Tskolta yermanotakik xchiʼuk tskoltaik yantik krixchanoetik li stestigotak Jeova kʼalal oy vokolile. ¿Kʼu yuʼun ti jech tspasike? Jaʼ ti kʼanvanemike, jech onoʼox kʼuchaʼal ojtikinbil li melel yajtsʼaklomtak Cristoe (Juan 13:34, 35).

Tana un chkalbetik batel jpʼelchaʼpʼeluk skʼoplal li koltael laj yakʼ krixchanoetik ta skoj li vokolil kʼot ta pasel ta marso ta 2011 xchiʼuk li ta oʼloltik batel 2012. Jech xtok laj onoʼox me yichʼik patbel yoʼonton li krixchanoetike xchiʼuk laj yichʼik koltael ta mantal jech onoʼox kʼuchaʼal chichʼ pasele. Li Beteletik yuʼun stestigotak Jeovae la svaʼanik Komiteetik ti chtun ta skoltael ermanoetik ti chil svokolike, jaʼ la sbainik sventa sbeiltasik li abtelale, jech xtok koltavanik ek li tsobobbailetik te noʼoxe.

Japan

Japón. Echʼ nikel xchiʼuk tsunami li ta 11 yuʼun marso ta 2011, jech oxal ep vokoliletik laj yakʼ li ta snorteal Japone. Ta sienal noʼox mil krixchanoetik laj yil svokolik. Ta sjunul yoʼonton koltavanik li stestigotak Jeova ta spʼejel Balumile, laj yakʼ stakʼinik sventa xuʼ xichʼ chaʼavaʼanel li kʼusitik jine xchiʼuk koltavanik ta abtel xtok. Oy ta koʼontonkutik ti xakʼel li video ta sventa li abtelaletik laj yichʼ pasel kʼalal echʼ xaʼox li nikel laj kaltike.

Brasil. Ta sienal noʼox krixchanoetik la smil li nojelal ta voʼe, li jemele xchiʼuk li achʼele. Li stestigotak Jeovae la stakik batel 42 tonelada kʼusitik stakʼ lajesel ti mu snaʼ soke, ep voʼ la stakik batel, lajunmil tonelada kʼuʼil pakʼal xchiʼuk voʼob tonelada kʼusitik xuʼ stunesik, jech kʼuchaʼal xavon o yantik kʼusitik kʼuchaʼal taje. Jech xtok la stakik batel poxiletik xchiʼuk yan kʼusitik.

República del Congo. Te van 32 ta pʼej sna stestigotak Jeova ti ep kʼusitik laj yuʼun ta skoj ti oy kʼusi tʼom li ta snail bu tskʼejik bala o li yantik kʼusitik chtʼome. Batsʼi lajem kom chanpʼej li na taje. Li utsʼ alaliletik ti laj yil svokolik ta skoj taje laj yichʼ akʼbel sveʼelik xchiʼuk skʼuʼ spokʼik, jech xtok te akʼbat svayebik ta sna yantik stestigotak Jeova.

República Democrática del Congo. Laj yichʼ akʼbel xpoxilik li buchʼutik ipik ta kolerae xchiʼuk laj yichʼ akʼbel skʼuʼ spokʼik li buchʼutik nojik ta voʼ ta skoj ti tsots tajek laj yakʼ voʼe. Jech xtok laj yichʼik poxtael, laj yichʼ akʼbel stsʼunubik xchiʼuk oy jayibuk tonelada laj yichʼ akʼbel skʼuʼ spokʼik li buchʼutik jmoj bu tsobolik ta skoj li vokolile.

Venezuela. Nojik ta voʼ xchiʼuk lajik ta jemel ta skoj ti toj tsots laj yakʼ voʼe, jech oxal li Komiteetik ti chtun ta skoltael ermanoetik ti chil svokolike la skoltaik 288 stestigotak Jeova ti laj yil svokolike xchiʼuk mas ta 50 ta pʼej naʼ la xchaʼvaʼanik . Jech xtok yakal tskoltaik li krixchanoetik ta skoj ti oy ta vokol li snaik ta skoj ti yakal chnoj talel li nab ta Valenciae.

Philippines

Filipinas. Noj laj yikta jvokʼ lum li voʼe, jech oxal la stak talel kʼusi stakʼ lajesel li Betele xchiʼuk la stakbe batel skʼuʼ spokʼ li buchʼutik la snuptanik li vokolil taje. Vaʼun kʼalal yal xaʼox li voʼe la skolta sbaik ta abtel sventa xchʼubael kʼusitik li stestigotak Jeova ti te noʼox nakalike.

Canadá. Ta jun bikʼit lum ti Alberta sbie toj echʼ xa noʼox kol kʼokʼ te, jech oxal laj yil svokol li tsobobbail ti Slave Lake sbie. Oy tsobobbailetik ti te noʼox nopol oy ti ep-eptik takʼin laj yakʼik sventa xichʼ tunesel ta sventa li xchʼubael kʼusitike. Pe ta skoj ti muʼyuk bu chtun mas takʼine, li tsobobbail ti laj yichʼ li takʼin taje mas ta oʼlol laj yakʼ sventa xichʼ koltael li buchʼutik chil svokolik (ta nojelal ta voʼ, nikel o yan kʼusitik) ta yantik lumetik ta spʼejel Balumile.

Costa de Marfil. Laj yichʼ akʼbel kʼusitik chuchʼik, bu chvayik xchiʼuk laj yichʼik poxtael li buchʼutik ipik kʼalal skʼan toʼox, kʼalal jaʼo yakal xchiʼuk kʼalal echʼ xaʼox paskʼop li ta lum taje.

Fiyi. Nojik ta voʼ ta skoj ti toj tsots laj yakʼ voʼe, jech oxal laj yil svokolik 192 utsʼ alaliletik ti jaʼik stestigotak Jeovae. Laj yichʼ akʼbel kʼusitik slajesik ta skoj ti jutuk mu skotolikuk ti laj li kʼusitik oy ta sranchoike, yuʼun jaʼ kuxulik-o.

Ghana. Kʼalal noj ta voʼ s-orienteal li lum taje laj yichʼ akʼbel sveʼelik li buchʼutik chil svokolike, stsʼunubik xchiʼuk laj yichʼ chaʼvaʼanbel snaik.

Estados Unidos. Echʼ jayibuk sutub-ikʼ, jech oxal oy 66 sna stestigotak Jeova ta oxib estado ti ep kʼusitik laj yuʼune xchiʼuk lajcheb ti batsʼi laj ta jyalele. Akʼo mi oy xaʼox seguro yuʼun li naetik ti laje, pe laj to yichʼik koltael sventa xichʼ chaʼvaʼanbel li snaike.

Argentina. Li ta sure ep laj yakʼ vokolil li stanil volkane, ep naetik la sokes. Jech oxal koltaatik yuʼun stestigotak Jeova li buchʼutik laj yil svokolike.

Mozambique. Laj yichʼ akʼbel sveʼelik li buchʼutik laj yil svokolik ta skoj ti chʼabal bu chakʼ voʼe.

Nigeria. Laj yichʼik koltael ta takʼin mas ta jtob ta voʼ stestigotak Jeova ta skoj ti yayijik kʼalal lajik ta karoe. Jech xtok ep laj yichʼik koltael li buchʼutik nakalik ta snorteal li lum taje, yuʼun lokʼ ta snaik ta skoj ti la smil sbaik ta skoj ti yantik-o bu likemike xchiʼuk ta skoj ti yantik-o stsʼunbalike.

Benín. Laj yichʼ akʼbel xpoxilik li buchʼutik laj yil svokolik ta mukʼta nojelal ta voʼe, jech xtok laj yichʼ akʼbel skʼuʼ spokʼik, smakobil us, voʼ xchiʼuk laj yichʼ saʼel bu stakʼ xvayik.

Dominican Republic

República Dominicana. Kʼalal jelav xaʼox li urakan Irenee ep tsobobbailetik laj yakʼbeik kʼusitik chtun yuʼunik li buchʼutik laj yil svokolike, jech xtok la skolta sbaik ta smeltsanel li naetik ti bu soke.

Etiopía. Oy chib lum ti bu laj yil svokolik ta skoj ti chʼabal bu chakʼ voʼe, jech xtok oy jun lum ti laj yil svokolik ta skoj li nojelal ta voʼe. Laj yichʼik koltael li lumetik taje.

Kenia. Laj yichʼik koltael ta takʼin li buchʼutik laj yil svokolik ta skoj ti muʼyuk bu chakʼ voʼe.

Malaui. Laj yichʼ koltael li buchʼutik te ch-echʼ yuʼunik vokolil ta Dzalekae.

Nepal. Tsots lajem kom sna jun stestigo Jeova ta skoj jemel. Jech oxal laj yichʼ akʼbel sna sventa te xkom kʼuk sjalil, jech xtok koltaat yuʼun li tsobobbail te noʼoxe.

Papúa Nueva Guinea. Oy chopol krixchanoetik ti la stikʼbeik skʼakʼal vaxakpʼej na ti jaʼ snaʼ stestigotak Jeovae. Ta orae yakal xa chchapan sbaik sventa xichʼ chaʼvaʼanbel li snaike.

Rumania. Oy junantik stestigotak Jeova ti jin snaik ta skoj li nojelal ta voʼe, pe laj yichʼik koltael sventa xichʼ chaʼvaʼanbel li snaike.

Malí. Muʼyuk bu xakʼ lek kʼusi la stsʼunik ta skoj ti muʼyuk bu xakʼ lek voʼe. Koltavan ta takʼin li lum Senegal ti te noʼox nopol xile, la skolta li buchʼutik chʼabal kʼusi slajesike.

Sierra Leona. Li stestigotak Jeova ti doktoretik ti likemik talel ta Franciae la skolta li yermanotakik ti laj yil svokolik ta milbaile.

Tailandia. Ep bikʼtal lumetik te ti laj ta nojelal ta voʼe. Li buchʼutik tskolta li buchʼutik chil svokole la xchʼuba xchiʼuk la smeltsanik 100 ta pʼej na xchiʼuk vakjpʼej Salon sventa Tsobobbail.

República Checa. Kʼalal ep sna stestigotak Jeova laj ta skoj ti nojik ta voʼe, tal li yermanotakik ta Eslovaquia sventa tal koltavanikuke.

Sri Lanka. Ep xa tsuts yuʼunik li abtelal ta skoltael li buchʼutik laj yil svokol ta skoj ti echʼ jun tsunamie.

Sudán. Lokʼ ta sna li stestigotak Jeova ta skoj ti echʼ paskʼop tee, jech oxal ep tajek laj yichʼ takel batel kʼusitik xuʼ slajesik, kʼuʼil pakʼal, xonobil xchiʼuk lona.

Tanzania. Chanlajuneb utsʼ alalil laj kʼusitik yuʼun ta skoj li nojelal ta voʼe. Jech oxal laj yakʼik matanal kʼuʼil pakʼal li tsobobbailetik tee, jech xtok laj yakʼik kʼusitik chtun sventa na. Maʼuk noʼox taje, la xchaʼvaʼanik jpʼej na xtok.

Zimbabue. Oy jvokʼ lum ti laj yilik viʼnal ta skoj ti muʼyuk chakʼ voʼe. Vaʼun laj yichʼ akʼbel sveʼelik xchiʼuk laj yichʼik koltael ta takʼin li buchʼutik laj yil svokolike.

Burundi. Yakal chichʼik poxtael xchiʼuk yakal chichʼik koltael ta yantik kʼusitik li buchʼutik chil svokolike.