Kʼelo li kʼusi yichʼoje

Sventa xasut ta xchibal pajina

Stestigotak Jeova

tsotsil

Ta sjunul yoʼonton ch-abtejik ta moton

Ta sjunul yoʼonton ch-abtejik ta moton

Leʼ xa ta 28 jabil slikel tale, yiktaoj snaik kʼuk sjalil 11,000 stestigotak Jeova sventa chbatik ta svaʼanel kʼusitik ta 120 lumetike. Xmuyubaj noʼox tstunes yipalik xchiʼuk spʼijilik ta spasel abtelal ta tsʼakal ora, muʼyuk tskʼanik tojel.

Ep buchʼutik ti tstoj stuk spasajeik sventa tskolta sbaik li ta abtelale. Jlome jaʼo chbatik ta abtel kʼalal chichʼ svakasionike. Oy junantik xtoke, tskʼanik permiso ta yabtelik, vaʼun jutuk xa chichʼ stojolik.

Mi junuk buchʼu laj yichʼ sujel ta spasel li abtelaletik taje; yuʼun ta sjunul yoʼonton bat spasik li abtelal ti chpuk-o batel mas li lekil aʼyej ta sventa li Ajvalilal yuʼun Dios ta spʼejel Balumile (Mateo 24:14). Li stestigotak Jeovae svaʼanojik ofisinaetik, kuartoetik, imprentaetik ti bu chichʼ pasel Vivliaetike xchiʼuk yan kʼusitik. Maʼuk noʼox taje, yuʼun svaʼanojik Salonetik sventa Asamblea ti x-och yuʼun 10,000 krixchanoetike xchiʼuk Salonetik sventa Tsobobbail ti x-och yuʼun 300 krixchanoetike.

Jech-o chichʼ pasel li abtelal taje. Li Betel ta jujun lume jaʼ sbainoj skʼelel kʼusitik chtun yuʼun li j-abteletik taje. Tsabat skuartoik, chmakʼlinatik xchiʼuk chchukʼbat skʼuʼ spokʼik. Jaʼ jech xmuyubaj ch-abtejik ek li stestigotak Jeova ti te noʼox nakalike.

Sventa xichʼ chapanel xchiʼuk ti lekuk xichʼ kʼelel li abtelale, la spasik jun programa ta 1985 ta sventa li svaʼanel kʼusitik ta spʼejel Balumile. Li buchʼutik tskʼan ch-abtejik tee skʼan oyuk xa 19 sjabilal xchiʼuk kʼalal to ta 55; jech xtok, skʼan snaʼikuk spasel jtosuk abtelal ta svaʼanel kʼusitik. Jlome chpajik chib xemana, yantike mas, yantike chpajik oxib u, pe oy jlome chpajik jun jabil o mas.

¿Pe kʼusi skʼan pasel mi muʼyuk xchanoj spasel jtosuk abtelal yajnil li ermano ti chbat ta abtele? Chichʼ chanubtasel ta xchukel ta alambre li variyae, spakʼel piso, xjuxel xchiʼuk sbonel kʼusitik. Jech xtok, xuʼ skolta sba ta spasel veʼlil xchiʼuk ta xchʼubabel skuarto li j-abteletike.

Kʼalal tsut ta sna li j-abteletike oy buchʼutik tstsʼiba jlik karta sventa tstojik ta vokol. Xi laj yal jun nupultsʼakale: «Ta jkʼan ta jtojkutik ta vokol li matanal la jtakutik ta svaʼanel li Betel ta Budapeste. Yuʼun toj lek tajek yoʼontonik li stestigotak Jeova ta Hungriae xchiʼuk toj lek snaʼ stojik ta vokol. Vokol tajek laj kaʼikutik ti kʼalal yuʼun xa chisutkutik tale, nop kaʼitik ti jun u lipajkutike. Pe jaʼ onoʼox jech ti buyuk xibatkutike. Mi xuʼ chkilkutike jaʼ jech ta jpas kaʼikutik ta primavera xtok. Kʼalal chbat tunkunkutik junuk u li ta abtelal taje, kilojkutik ti mas lek kʼusi ta jnuptan ta jkuxlejalkutike».