Kʼelo li kʼusi yichʼoje

Sventa xasut ta xchibal pajina

Stestigotak Jeova

tsotsil

Yaʼyejal tsobajel ti chichʼ pasel jujun jabile 2014

Tsʼaki sien jabil yuʼun li Ajvalilal yuʼun Diose

Yaʼyejal tsobajel ti chichʼ pasel jujun jabile 2014

Oy van 19,000 krixchanoetik li ta tsobajel ti chichʼ pasel jujun jabil ti jaʼ li numero 130 li ta Watch Tower Bible and Tract Society of Pennsylvania, taje echʼ ta 4 yuʼun oktuvre ta 2014. Te echʼ li ta Salon sventa Asamblea yuʼun stestigotak Jeova ta Jersey City (Nueva Jersey, Estados Unidos) xchiʼuk laj yilik ta video ta yan lumetik xtok.

Li ermano ti oy ta Jtsop Jbeiltasvanej yuʼun stestigotak Jeova ti Mark Sanderson sbie jaʼ la slikes li tsobajele. Kʼalal la slikes li tsobajel taje, laj yal ti tsots skʼoplale, yuʼun tsʼaki xa sien jabil ti laj yichʼ vaʼanel li Ajvalilal yuʼun Mesiase.

Li ermano Sandersone laj yal ti oy oxtos kʼusi pasem yuʼun avi li Ajvalilal yuʼun Dios li sien jabil jelavem xa tale:

  • Cholmantal ta spʼejel Balumil. Ta skoj ti chkoltavan li Jeovae yakʼojbeik yipal yalbel skʼoplal Ajvalilal ta buyuk noʼox li stestigotak Jeovae. Ta 1914 uni jaymil toʼox li jcholmantaletike, pe li ta 2014 kʼotem xa mas ta vaxakib miyon. Jech-o chkakʼbetik yipal spasel jaʼ to mi laj yalbutik Jeova ti tsuts xa li abtelale.

  • Chchabi buchʼutik tsventain ta Balumil li Ajvalilal yuʼun Diose. Skontrainojutik tajek li j-abteletik ta relijion xchiʼuk ta politikae, yuʼun tskʼan tstupʼ jkʼoplaltik ta j-echʼel ti jaʼ stestigoutik Jeovae. Akʼo mi jech, xchabioj steklumal li Jeovae. Ti jpasojtik kanal ta stojolal ajvalil ti te tsakal skʼoplal li chapanel ta Tribunal Supremo de Estados Unidos xchiʼuk ta Tribunal Europeo de Derechos Humanos, jaʼ skʼelobil ti chchabiutik-o ta jkʼakʼaliltik li Jeovae.

  • Jmoj oyutik manchuk mi jeltos jlumaltik xchiʼuk jkʼopojeltik. Li Ajvalilal yuʼun Diose stsoboj krixchanoetik ti jeltos kʼu yelan chʼiemik tal ta sbikʼtalike, jeltos slumalik xchiʼuk skʼopik, jech xtok skoltaoj sventa stsal yuʼunik kʼusiuk vokolil. Xi laj yal li ermano Sandersone: «Jaʼ noʼox spas yuʼun Jeova li kʼusi labal sba chkʼot ta pasel liʼe». Laj yal xtok ti jaʼ jun mukʼta matanal sventa li buchʼutik te oyik li ta tsobajele.

Videoetik: Paso ta avamigo li Jeovae.

Taje jaʼ laj yalbeik skʼoplal jlikel li ta tsobajele, jaʼ uni videoetik sventa kʼoxetik xchiʼuk oy xa ta chib jabil ti jech chlokʼilane. Li ermano Sandersone baʼyel lik yakʼ ta ilel jun video ti bu chal sloʼil jayvoʼ kʼoxetik ta spʼejel Balumil ta sventa li kʼusi xchanojike. Ta skoj ti ta sjunul yoʼonton laj yal sloʼilik li kʼoxetike xchiʼuk ti lek jamal snaʼ xalike kʼot tajek ta yoʼontonik li buchʼutik te oyik ta tsobajele.

Laje laj yakʼ ta ilel li achʼ video ti jaʼ sbi «Mu xaxiʼ: tskoltaot li Jeovae». Li videoe lajcheb minuto chjalij xchiʼuk jaʼ chalbe skʼoplal li uni j-israelal tseb ti tsots yoʼonton laj yalbe yajnil Naamán ti xuʼ xkoltavan li Jeovae (2 Reyes 5:1-14). Laj yichʼ muyesel ta Internet ta lunes 6 yuʼun oktuvre ta 2014 li video taje xchiʼuk ti mas ta 20 jeltos kʼopetik oye.

JW Language.

Li ermano Sandersone laj yal ti oy jun achʼ aplicación sventa selularetik xchiʼuk yan kʼusitik ti stsak Internet ti xuʼ jaʼ xchanik-o yan kʼopetik sventa xcholik-o mantal li stestigotak Jeovae. Yichʼoj van chanmil kʼopetik ta vaxaklajuneb jeltos kʼopetik. Chichʼ tikʼel likel mas kʼopetik, kʼuxi xuʼ xichʼ likesel loʼil ta cholmantal xchiʼuk yan kʼusitik.

Kanal JW.

Muyubajik tajek li buchʼutik te oyik kʼalal laj yichʼ alel ti oy jun achʼ kanal ta television ta Internet ti jaʼ yuʼun li stestigotak Jeovae, taje ta inglés to noʼox oy. Te tspasik tal gravar ta Smeʼ nail abtelal ta Brooklyn (Nueva York, Estados Unidos), tstikʼik tal videoetik, sonetik xchiʼuk audiodramaetik. Jech xtok, jujun u jaʼ tsjelubtas mantal jun ermano li ta Jtsop Jbeiltasvaneje o junuk yajkoltaobba junuk li Komite yuʼunike.

Li ermano Sandersone laj yakʼ ta ilel jun skʼelobil li programae. Taje jaʼ la sjelubtas li ermano Stephen Lett ti chtun li ta Jtsop Jbeiltasvaneje, li ta videoe te chakʼ ta ilel kʼusitik laj yichʼ pasel sventa xichʼ meltsanel ti bu ta xichʼ pasel gravare. Li kanal JW lik yichʼ jelubtasel ta 6 yuʼun oktuvre ta 2014 xchiʼuk xuʼ jkʼeltik ta tv.jw.org.

Li Ajvalilal yuʼun Diose: sien jabil xa ch-ajvalilaj, pe maʼuk to spajeb.

Li ermano Samuel Herd ti chtun li ta Jtsop Jbeiltasvaneje laj yalbe batel skʼoplal li kʼusi echʼ ta jun video ti chakʼ ta ilel kʼuxi lekubem tal cholmantal ta skoj ti chkoltavan li Ajvalilal yuʼun Diose. Li videoe te chakʼ ta ilel voʼneal fotoetik, skʼelobiltak xchiʼuk laj yal sloʼilik li jayvoʼ stestigotak Jeova ti jal xa yochelik ta mantale. Jech xtok, laj yakʼ ta ilel kʼutik yelan chichʼ cholel toʼox mantal, ti kʼu yelan la spasik xchiʼuk kʼu to yepal krixchanoetik laj yilik li «Foto-Drama de la Creación» sbie, ti la stunesik toʼox fonógrafo (xkoʼolaj kʼuchaʼal jun tokadisko), tarjetaetik ti chal mantale, cholmantal ta mukʼta vunetik xchiʼuk karoetik ti oy stokadiskoal xchiʼuk svosinaile, oy chanob vunetik xtok ti tstojobtasutik ta cholmantale.

¿Kʼuxi xuʼ jtabetik sbalil kʼalal ta jnopbetik skʼoplal kʼusi pasem yuʼun li Ajvalilal ti oy xa ta sien jabil ch-ajvalilaje? Kʼalal ta jnopbetik skʼoplale, mas to melel chkiltik li Ajvalilal yuʼun Diose xchiʼuk mas xa ta jkʼan ta jkʼeltik li kʼusi tspas ta jelavele.

Kʼejojetik sventa smuyubtaobil Jeova.

Li ermano David Splane ti chtun li ta Jtsop Jbeiltasvaneje muyubaj yuʼun li buchʼutik te oyike, yuʼun laj yal ti chichʼ chaʼpasel li svunal jkʼejojtik Jkʼejintatik li Jeovae. Ta skoj ti tsots skʼoplal chkiltik li kʼejimol sventa xkichʼtik ta mukʼ li Diose, mas xa lek li kʼusitik chichʼ pasel-o li svunal kʼejoje. Jech chichʼ pasbel spat kʼuchaʼal li achʼ Vivlia ta inglese xchiʼuk jech gris stiʼil xtok.

Li ermano David Splane laj yal xtok ti chlokʼ to tal yan kʼejojetike. Pe chichʼ xa noʼox akʼel ta jw.org li achʼ sonetike, mu persauk jaʼ to jkʼejintatik mi laj xaʼox yichʼ chaʼmeltsanel li svunal kʼejoje.

Lokʼ oxib achʼ sonetik ti la xchanilanik li jbetelitaetik li ta xemanail tsobajele, vaʼun la skʼejintaik li ta tsobajel taje. Li ermano Splane la skolta li jkʼejimoletik sventa skʼejintaik li achʼ kʼejoj ti jaʼ sbi «¡Akʼo taluk li Ajvalilal avuʼune!». Taje laj yichʼ pasel ta skoj ti oy xa ta sien jabil ch-ajvalilaj li Ajvalilal yuʼun Diose. Kʼalal laj yuʼunik skʼejintael li jkʼejimoletike, lik skʼejintaik ek skotol li buchʼutik te oyike. Ta mas tsʼakale la skʼejintaik yan xtok ti xi sbie «Akʼbun yip koʼontonkutik».

Jakʼbat sloʼilik.

Li ermano Gerrit Lösch ti chtun li ta Jtsop Jbeiltasvaneje ta jun video laj yakʼ ta ilel kʼuxi la sjakʼbe sloʼil oxib nupultsʼakal ti oy xa ta sjaylajunebal jabil ch-abtejik ta Betele. Li ermanoetike laj yalik kʼusitik yilojik ti jelemik tale xchiʼuk ti jaʼ skʼelobil ti yantik xlekub li steklumal Diose. Li ermano Gerrite laj yal ti yaloj xa onoʼox Vivlia ti chlekub batel li organisasione xchiʼuk laj yal ti skʼan teuk tijil xijbat xchiʼuk li s-organisasion Jeovae (Isaías 60:17).

Yalbel smelolal kʼusi skʼoplal li jujun loʼile.

Li ermano Splane la sjelubtas jun mantal ti bu laj yal kʼu yuʼun ti maʼuk xa chalbe tajek smelolal kʼusi skʼoplal jujun loʼil li jvuntik avie.

Oy xa ta jayibuk jabile chichʼ toʼox alel ti jaʼ skʼoplal jvokʼ yajtsʼaklomtak Kristo ta jkʼakʼaliltik kʼalal chalbe skʼoplal voʼne yajtuneltak Dios li Vivliae. Jech xtok, jchʼunojtik toʼox ti jutuk mu skotoluk li loʼiletik ta Vivliae jaʼ skʼoplal li steklumal Jeova ta jkʼakʼaliltike. Kʼupil onoʼox sba ti ta jchanbetik skʼoplal kʼuxi ti jaʼ skʼoplal steklumal Dios avi li loʼiletik taje. Vaʼun chaʼa, ¿kʼu yuʼun muʼyuk xa chalbe tajek smelolal kʼusi skʼoplal jujun loʼil li jvuntike?

Li Vivliae ta onoʼox xalbe skʼoplal jlom krixchanoetik xchiʼuk kʼusitik kʼotanuk ta pasel ta voʼne ti jaʼ skʼoplal jtosuk kʼusi chkʼot ta pasele o oy buchʼu chalbe skʼoplal ti tsots skʼoplale. Kʼalal chalbe skʼoplal kʼusi chkʼot ta pasel ta jkʼakʼaliltik li Vivliae, ta sjunul koʼontontik ta jchʼamtik. Xi chal li ermano Splane: «Pe mi muʼyuk kʼusi chal li Vivliae, muʼyuk kʼusi chkaltik ek». Jaʼ yuʼun muʼyuk persa ta jsabetik smelolal ta jujutos li loʼiletik ta Vivliae. Yuʼun mi persa ta jsabetik smelolale, xuʼ van mu xa xkakʼtik venta ti kʼuxi chtun kuʼuntike xchiʼuk li kʼusi chakʼ jchantik li loʼiletik ta Vivliae, akʼo mi chijbat ta vinajel o liʼ chijkom ta Balumile (Romanos 15:4).  *

«Skʼan ‹vikʼiluk me asatik›.»

La sjelubtas jun mantal li ermano Lett ti bu laj yal ti jel xa kʼu yelan chkaʼibetik smelolal li lokʼolkʼop ta sventa li lajunvoʼ tojol tsebetike (Mateo 25:1-13). Xi yelan xa chichʼ aʼibel smelolale: li jnupunele jaʼ li Jesuse, li tojol tsebetike jaʼik li yajtsʼaklomtak ti tʼujbil chbatik ta vinajele (Lukas 5:34, 35; 2 Korintios 11:2). Li lokʼolkʼope jaʼ chalbe skʼoplal li slajebal kʼakʼale, pe jaʼo tstsuts kʼalal yakal li mukʼta tsatsal vokolile. Kʼalal laj yalbe skʼoplal voʼob bol tsebetike, li Jesuse maʼuk laj yal ti chiktaik Jeova li buchʼutik tʼujbil chbatik ta vinajele xchiʼuk ti ta xichʼ sabel xkʼexolike. Yuʼun jaʼ noʼox pʼijubtasvan li Jesuse. Jaʼ jechtik chkʼot ta pasel jech kʼuchaʼal li sloʼilal voʼob tojol tsebetik ti lek pʼijike xchiʼuk li voʼob bol tsebetike, li buchʼutik tʼujbil chbatik ta vinajele ta jujuntal skʼan snop stukik mi tukʼ chakʼ sbaik o mi moʼoj.

Jech kʼuchaʼal laj yichʼ xa alele, mu persauk ta jsabetik yan smelolal li lokʼolkʼop taje. Yuʼun jaʼ noʼox skʼan xkakʼ ta koʼontontik ti kʼuxi xuʼ xtun kuʼuntike. Akʼo mi chijbat ta vinajel o mi jaʼutik li ‹yan chijetike› jkotoltik me oy ta jbatik ti xojobajuk kuʼuntik li luse xchiʼuk ti vikʼiluk li jsatike (Juan 10:16; Markos 13:37; Mateo 5:16). Muʼyuk buchʼu xuʼ tukʼ xakʼ sba ta jventatik. Jaʼ yuʼun, ta jujuntal skʼan vikʼiluk-o jsatik ta mantal xchiʼuk kakʼbetik yipal li cholmantale, vaʼun jech chkakʼtik ta ilel ti ta ‹jkʼantik li kuxlejale› (Deuteronomio 30:19).

«Lokʼolkʼop ta sventa talentoetik.»

Li ermano Anthony Morris ti chtun li ta Jtsop Jbeiltasvaneje la sjelubtas mantal ek, laj yal ti kʼu xa yelan chichʼ chapbel skʼoplal avi li lokʼolkʼop ta sventa talentoetike (Mateo 25:14-30). Avie xi xa yelan chkaʼibetik smelolale: li yajval abtel ta lokʼolkʼope (li Jesuse) ta xakʼbe matanal ta tsʼakal li smosotake (li yajchankʼoptak ti tʼujbil chbatik ta vinajel xchiʼuk ti tukʼ yakʼoj sbaike), jaʼo jech tspas kʼalal mi vule xchiʼuk li matanal taje jaʼ li kuxlejal ta vinajele. Kʼalal laj yal Jesus ti kʼusi chkʼot ta stojolal li chopol mosoile, maʼuk la skʼan laj yal ti oy jvokʼ buchʼutik tʼujbil chbatik ta vinajel ti muʼyuk tukʼ chakʼ sbaike. Yuʼun jaʼ noʼox la spʼijubtasan ti skʼan baxbolik ta abtele xchiʼuk ti mu xchanbeik stalelal li chopol mosoile.

¿Kʼusi xuʼ jchantik yuʼun li lokʼolkʼope? Li yajval abtelale oy kʼusi tsots skʼoplal laj yakʼbe sbain li smosotake. Li Jesus eke oy kʼusi tsots skʼoplal laj yakʼbe komel ta sbaik spasel li yajchankʼoptake: jaʼ li xcholel mantale xchiʼuk li spasel ta yajtsʼaklomtak Kristo li krixchanoetike. Tskʼan ti baxbolutik ta xcholel mantal ti bu kʼalal xuʼ kuʼuntike. Li ermano Morrise laj yalbe li buchʼutik te oyike ti toj lek ti jech yakal chcholik mantal ta sjunul yoʼontonike.

«¿Buchʼu ti poʼot tstsake-o ta kʼop li steklumal Diose?»

Li sbi li slajeb mantale labal sba laj yaʼiik li buchʼutik te oyike, taje jaʼ la sjelubtas li ermano Geoffrey Jackson ti chtun li ta Jtsop Jbeiltasvaneje. Li ermano Jacksone laj yalbe skʼoplal ti chichʼ tsakel ta kʼop yuʼun Gog ta Magog li steklumal Diose (Ezequiel 38:14-23).

Leʼ xa tal jayibuk jabile laj toʼox kaʼibetik smelolal ti Gog xie jaʼ skʼoplal li Satanas kʼalal tenbil xaʼox lokʼel ta vinajele. Akʼo mi jech, li ermano Jacksone laj yal ti ep kʼusitik ta jakʼtik yuʼun kʼalal jech chkaltike. Jech kʼuchaʼal liʼe, li Jeovae yaloj xa onoʼox ti chichʼ lajesel li Gogue, xchiʼuk xi laj yale: «Ta xcacʼot ta sveʼel xulemetic, xchiʼuc ta sveʼel chonbolometic ta teʼtic» (Ezequiel 39:4). Yaloj xa onoʼox xtok Jeova ti «Goge xchiʼuc scotol li yepal xchiʼiltaque» chichʼ mukel ta lum (Ezequiel 39:11). ¿Kʼuxi ti chichʼ mukel li Satanas ti jaʼ jun espiritu o kuxlejal ti mu xvinaj ta kʼelele? Li Satanase chichʼ jipel ochel ta xab jmil jabil, maʼuk ti chlaj ta tiʼel o ti chichʼ mukele (Apokalipsis 20:1, 2). Vaʼun chichʼ lokʼesel ta xab kʼalal mi tsʼaki li jmil jabile, «chlokʼ sloʼla li lumetik ti oyik ta xchanjotal xchikin balumile, li Gog xchiʼuk Magogue» (Apokalipsis 20:7, 8). Jamal ta aʼiel ti mu stakʼ sloʼla Gog li Satanas mi chkaltik ti jaʼ Gog stuke.

Li ermano Jacksone laj yal ti maʼuk Satanas li Gog ta Magog chal ta albil kʼop ta Ezequiele; jaʼ skʼoplal jtsop jteklumetik ti chlik skontrainik li steklumal Dios ta jelavele. Yaʼeluk xtoke ti tstsakvan ta kʼop li Gogue koʼol onoʼox xchiʼuk li kʼusi chal Vivlia ti chkontrainvan li ‹ajvalil ta nortee› xchiʼuk ‹li ajvaliletik ta balumile› (Daniel 11:40, 44, 45; Apokalipsis 17:12-14; 19:19).

¿Buchʼu van li ‹ajvalil ta nortee›? Jaʼ to van ta jnaʼtik ta mas jelavel. Akʼo mi jech, tstsatsub xchʼunel koʼontontik kʼalal chkiltik ti chjam batel mas smelolal li kʼusitik chal Vivlia ti poʼot xa xkʼotanuk ta pasele. Li steklumalutik Diose muʼyuk chijxiʼ-o mi tsakvan ta kʼop li Gog ta Magogue, yuʼun jnaʼojtik ti kʼalal jaʼo jech chkʼot ta pasele ta xichʼ lajesel ta j-echʼel li Gogue, yan li steklumalutik Diose kuxul chijkom-o sbatel osil. *

Stsutseb loʼil.

Li ermano Sandersone laj yal ti chlokʼ ta bikʼit li achʼ Vivlia ta inglese. Jech xtok, laj yal ti chlik yichʼ pasel gravare xchiʼuk ti jeltos buchʼutik tspasik gravar mi ep li buchʼutik chalbe skʼoplal li Vivliae. Ti kʼu yelan xkechet tspasik batel gravare, jaʼ jech xkechet tsmuyesik batel ta jw.org, te ta slikesik ta Mateo.

Li ermanoe laj yal noxtok li teksto sventa sjabilal 2015 jaʼ li Salmo 106:1: «Kolaval utik li Diose, yuʼun oy slekil yoʼonton». Vaʼun la stijbe yoʼonton skotol ermanoetik sventa snopbeik skʼoplal kʼu yuʼun sta-o ti jujun kʼakʼal xkalbetik koliyal li Jeovae.

Li slajeb kʼejoj la skʼejintaike jaʼ xa li yoxibal ti xi sbie «Jeova li abie». Svukvoʼal li buchʼutik chtunik li ta Jtsop Jbeiltasvaneje koʼol la skʼejintaik xchiʼuk li jkʼejimoletike xchiʼuk skotol li buchʼutik te oyike. ¡Solel lek sta-o ti kʼu yelan tsuts li jun tsobajel ti tsots skʼoplale!

^ par. 22 Li mantal liʼe xchiʼuk li chib chtale laj yichʼ lokʼesel li ta mantaletik ti lokʼ ta 15 yuʼun marso ta 2015 li ta revista Li Jkʼel osil ta toyole.

^ par. 30 Li mantal liʼe laj yichʼ lokʼesel li ta mantal ti lokʼ ta 15 yuʼun mayo ta 2015 li ta revista Li Jkʼel osil ta toyole.