Li buchʼutik yichʼojik xa voʼ kʼuchaʼal stestigotak Jeova mi laj yiktaik xcholel mantal xchiʼuk mi muʼyuk xa chbatik ta tsobajeletike, muʼyuk chkiktakutik ta xchiʼinel. Moʼoj, jaʼ noʼox chkakʼkutik persa sventa jkoltakutik ta mantal xchiʼuk ti akʼo sut talele.

Kʼalal tsots tspas smul junuk stestigo Jeova ti yichʼoj xa voʼe, xuʼ van xichʼ lokʼesel li ta tsobobbaile. Pe mu ta aniluk noʼox ta xichʼ lokʼesel ta tsobobbail. Mi oy jun stestigo Jeova ti nop xa xaʼi ti mu stsak ta venta li mantaletik ta sventa talelal chal Vivliae xchiʼuk mi muʼyuk la sutes yoʼontone, chichʼ lokʼesel ta tsobobbail, vaʼun muʼyuk xa ta jchiʼinkutik li buchʼu laj yichʼ lokʼesele. Xi jamal chal li Vivliae: «Loqʼueso me ta atojolic li bochʼo toj chopol cʼusi spasoje» (1 Corintios 5:13).

¿Kʼusi chkʼot ta pasel mi jaʼ noʼox laj yichʼ lokʼesel ta tsobobbail li malalile, pe jaʼik to stestigotak Jeova li yajnile xchiʼuk li xnichʼnabe? Akʼo mi muʼyuk xa jmoj oyik ta mantal, jech-o chil sbaik li ta yutsʼ yalalike jech onoʼox. Ti kʼuyelan xil sbaik xchiʼuk li xchiʼilik ta nupunele xchiʼuk li xnichʼnabtake lek chil-o sbaik.

Li buchʼutik laj yichʼik lokʼesel ta tsobobbaile xuʼ xbatik li ta jtsobajelkutike, mi tskʼanik xtoke, xuʼ skʼanbeik koltael ta mantal li buchʼu chtun ta mol ta tsobobbaile. Taje jaʼ sventa xlik spasik yan velta li kʼusitik chichʼ kʼanel yoʼ xkʼotik yan velta ta stestigotak Jeovae. Li buchʼutik lokʼemik ta tsobobbail ti muʼyuk lek chilik li chopol talelale xchiʼuk ti ta sjunul yoʼonton tskʼan chkuxiik jech kʼuchaʼal chal li beiltaseletik ta Vivliae, xuʼ sutik talel li ta tsobobbaile.