Kʼelo li kʼusi yichʼoje

Kʼusitik achʼ kʼot ta pasel ta Manhattan

Kʼusitik achʼ kʼot ta pasel ta Manhattan

Ta noviembre ta 2011 li ta Manhattane oy kʼusi achʼ lik spasik jayib stestigotak Jeova sventa chakʼik ta ojtikinel li lekil aʼyejetik ta Vivliae, lik stunesik alakʼik sba mexaetik xchiʼuk yavil vunetik ti stakʼ jochele. Jech lik spasik ta sural Manhattan ti bu te xtal xbat noʼox epal krixchanoetike xchiʼuk ti jaʼ jun voʼneal lum ta yosilal Nueva Yorke.

La xchʼakik ta chanjot li lum taje. Li ta jujujot taje te akʼbil jkot mexa xchiʼuk yavil vunetik ti lek chapanbilike, noj ta vunetik ti lokʼemik ta Vivlia ti bu stakʼ xpajik li krixchanoetik ti te xtal xbatike. Li mexaetik taje chabibil yuʼun jtuneletik ti tspasbeik yabtel Dios ta tsʼakal orae. Jutuk mu skotoluk te akʼbilik ti bu nopol skotleb karoetike ti bu ch-echʼ jaymiluk krixchanoetik jujun kʼakʼale.

Li buchʼutik chnopajik batel li ta mexaetik taje xuʼ stabeik stakʼobil ta Vivlia li kʼusitik ep tsjakʼbe sbaike. Yan li buchʼutik mu skʼan xjalijike xuʼ stsakik batel jlikuk vun sventa skʼelik ta mas tsʼakal.

Oy ep vunetik ta jeltos kʼopetik li ta mexaetik taje, pe mi oy buchʼu oy kʼusi tskʼan ta yan kʼop ti muʼyuk tee, xuʼ skʼuban, vaʼun xuʼ xbat skʼan ta tsʼakal.

Lek tajek chaʼiik krixchanoetik xchiʼuk j-abteletik li kʼusi lik spasik li stestigotak Jeovae.Jech kʼuchaʼal liʼe, xi laj yal jun polisiae: « ¿Kʼu yuʼun jaʼ to jech lik apasik? Ta melel li voʼoxuke oy avuʼunik kʼusitik chtun yuʼun li krixchanoetike».

Oy jun vinik ti vaʼi ta anil kʼalal laj yil ti te oy ta sba mexa li livro ¿Kʼusi chchanubtasvan ta melel li Vivliae? Yuʼun laj yil ti oy jayvoʼ krixchanoetik tskʼelik batel ta metro li livro taje xchiʼuk la sjakʼbe sba bu la staik. Laj xa stabe stakʼobil.

Oy jun kerem ti te onoʼox ch-echʼilan vakibuk xemana sventa chbat ta yabtele, te chjelav ta stsʼel li jun mexae. Vaʼun oy jun kʼakʼale paj xchiʼuk xi laj yale: «Ta jkʼan koltael». Ta sjunul yoʼontonik koltavanik. Laj yakʼbeik jlik Vivlia xchiʼuk laj yalbeik kʼusitik xuʼ spas sventa stabe sbalil.

Oy epal krixchanoetik ti chpajik sventa tsloʼiltabeik skʼoplal kʼusitik ta Vivlia xchiʼuk xmuyubaj xa chbatik. Ta skoj li kʼusitik lik spasik ta Manhattan li stestigotak Jeovae, oy jun u ti laj yichʼ pukel 3797 revistaetike xchiʼuk 7,986 livroetik.