Tana, li stestigotak Jeovae tskoltaik onoʼox li buchʼutik chil svokolik ta nikel, nojelal ta voʼ o ta yan kʼusitike. Ta jkoltakutik li stestigotak Jeovae xchiʼuk li yan krixchanoetike, jaʼ ta jpaskutik li kʼusi chal ta Gálatas 6:10: «Jaʼ yuʼun jpastic cʼusi lec ta stojol scotol cristianoetic [...]. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique». Jech xtok, ta jpatbekutik yoʼontonik skotol li buchʼutik chil svokolike (2 Corintios 1:3, 4).

Kʼuxi tskolta sbaik

Kʼalal mi echʼ xaʼox jun nikel, nojelal ta voʼ o yan kʼusitike, li moletik ta tsobobbail ti bu kʼot ta pasel taje, chakʼik persa saʼel skotol li buchʼutik chkʼotik ta tsobobbaile yoʼ snaʼik kʼu yelan oyik xchiʼuk kʼusi chtun yuʼunik. Mi laj xaʼox snaʼike chalbeik batel Betel ti kʼu yelan oyike xchiʼuk li koltael laj xa yichʼ akʼele.

Mi mu xuʼ yuʼunik skolta sbaik li tsobobbailetik ti te noʼox nopol oyik sventa xakʼbeik koltael li buchʼutik laj yil svokolike, li Jtsop Jbeiltasvanej yuʼun stestigotak Jeovae tstak batel koltael. Li Betele ta saʼ komiteetik sventa xakʼik li koltael taje xchiʼuk yan stestigotak Jeova ta yantik lumetik chchʼak skʼakʼalik xchiʼuk chakʼik kʼusitik x-ayan yuʼunik (Proverbios 17:17). Li ta baʼyel sigloe jech la spasik ek kʼalal laj yil svokolik ta viʼnal li jchʼunolajeletike (1 Corintios 16:1-4).

Matanal takʼin

Li matanal takʼin chichʼ takel batel ta Betel yuʼun stestigotak Jeovae ta xichʼ tunesel jlomuk sventa xichʼ koltael li buchʼutik laj yil svokolike (Hechos 11:27-30; 2 Corintios 8:13-15). Ta skoj ti muʼyuk tojbilik li buchʼutik chkoltavanike, li matanal takʼin ti kʼejbil ta sventa taje jaʼ noʼox chichʼ tunesel sventa xichʼ koltael li buchʼu chil svokole. Jech xtok lek chichʼ tunesel li matanal takʼine (2 Corintios 8:20).