Kʼalal skʼan toʼox xakʼan jlikuk Vivlia ta braile ti jaʼ yuʼunik li stestigotak Jeovae kʼelo baʼyel mi oy lek mukʼ yavil avuʼun. Li Traducción del Nuevo Mundo ta braile ti lokʼesbil ta inglés, ta español xchiʼuk ta italianoe yichʼoj 18 kʼalal ta 28 volumenetik xchiʼuk chib metro snatil skʼan yavil.

Pe oy lokʼesbil ta yantik formato xtok ti mas jutuk svolumenale. Yuʼun li buchʼutik snaʼik o chkʼopojik ta brailee xuʼ stsʼibajik te xchiʼuk xuʼ saʼik ta komputadora ti oy kʼusi tstunesik ti xyal xmuy yuni silindroal sventa smeltsan ti kʼu yelan chichʼ tsʼibael li ta brailee. Li maʼsatetike xuʼ staik xchiʼuk xuʼ xchikintaik li vunetike, taje jaʼ koliyal kalal chichʼ kʼatajesel li tsʼibetik sventa stakʼuk xa chikintaele.

Li stestigotak Jeovae oy to kʼusi yan spasojik li ta komputadorae, yuʼun xuʼ xichʼ jelubtasel ta braile li kʼusitik tsʼibabil ta yantik kʼopetike. Sventa xichʼ pasel taje oy kʼusi ta xichʼ tunesel ti jaʼ te tsʼibabil skotol li sletrailtak yantik kʼopetike xchiʼuk ti kʼu yelan chichʼ tsʼibael li ta brailee. Jech xtok spas yuʼun sventa kʼunuk ta kʼelel o kʼunuk ta aʼiel xaʼiik ta braile li maʼsatetike. Ti vaʼ yelan chichʼ pasele jaʼ chkoltavan sventa xichʼ lokʼesel vunetik ta braile xchiʼuk Vivlia ta kʼusuk noʼox kʼopetik, jaʼ noʼox venta mi yichʼoj ti kʼu yelan chichʼ tsʼibael li ta brailee. Jech xtok, te kapal skʼoplal yantik kʼopetik ti mu jechuk chichʼ tsʼibael jech kʼu chaʼal chichʼ tsʼibael li ta españole.

Mas xa ta sien jabil ti jech-o tslokʼesik vunetik ta braile li stestigotak Jeovae, li avie oy xa mas ta balunlajuneb kʼopetik li ta brailee. Manchuk mi muʼyuk bu chichʼ kʼanbel stojol li vunetike, ep buchʼutik chakʼik ti kʼu yepal xlokʼ ta yoʼonton stukike.

Li echʼ xa tal jabiletike, kʼalal chichʼ alel ti oy xa achʼ vunetik li ta mukʼta tsobajel yuʼun stestigotak Jeovae, chalik ti ta tsʼakal to xuʼ skʼanik li vunetik ta brailee. Pe li echʼ jabile laj yichʼik jakʼbel bu junukal mukʼta tsobajel chbatik li maʼsatetik ti chkʼotik onoʼox li ta tsobajeletik yuʼun stestigotak Jeovae xchiʼuk laj yichʼik jakʼbel kʼu yelan tskʼan li svunike; mi ta vun, mi ta komputadora sventa xuʼ stsʼibaik te o mi jaʼ ti bu chichʼ kʼatajesel li tsʼibetik ti stakʼ xa chikintaele.

Li achʼ vunetik ta brailee te laj yichʼ takel batel ti bu ch-echʼ li mukʼ ta tsobajel ti bu chkʼotik li maʼsatetike, vaʼun jmoj xa laj yichʼ svunik jech kʼuchaʼal li yantike. Yan li vunetik ta komputadorae ta jujuntal laj yichʼik takbel batel ta koreo kʼalal jun xaʼox xemana stsutsel li mukʼta tsobajele.

Xi laj yal jun stestigo Jeova ti maʼsate: «Jaʼ jun bendision laj kaʼi ti koʼol xa laj kichʼ jvunkutik jech kʼuchaʼal li yantike. Li ta Salmo 37:4 te chal ti chakʼbutik Jeova li kʼusi oy ta koʼontontik ta jkʼantike. ¡Jaʼ jech kʼot ta pasel li xemana liʼe!». Jun Testigo xtoke x-okʼ xa kʼalal xi laj yale: «Li Jeovae la svul yoʼonton ta jtojolal. Ta jtojbe ta vokol Jeova ti oy ta yoʼonton tskʼelutike».