AUSTRALIA: «Li buchʼutik ip chaʼiik ti tikʼajtik ta ospital ti jaʼik stestigotak Jeovae —ti muʼyuk chichʼik chʼichʼ ta skoj srelijionike— jaʼ mas anil ch-echʼ yuʼunik, jaʼ mu sta li yantike», jaʼ jech laj yal li periodiko The Sydney Morning Herald ta 2 yuʼun oktuvre ta 2012.

Xi laj yal li periodiko ta sventa li kʼusi laj yal li James Isbister ti jaʼ jun jchanubtasvanej ta Escuela de Medicina ta Sydney (Universidad de Sydney): «Li jchanubtasvanej Isbister laj yal ti laj la skʼelik lek doktoretik ti mu epuk xlokʼ xchʼichʼel stestigotak Jeova kʼalal chichʼik poxtaele, vaʼun mas la lek ti kʼusi kʼot ta pasele. Koliyal taje, mas ta anil echʼ yuʼunik, mu masuk jalijik ta ospital xchiʼuk mu masuk la skʼanik kʼelel, ti jaʼ mu jechuk li buchʼutik laj yichʼik tikʼbel chʼichʼ kʼalal laj yichʼik operasione».

Mu stukuk maʼ jech tsnop li doktor Isbistere. Yuʼun xi laj yal ta 13 yuʼun agosto ta 2012 li revista Archives of Internal Medicine ta sventa li stestigotak Jeova ti laj yichʼik operasion ta yoʼontonike: «Li stestigotak Jeovae jaʼ mu masuk jal tsots laj yaʼibeik yipal xchiʼuk mu masuk jal te oyik ta ospital, ti jaʼ mu jechuk kʼot ta stojolalik li buchʼutik laj yichʼik tikʼbel chʼichʼe».