Li ta julio ta 2013, la stak batel jun kʼupil sba karta li Jtsop Jbeiltasvanej yuʼun stestigotak Jeova ti jaʼ sventa li misioneroetik xchiʼuk jtuneletik ti ta tsʼakal ora chtunik ta stojolal Dios ti batemik ta yan lumetike. Te albatik batel ta karta ti chichʼ chapanel sventa xbatik ta asamblea rejional xchiʼuk internasional ti ch-echʼ ta 2014 xchiʼuk ta slikebtik 2015.

Maʼuk noʼox sventa xbatik ta asamblea li buchʼutik nom oyik ti jech laj yichʼ chapanele, yuʼun jaʼ sventa xbat svulaʼan li yutsʼ yalalik xtoke xchiʼuk li yamigotakike. Li kartae chal xtok ti chtojbatik li svoletoik ta talel batele.

Manchuk mi oy xa onoʼox jech xchapanojik, jelel xa laj yichʼ pasel. Li Komite sventa Chanubtasel yuʼun Jtsop Jbeiltasvaneje la slikes yan departamento ti Sección de Viajes sbi ti te oy li ta smeʼ nail abtelale, taje jaʼ la sbain smanel li voletoetike.

Kʼalal mu toʼox jaluk stakojik batel li kartae, toj ep buchʼutik lik skʼanik batel li voletoetike. Jaʼ yuʼun, la stsob sba tajek yabtelik ta enero ta 2014 li buchʼutik ch-abtejik li ta departamento Sección de Viajes sbie. Lik saʼik xchiʼuk lik smanbeik svoleto li buchʼutik chtunik ta stojolal Dios ta tsʼakal ora ti oyik ta spʼejel Balumile.

Vokol laj yaʼiik smanel jlom voletoetik. Yuʼun jlome likik tal ta Reykjavík (Islandia) batik ta Cochabamba (Bolivia); yantike likik tal ta Nouméa (Nueva Caledonia) batik ta Antananarivo (Madagascar). Oy jayvoʼuk xtok ti likik tal ta Port Moresby (Papúa Nueva Guinea) ti batik ta Seattle (Washington, Estados Unidos), oy junantik xtoke likik tal ta Ouagadougou (Burkina Faso) ti batik ta Winnipeg (Canadá).

Svoʼobal li buchʼutik ch-abtejik te ta departamento taje te van 19 mil voletoetik la smanik sventa li 4,300 ermanoetik ti oyik ta 176 lumetike. Koliyal ti laj yakʼik matanal takʼin li ermanoetik ta tsobobbailetik ti jaʼ onoʼox sventae, man yuʼunik skotol li vaʼ yepal voletoetike.

La stojik tajek ta vokol li kʼusi laj yichʼ chapanele. Xi laj yalik jun nupultsʼakal ti misioneroetike: «Chisutkutik xa batel ta Asia, jaʼ te ta jcholkutik mantal. Ta jtojkutik tajek ta vokol ti la koltavanik ti li-aykutik ta Inglaterra ti jaʼ li jlumalkutike, yuʼun jaʼ to ay jvulaʼan kutsʼ kalalkutik ti oy xa ta voʼob jabil muʼyuk xkilkutike. Muʼyuk nan libatkutik jechuk ti muʼyukuk xakoltavanike. Jaʼ yuʼun ta jtojbekutik tajek ta vokol skotolik li buchʼutik koltavanike».

Xi laj yal yan misionero ti te chchol mantal ta Paraguaye: «Ta jtojkutik tajek ta vokol xchiʼuk kajnil ti li-aykutik avuʼunik li ta asamblea internasional ti echʼ ta Nueva Jersey (Estados Unidos). Ta slikebaltik 2011, lik xaʼox jtsob kuni takʼinkutik sventa xibatkutik ta Estados Unidos ta yojtikinel li smeʼ nail abtelale. Pe li-albatkutik ta junio ti chlik jvulaʼankutik tsobobbailetik ta senya kʼop li ta Paraguaye. Mas xa nomik chixanavkutik. Jaʼ yuʼun, akʼo mi vokol kʼot ta nopel kuʼuntik, la jnopkutik ti muʼyuk to chibatkutik ta Estados Unidose ti jaʼ lek ta jman jkarokutike, yuʼun mas chtun kuʼuntik. Vaʼun vul li jkartakutik sventa xibatkutik li ta asamblea internasionale. ¡Solel mu to jchʼun laj kaʼikutik! Ta jtojbekutik tajek ta vokol li slekil yoʼonton Jeovae xchiʼuk ti chakʼ ta ilel ti skʼanojunkutike».

Xi la stsʼibaik tal jun nupultsʼakal ta Malaui: «Ta jun koreo noʼox chkalkutik tal avaʼiik ‹Kolavalik tajek›. Mu xa noʼox jnaʼkutik kʼu stsatsal la-abtejik, kʼu sjalil xchiʼuk kʼu xa noʼox yepal takʼin laj yichʼ sventa man avuʼunik skotol li voletoetike. Ta jtojkutik tajek ta vokol li avabtelike, pe mas to li s-organisasion Jeova ti koltavan sventa xibatkutik ta jnakutike, ti xibatkutik ta asamblea internasionale xchiʼuk ti ay jvulaʼan kutsʼ kalalkutik xchiʼuk kamigotakutike».

La skʼupin tajek yabtelik li buchʼutik ch-abtejik ta departamento Sección de Viajes sbie. Xi chal li Mileivie: «Toj kʼupil sba laj kaʼi ti la jkoltakutik li misioneroetik sventa xbat svulaʼan yutsʼ yalalik xchiʼuk yamigotakike». Xi chal li Dorise eke: «Laj kil kʼu to yelan chkʼuxubinatik yuʼun organisasion li buchʼutik batem ta yan lum sventa chtunik ta stojolal Diose». Xi chal Rodney ti jaʼ sbainoj li vaʼ departamentoe: «La jkʼupin tajek ti laj kolta jbae».

Xmuyubajik tajek li stestigotak Jeova ti koltavanik sventa xichʼ yuni motonik li ermanoetik ti yakʼoj ta yoʼontonik xchiʼuk ti baxbolik ta abtele.