Kʼelo li kʼusi yichʼoje

Batan ta saʼobil

1 Korintios 6:1-20

LI KʼUSITIK YICHʼOJE

  • Ermanoetik ti oy skʼopike (1-8)

  • Li buchʼutik muʼyuk chuʼuninik li Ajvalilal yuʼun Diose (9-11)

  • Toybeik skʼoplal Dios ta abekʼtalik (12-20)

    • «¡Jatavanik lokʼel ta stojolal li mulivajele!» (18)

6  Kʼalal oy junuk avuʼunik ti oy skʼop xchiʼuk yane, ¿mi chbat van ta nail chapanobbail te ta stojolal viniketik ti muʼyuk tukʼike, ti maʼuk te chbat ta stojolal li buchʼutik chʼule?  O, ¿mi yuʼun mu xanaʼik ti jaʼ chchapan krixchanoetik li buchʼutik chʼule? Yuʼun mi voʼoxuk chachapanik li krixchanoetike, ¿mi mu van xuʼ avuʼunik chachapanik li kʼusitik mu masuk tsotsik skʼoplale?  ¿Mi mu xanaʼik ti ta jchapantik li anjeletike? Vaʼun chaʼa, ¿kʼu yuʼun ti mu jaʼuk ta jchapantik li kʼusitik sventa kuxlejal liʼe?  Jaʼ yuʼun mi oy kʼusitik skʼan chapanel ta sventa li kuxlejal liʼe, ¿mi jaʼ van chavaʼanik ta jchapanvanejetik li buchʼutik muʼyuk tsakbilik lek ta mukʼ ta tsobobbaile?  Jaʼ sventa chkakʼoxuk ta kʼexlal ti jech chkalboxuke. ¿Mi yuʼun muʼyuk buchʼu pʼij avuʼunik sventa xuʼ xchapanvan ta stojolal li ermanoetike?  Li kʼusi yakal chichʼ pasele, ¡li ermanoetike chbatik ta nail chapanobbail ta stojolal li buchʼutik maʼuk jchʼunolajeletike!  Ta melel, tsalbiloxuk xa ti kʼalal chbat avakʼik ta chapanel li avermanoike. ¿Kʼu yuʼun mu xatsʼikik li kʼusitik muʼyuk tukʼ chapasbatike? ¿Kʼu yuʼun mu xatsʼikik kʼalal chapojbatik li kʼusitik oy avuʼunike?  Pe mu jechuk chapasik, ¡yuʼun kʼajomal chapasbeik kʼusitik muʼyuk tukʼ li avermanotakike xchiʼuk chapojbeik li kʼusi oy yuʼunike!  ¿Mi yuʼun mu xanaʼik ti muʼyuk bu chuʼuninik Ajvalilal yuʼun Dios li buchʼutik muʼyuk tukʼe? Mu xaloʼla aba atukik. Mi jaʼuk li jmulivajeletike,* li buchʼutik chichʼ ta mukʼ santoetike, li buchʼutik tsloʼla xchiʼil ta nupunele,* li viniketik ti mu xa jechuk tspasik ta sventa li chiʼinejbail ta vayele, li viniketik ti chchiʼin ta vayel xchiʼil ta vinikale, 10  li j-elekʼetike, li buchʼu mu x-echʼ yoʼontonik ta skʼanel kʼusitike, li jyakubeletike, li jchopol-loʼiltavanejetike xchiʼuk li buchʼutik tsloʼla krixchanoetik ti jaʼ noʼox tskʼan takʼine, muʼyuk bu chuʼuninik li Ajvalilal yuʼun Diose. 11  Taje jaʼ toʼox jechoxuk jlom li ta voʼnee. Pe sakubtasbiloxuk* xa, chʼultajesbiloxuk xa xchiʼuk tukʼ xa albil akʼoplalik ta sventa sbi li Kajvaltik Jesukristoe xchiʼuk ta sventa li xchʼul espiritu Jdiostike. 12  Stakʼ pasel skotol chkaʼi li kʼusitike; pe mu skotoluk oy sbalil. Stakʼ pasel skotol chkaʼi li kʼusitike; pe muʼyuk chkakʼ spasun ta mantal mi jtosuk li kʼusitike. 13  Li veʼlile jaʼ sventa chʼutil, li chʼutile jaʼ sventa veʼlil; pe xchaʼtosal chichʼ lajesel yuʼun Dios. Jech xtok, li bekʼtalile maʼuk sventa mulivajel, jaʼ sventa Kajvaltik; xchiʼuk li Kajvaltike jaʼ sventa bekʼtalil. 14  Pe chaʼkuxesat* yuʼun Dios li Kajvaltike xchiʼuk ta sjuʼel ta xchaʼkuxesutik ek. 15  ¿Mi mu xanaʼik ti jaʼ stsʼakbenal sbekʼtal Kristo li abekʼtalike? Jaʼ yuʼun chaʼa, ¿mi ta van jtuchʼbe stsʼakbenaltak sbekʼtal Kristo sventa ta jnapʼanbe li jun jchonbail antse?* ¡Moʼoj ta melel! 16  ¿Mi yuʼun mu xanaʼik ti buchʼu chchiʼin jchonbail ants ti tspas ta jun sbekʼtal xchiʼuke? Yuʼun xi chal li stuke: «Tspas ta jun sbekʼtalik li chaʼvoʼike». 17  Pe li buchʼu chchiʼin Kajvaltike jun noʼox snopben chkʼot xchiʼuk. 18  ¡Jatavanik lokʼel ta stojolal li mulivajele! Kʼalal tspas kʼusiuk noʼox yan mulil li krixchanoe muʼyuk bu tsaʼ smul ta sbekʼtal, pe li buchʼu jaʼ tspasilan li mulivajele tsaʼ smul ta sbekʼtal stuk. 19  ¿Mi yuʼun mu xanaʼik ti jaʼ stemplo chʼul espiritu li abekʼtalik te oy ta atojolalik ti jaʼ yakʼojboxuk Diose? Jech xtok, maʼuk avuʼun aba atukik, 20  yuʼun tojbil ti laj avichʼik manele. Jpʼeluk me skʼoplal xatoybeik skʼoplal Dios ti kʼu yelan oy li abekʼtalike.

Tsʼibetik ta yok vun

Por·nei·a ta griego. Kʼelo glosario.
Kʼelo glosario.
Kʼelo glosario.
Kʼelo glosario.
Kʼelo glosario.