Kʼelo li kʼusi yichʼoje

¿Mi chchʼak o tstsob utsʼ alalil li stestigotak Jeovae?

¿Mi chchʼak o tstsob utsʼ alalil li stestigotak Jeovae?

Li stestigounkutik Jeovae chkakʼ kipalkutik ti lekuk tsobol li kutsʼ kalalkutike xchiʼuk li yutsʼ yalal jlakʼnakutike. Oy sbalil chkilkutik ti kʼu yelan chapanbil li utsʼ alalile, yuʼun jnaʼojkutik ti jaʼ yakʼojbe slikeb li Diose (Génesis 2:21-24; Efesios 3:14, 15). Li Diose te chakʼ beiltaseletik ta Vivlia ti skoltaoj krixchanoetik ta epal lumetik sventa xmuyubajikuk xchiʼuk ti lekuk tsobolik li ta snupunelike.

¿Kʼusi tspasik li stestigotak Jeova sventa tstsatsubtasik li yutsʼ yalalike?

Ta yan xtoke, chkakʼ kipalkutik ta yakʼel ta jkuxlejalkutik li beiltaseletik ta Vivliae, ti tskoltaunkutik sventa xijkʼotkutik ta lekil malalil o ajnilal xchiʼuk ta lekil totil meʼiletik (Proverbios 31:10-31; Efesios 5:22–6:4; 1 Timoteo 5:8). Yuʼun li Vivliae xuʼ stsatsubtas li utsʼ alaliletik ti mu koʼoluk kʼusi xchʼunojike (1 Pedro 3:1, 2). Jkʼeltik kʼusi chalik junantik ti pas ta stestigo Jeova ta tsʼakal li snup xchiʼilike:

  • «Skotol kʼakʼal chkutilan jbakutik ti kʼuxi linupunkutik leʼ xa ta svakibal tal jabile xchiʼuk muʼyuk lek chkaʼi jbakutik. Pe kʼalal pas ta stestigo Jeova li Ivete mas xa oy slekil yoʼonton xchiʼuk oy smalael yuʼun. Ti kʼu yelan jel stalelale jaʼ koltavan sventa mu jchʼak jbakutik.» (Clauir, likem ta Brasil)

  • «Kʼalal lik xchan Vivlia xchiʼuk li stestigotak Jeova li jmalal ti Chansa sbie muʼyuk lek laj kil, yuʼun la jnop ti chchʼak utsʼ alaliletik li stestigotak Jeovae. Pe ta tsʼakale laj kakʼ venta ti la skoltaunkutik ta jnupunelkutik li kʼusi chal Vivliae.» (Agness, likem ta Zambia)

Ta yan xtoke, kʼalal ta jcholkutik mantale, ta jchanubtaskutik li krixchanoetik ti kʼuxi xuʼ tskoltautik li Vivlia ta sventa li kʼusitik liʼe:

¿Mi chlik-o kʼop kʼalal jaʼ noʼox tspas ta jchʼunolajel junuk nup chiʼilile?

Bateltike jaʼ jech chkʼot ta pasel. Jech kʼuchaʼal la slokʼes jun aʼyej li empresa Sofres ta 1998, laj yal ti jun li ta jtob nupultsʼakaletik kʼalal jun noʼox tspasik ta stestigo Jeovae tsots lik-o skʼopik ta skoj ti la sjel srelijionike.

Li Jesuse laj onoʼox yal ti tsnuptanik vokolil ta yutsʼ yalalik li yajtsʼaklomtake (Mateo 10:32-36). Li j-al-loʼil Will Durant laj yal ti kʼalal jaʼo tspas mantal li Romae «li yajtsʼaklomtak Kristoe jaʼ la ta smulik ti tsvokʼ sba li utsʼ alalile». * Li avi eke jaʼ jech chtikʼbat smulik bakʼintik li stestigotak Jeovae. Pe ¿mi jaʼ tsaʼik kʼop ta melel li stestigotak Jeovae?

Tribunal Europeo de Derechos Humanos

Kʼalal laj yalik ti jaʼ chchʼak utsʼ alaliletik li stestigotak Jeovae, li Tribunal Europeo de Derechos Humanos laj yal kʼusi ta skoj ti chlikulan-o kʼop ta stojolal li utsʼ alaliletik ti maʼuk stestigotak Jeovae, jaʼo kʼalal muʼyuk «chichʼbe sbaik ta mukʼ li kʼusi xchʼunojike xchiʼuk ti mu xakʼbeik spas yutsʼ yalalik li kʼusi tspasik ta srelijionike». Xi to laj yal li Tribunal Europeo: «Taje jaʼ jech ta xil svokolik skotol li utsʼ alaliletik ta skoj ti jelel srelijionike. Jech chkʼot ta stojolalik li stestigotak Jeova eke». * Akʼo mi muʼyuk lek ilbilik li stestigotak Jeovae chakʼik persa ta xchʼunel li beiltasel ta Vivlia liʼe: «Mu me chopoluk kʼusi xapakbe abaik sutel. [...] Ti bu kʼalal xuʼ chavilike, junuk me avoʼontonik xchiʼuk skotol li krixchanoetike» (Romanos 12:17, 18).

¿Kʼu yuʼun te noʼox tsaʼ snup xchiʼilik ta srelijionik li stestigotak Jeovae?

Li stestigounkutik Jeovae ta jchʼunkutik li tojobtasel ti skʼan jaʼ noʼox xinupunkutik «ta sventa Kajvaltik», jaʼ xkaltik, ti jaʼ noʼox chinupunkutik xchiʼuk li buchʼu koʼol kʼusi jchʼunojkutike (1 Korintios 7:39). Li smantal Dios taje ta jtabekutik sbalil. Li revista Journal of Marriage and Family ta 2010 chal ti «kʼalal koʼol srelijionik li nupultsʼakaletike, ti koʼol kʼusi xchʼunojik xchiʼuk li kʼusitik tspasike» mas onoʼox lek xil sbaik. *

Akʼo mi jech, li stestigotak Jeovae muʼyuk chalbeik li buchʼutik tey ta stsobajelik ti akʼo sutes snup xchiʼilik ta skoj ti maʼuk stestigo Jeovae. Xi chal li Vivliae: «Mi oy junuk ermano ti maʼuk jchʼunolajel li yajnile mu me xikta mi lek chaʼi ti te xchiʼuk ta naklej smalal li antse; jech xtok mi oy junuk ants ti maʼuk jchʼunolajel li smalale mu me xikta mi lek chaʼi ti te xchiʼuk ta naklej yajnil li vinike» (1 Korintios 7:12, 13). Li voʼonkutike ta jchʼunkutik li mantal taje.

^ par. 17 Kʼelo li livro César y Cristo, tomo II, pajina 405.

^ par. 18 Kʼelo li kʼusi kʼot ta nopel yuʼunik ta sventa Testigos de Jehová de Moscú contra Rusia, pajina 26, 27, parafo 111.

^ par. 20 Kʼelo li revista Journal of Marriage and Family, volumen 72, numero 4 (agosto ta 2010), pajina 963.