Kʼelo li kʼusi yichʼoje

Sventa xasut ta xchibal pajina

Stestigotak Jeova

tsotsil

Oy xa ta 50 jabil ti tsots abtejemik talel li ta Srancho Watchtowere

Oy xa ta 50 jabil ti tsots abtejemik talel li ta Srancho Watchtowere

Te van 145 kilometro li ta snorteal Nueva Yorke te oy jaysep osiletik ti ojtikinbil kʼuchaʼal li Srancho Watchtower ti nopol xil li jteklum Wallkill. Li kʼusitik taje tunem talel ta sventa li chanubtasel ta Vivlia chakʼik li stestigotak Jeovae. Li baʼyel jsepe laj yichʼ manel ta 2 yuʼun enero ta 1963, oy xa ta 50 jabil.

Li David Walker ti te xa onoʼox ch-abtej ta slikebale, xi chal ti kʼusi sventa la smanike: «Ta skoj ti yantik x-epaj batel j-abteletik li ta smeʼ nail abtelal yuʼun stestigotak Jeovae, la jkʼelkutik kʼusi skʼan jpaskutik sventa mu toj masuk toyol stojol xlokʼ li veʼlile. Li j-organisasionkutike oy xa onoʼox jsep yosil ta Nueva York, pe te van vakibuk o vaxakibuk ora yiloj li Brooklyne. Pe jaʼuk li Wallkille te noʼox chibuk ora yiloj. Toj echʼ noʼox lek». Te tstsʼunik teʼetik ti chakʼ sate, jeltos itajetik, oy xvakaxik, xchitomik, yalakʼik, te tslokʼesik leche xchiʼuk yan kʼusitik. Ta mas tsʼakale laj to yichʼ manel yan osil te.

Kʼalal echʼem xaʼox lajuneb jabile, epaj batel ta spʼejel Balumil li stestigotak Jeovae, vaʼun oy kʼusitik jel li ta Wallkille. Maʼuk xa noʼox ta xichʼ lokʼesel batsʼi veʼliletik, yuʼun lik yichʼ lokʼesel veʼliletik ta mantal xtok: vunetik ti jaʼ sventa chichʼ tsobel li yajtsʼaklomtak Cristoe (Mateo 9:37; Lucas 10:2; Juan 4:35, 36). Li avi une, chkalbetik batel mas skʼoplal ti kʼusi tunem-o talel li osil taje.

Te chichʼ pasel imprimir. Li ta oʼloltik batel siglo 20, te toʼox ta Brooklyn tspasik imprimir jutuk mu skotoluk li vunetik tstunesik li stestigotak Jeovae. Pe ta skoj ti mas xa ep tskʼanik li vunetike, solel mu xa spas yuʼun skotol. Jaʼ yuʼun li ta sjabilal 1973, la svaʼanik jpʼej na ta Wallkill li stestigotak Jeova sventa tspasik imprimire. Ti kʼu xa sjalil slikel tale ep xa ta velta yichʼoj mukʼibtasel li imprentae. Ti kʼusi ora mas achʼ to la smukʼibtasike jaʼ ta 2004.

Tspasik programa sventa komputadora. Li ta 1979 oy jayvoʼ stestigotak Jeova lik spasik jun programa sventa komputadora, ti ojtikinbil avi kʼuchaʼal Sistema Electrónico de Edición Plurilingüe (li sletrailtak ta inglese jaʼ MEPS). Li avie jaʼ chkoltavan MEPS sventa xichʼ pasel li vunetik ti chalbe skʼoplal Vivlia ta mas ta 600 kʼopetike.

Smeʼ chanubtasel. Li ta 1988 laj yichʼ jelubtasel batel ta Wallkill li Chanob vun sventa Vivlia ta Galaad yuʼun Watchtower ti te toʼox oy ta Brooklyne, vaʼun li ta jabil taje lik noʼox ta 17 yuʼun oktuvre li chanune. Pe li ta sjabilal 1995 laj yichʼ jelel batel xtok li Chanob vun sventa Vivlia ta Galaad yuʼun Watchtowere, te xa laj yichʼ akʼel ta Patterson (Nueva York).

Jech kʼuchaʼal oy kʼusitik jelem talel li ta yan ranchoetike, ep xa jelem li abtelaletik chichʼ pasel li ta Srancho Watchtower xchiʼuk ti kʼutik yelan chichʼ pasel leʼ xa ta 50 jabil talele. Akʼo mi jech, jech-o tsots ch-abtejik sventa lekuk xlokʼ li kʼusitik tstsʼunik sventa slajesik li buchʼutik te ch-abtejik li ta Beteletik ta Nueva Yorke.

Li stestigotak Jeova avie yakal tsvaʼanik yan naetik, ofisinaetik xchiʼuk yan kʼusitik ta Wallkill. Jech noxtok, yakal tsmeltsanik lek li yan voʼneal naetike. Skotol li kʼusitik yakal chichʼ pasel li ta Srancho Watchtowere jaʼ sventa xichʼ makʼlinel ta mantal li epal krixchanoetik ta spʼejel Balumil ti ochemik xa ta s-organisasion li Jeovae.

Xi to chal li David Walker ti laj xa onoʼox kalbetik skʼoplal ta slikebale: «Toj echʼ noʼox chakʼbun muyubajel kʼalal chkil ti epajem xa li stestigotak Jeova leʼ xa talel 50 jabile, yuʼun skotol li kʼusitik chichʼ pasel ta Wallkille jaʼ sventa xichʼ chanubtasel ta Vivlia li krixchanoetik ta spʼejel Balumile».