Li ta slikebaltik julio ta 2011, lik yichʼ lokʼesel sventa xichʼ pasel preva junuk jabil Li Jkʼel osil ta toyole ti mas kʼun ta aʼyele. Tsuts xa li jun jabile, vaʼun li kʼusi kʼot ta nopele jaʼ ti jech xa chichʼ-o lokʼesel li revistae.

Li ta slikebaltik enero ta 2013, Li Jkʼel osil ta toyole ti mas kʼun ta aʼyele laj yichʼ lokʼesel ta francés, portugués xchiʼuk ta español.

Li revista ti mas kʼun ta aʼyele laj yichʼ pasel sventa skoltael li buchʼutik chkʼotik ta tsobobbail inglese, pe ti maʼuk skʼopik ta sbikʼtalike.

Leʼ xa onoʼox kʼalal lik yichʼ pasele, lik vuluk kartaetik ti chalik ti lek laj yaʼiike. Oy jlik kartae jaʼ la stsʼiba Rebeca ti 64 sjabilal ti te nakal ta Liveriae, ti muʼyuk onoʼox bu x-echʼ ta chanob vune. Xi la stsʼibae: «Yakal xa jchan skʼelel li vune. Bakʼintike ta jchan Li Jkʼel osil ta toyole, pe mu xkaʼibe smelol li kʼusi chale. Jaʼ ta jkʼupin xchanel Li Jkʼel osil ta toyole ti mas kʼun ta aʼyele yuʼun xkaʼibe smelol li kʼusi chale».

Epal totil meʼiletike jaʼ tstunesik Li Jkʼel osil ta toyole ti mas kʼun ta aʼyele sventa skolta yalab xnichʼnabik ta xchapanel sbaik li ta Xchanel Li Jkʼel osil ta toyole, taje jaʼ jech sbi jun stsobajel li stestigotak Jeovae.

Xi la stsʼiba Rosemary ti yakal tstsʼites oxvoʼ smomtake: «Toj vokol chkaʼikutik xchiʼuk tsebetik li xchanel Li Jkʼel osil ta toyole. Ta toʼox jtuneskutik diksionario sventa jsaʼkutik kʼusi skʼan xal li kʼopetik tstunese. Chijalijkutik toʼox tajek sventa xkaʼibekutik smelolal jlomuk li mantaletike, bakʼintike oy mu staik lek ta aʼibel smelolal li tsebetike. Li avie chijalijkutik, pe jaʼ xa sventa jsaʼkutik tekstoetik ta Vivlia sventa jkʼelkutik kʼuxi te snitoj sba xchiʼuk li mantale».