yelane bat xcholbe mantal li kuxlejaletik ti mu xvinaj ta kʼelel ti tikʼilik ta chukele, 20  ti muʼyuk bu la xchʼunik mantal ta voʼne kʼalal jaʼo jun yoʼonton te stsʼikoj Dios tsmala li ta skʼakʼalil Noe kʼalal jaʼo yakal chichʼ meltsanel li arkae, taje jayvoʼ noʼox krixchanoetik, jaʼ xkaltik, vaxakvoʼ noʼox kuxlejaletik kolik ta sventa li voʼe. 21  Li kʼusi kʼot ta pasele jaʼ noʼox jun senyail* li ichʼvoʼ ti jaʼ yakal chakolik-o avi (maʼuk tslokʼesbe yikʼobal li abekʼtalike, moʼoj, jaʼ ti chakʼanbeik Dios ti lekuk li ajol avoʼontonike) ta sventa li xchaʼkuxesel Jesukristoe. 22  Li stuke te oy ta sbatsʼikʼob Dios, yuʼun bat ta vinajel, jech xtok laj yichʼ akʼbel ta yok ta skʼob li anjeletike, li buchʼutik oy yabtele xchiʼuk li buchʼutik oy sjuʼele.

Tsʼibetik ta yok vun

Kʼelo glosario.
O: «ayanele».
O: «pʼij noʼox yoʼn»; «nichim noʼox yoʼonton».
Kʼelo glosario.