Kʼelo li kʼusi yichʼoje

Jun abtelal ti tsjelbe xkuxlejal jchukeletike

Jun abtelal ti tsjelbe xkuxlejal jchukeletike

Li stestigotak Jeova ta Españae chkʼotik ta vulaʼal ta 68 chukinabetik xchiʼuk te van vakibuk sien jchukeletik chchanubtasik ta Vivlia.

Li buchʼutik chakʼik chanubtasel ta Vivliae te skʼoplal ek li Miguel ti och toʼox ta chukel lajcheb jabil kʼalal maʼuk toʼox stestigo Jeovae. Li avie une jujun xemana tsut batel li ta chukinabe. ¿Kʼu yuʼun ti jech tspase? Jaʼ sventa tskolta yantik sventa xuʼ sjel xkuxlejalik jech kʼuchaʼal la sjel xkuxlejal eke.

Li Miguele ep tajek buchʼu la xchanubtas ta Vivlia li ta vaxakib jabile. Xi chale: «Lek tajek chkaʼi ti chbat jkolta jchukeletik ti bu toʼox li echʼ eke. Ximuyubaj tajek kʼalal chkil ti oy ta yoʼontonik chiktaik spasel li kʼusitik chopole».

Kʼalal chanib toʼox sjabilal li Miguele milbat stot yuʼun jun jyakubel ti yakubem tstsʼot skaroe. Vaʼun li smeʼe ep tajek lik abtejuk sventa tsmakʼlin li yalabtake.

Li Miguel xchiʼuk sbankile chpajilajik ta chanun xchiʼuk lik elkʼajikuk ta naetik xchiʼuk ta karoetik. Kʼalal lajcheb toʼox sjabilale jaʼ xa jun jmilvanej. Kʼalal yichʼoj xaʼox voʼlajuneb jabile lek xaʼox tspas kanal ta xchonel droga. Pe ti kʼu yepal tspas kanal ta xchonel drogae mu xtoj-o yuʼun li eroina xchiʼuk kokaina ti nopem tajek xaʼi slajesele, jaʼ yuʼun chlokʼ elkʼajuk. Kʼalal sta xaʼox vaklajuneb sjabilale ep ta velta laj yichʼ tikʼel ta chukel, jech muʼyuk xa mas chopol chaʼi li kʼusitik tspase. Xi chale: «La jnop ti te xa chicham ta chukinabe o ti jaʼ xa chicham-o li kʼusi nopem xkaʼi slajesele. Xikoʼolaj xa kaʼi kʼuchaʼal jkot vov ti te napʼal ta na ome».

Kʼalal jaʼo tikʼil ta chukel li Miguel ta 1994, oy jun yamigo ti la skʼanbe vokol jun stestigo Jeova ti akʼo stsʼibabe batel jlikuk karta li Miguele. Vaʼun li stestigo Jeovae te laj yalbe batel smelolal ta jlik karta ti tskʼatajes ta paraiso Balumil li Diose xchiʼuk laj yalbe ti persa skʼan sjel xkuxlejal mi tskʼan te chnakie. Xi chal li Miguele: «Kʼot ta koʼonton li kʼusi laj yalbune, ep kʼusi laj yakʼ jnop. Vaʼun lik jchan Vivlia manchuk mi jnaʼoj ti mu kʼunuke».

Ti jech tsnop taje jaʼ ta skoj ti snaʼoj ti uʼuninbil yuʼun li sikʼolajel xchiʼuk droga ti mu vokoluk ta tael li ta chukinabe. Yuʼun oy jun xchiʼil ta chukele jujun kʼakʼal ch-akʼbat droga. Li Miguele jujun kʼakʼal tskʼanbe vokol Dios ti akʼo xkoltaat ta yiktaele, vaʼun kom yuʼun.

Kʼalal echʼ oxib ue lik yalanbe yantik li kʼusi chchan ta Vivliae. Li ta yan jabile lokʼ ta chukel xchiʼuk laj yichʼ voʼ, vaʼun kʼot ta stestigo Jeova. Ta mas jelavele oy xa slekom xchiʼuk lik xchapan sba sventa chnupun. Jaʼ noʼoxe oy jtos svokol, kʼalal jun xaʼox u skʼan xnupune ikʼat batel ta chapanobbail ta sventa li kʼusi spasojan ta voʼnee, vaʼun bat ta chukel lajuneb jabil. Pe ta oxib noʼox jabil xchiʼuk oʼlole lokʼ ta chukel ta skoj ti lek stalelale xchiʼuk jun xa yoʼonton nupun. Li Miguele muʼyuk xa la spas li kʼusitik chopol toʼox tspase.