Li ta septiembre ta 2012 mas ta jtob bikʼtal Beteletik laj yichʼ bajel ti jaʼ xa noʼox la sbain li mukʼta Beteletike.

Jech xtok li ta Serbia xchiʼuk ta Macedoniae laj yichʼ vaʼanel yan Beteletik. Oy chaʼtos srasonal tsots tajek skʼoplal ti kʼu yuʼun jech laj yichʼ pasele.

1. Sjutukajesoj abtelal li kʼusitik achʼ chlokʼanuk tale

Li ta slajebaltik xa jabile, li kʼusitik achʼ chlokʼanuk ta sventa spasel imprimir, Internet xchiʼuk ti epaj xa li kʼusitik xuʼ xijkʼopoj-oe jutukaj yuʼun ti kʼu yepal chtunik li ta junantik Beteletike. Vaʼun xokob jutuk sventa chichʼ takel ta ikʼel junantik jbetelitaetik ti chtunik toʼox ta bikʼit Beteletike.

Tana un, ta junantik lumetik ti lek sabil yavile, oy stestigotak Jeova ti lek chanemik ta skʼelbel skʼoplal li abtelal sventa chanubtasel ta Vivliae. Kalbetik skʼoplal li Betel ta México ti jaʼ xa lik sventaik li cholmantal ti te chichʼ pasel ta Costa Rica, El Salvador, Guatemala, Honduras, Nicaragua xchiʼuk li ta Panamae. Jaʼ yuʼun laj yichʼ bajel li Beteletik ta lumetik taje.

Oy 40 stestigotak Jeova ti te laj yichʼik takel batel li ta Betel ta Mexicoe xchiʼuk te van 95 ti laj yichʼik takel batel ta cholmantal ta tsʼakal ora li ta slumalike.

Li yantik xtoke te ch-abtejik ti butik tsjelubtasik kʼopetik ti jaʼ sventainoj li Betel ta México li ta sjunul yosilal Centroamericae. Li ta Panamae te van jtobuk stestigotak Jeova ti jaʼ sbainojik ta sjelubtasel ta yantik batsʼikʼopetik li vunetike. Li ta Betel ta Guatemala avie te oy vaklajuvoʼ stestigotak Jeova ti yakal tsjelubtasik li vunetik ta chantos sbatsʼikʼop stukike. Li oxib sien ermanoetik ti te toʼox oyik li ta Beteletik ta sjunul yosilal Centroamericae jaʼ xa noʼox 75 ti te chtunik ta junuk Betele.

2. Chtun mas j-abteletik ti ta xcholik mantal ta tsʼakal orae

Kʼalal laj yichʼ bajel junantik bikʼit Beteletike, li j-abteletik ti lek xtojobik ti te toʼox chtunik ta Betele xuʼ xa xbat yakʼbeik yipal ta xcholel mantal.

Jun stestigo Jeova ta África ti laj yichʼ takel batel sventa xchol mantal ta tsʼakal orae, xi la stsʼiba ta mas tsʼakale: «Vokol tajek laj kaʼi li ta slikebale, pe kʼalal ta jcholmantal skotol kʼakʼale jun koʼonton yuʼun, jaʼ jun bendision chkaʼi ti muʼyuk toʼox bu jech jnopoje. Li avie ta jchanubtas jtob krixchanoetik, li yantike chkʼotik xa ta tsobajeletik».