Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Videoetik te ya yakʼ tseʼel-oʼtanil

Videoetik te ya yakʼ tseʼel-oʼtanil

Jtul tatil ta Malasia jich la yal te kʼalal laj yoʼtan ta yilel te video yuʼun alaletik te sbiilinej Amigoina te Jehová: «Jich kʼoem te bitʼil te Jehová ya snaʼ stojol te bin ay ta yoʼtanik te meʼil tatiletike».

Te caricatura ya spasik te stestigotak te Jehová ta videoetik yuʼun alaletike, te machʼatik ya xchiknajik ta ilel tey-ae, jaʼ te alal kerem Caleb sok te sfamiliae. Spisil te videoetik-abi ya xjuʼ ta tael ta página jw.org, te videoetik-abi, ya snojpteslan te alaletik ta spasel te bintik leke soknix ta swenta te schʼuunel yoʼtanike. Ay jun video te ya yakʼ ta ilel te bitʼil ma lekuk te elekʼe, ay yan te ya yakʼ ta ilel te bin-utʼil ya xjuʼ ya skʼoponik te Diose.

Swenta ya sta slekilalik ta spisil te alaletik ta swolol Balumilal, te sbabial video la yichʼ pasele la yichʼix kʼasesel ta 131 ta chajp kʼopil.

Kʼaxto ya yichʼ mulanel te videoetik

Jtul ants te ay joʼeb ta tul yalatak jich la stsʼibay: «Aytonax jun semana kichʼbelkotik te DVD Jehová bendice al que escucha y obedece, ¡ay la kiltikix cincuenta buelta!». Te yichʼtiklanoj te sbabial bintik ya yakʼ ta nopele.

Te Millie aytonax lajchayeb yaʼbilal sok ay ta nainel ta Inglaterra. Ay jtul sbankil te sbiile jaʼ Thomas te ay joʼlajuneb yaʼbilal te yichʼoj te chamel síndrome de Down. Te Millie jich la stsʼibay: «Te Thomas skʼejoj ta iPad yuʼun te videoetik yuʼun Caleb sok ya yakʼbey yil te sjoʼtak ta escuelae. Ya smulan bayal te kʼayojiletik sok kʼax lek ya skʼajintaylan. Jtul hermana ta congregación okʼ yuʼun te kʼalal la yaʼiy stojol te bitʼil ya xkʼajin te Thomas. ¡Kʼax tʼujbil ta aʼiyel!».

Te Ava jich la yal ta skarta te aytonax waxakeb yaʼbilal, baluneb u sok veinticinco kʼajkʼal, jich la yal: «Te Caleb sok te swixe ya snaʼik snojptesel ta lek te alaletike».

Ta skarta te Mikaylah jich la yal: «Ayix waxakeb kaʼbilal. Ta swenta te DVD Jehová bendice al que escucha y obedece. La kʼot koʼtan teme ya jchʼuunbey smantal te jtat sok te jnane, ya x-akʼbot stseʼelil yoʼtan yuʼun te Jehovae».

Bayal bintik ya yakʼ ta nopel

Jtul kerem te maba testigo yuʼun Jehová te ya spas caricatura yuʼun alaletik, te kʼalal la yil te video Robar es malo chajpnax la yil-a, chajptoxan la yaʼiy-a te kʼalal la snaʼ stojol te tut jtsojbnax te machʼatik la spasike. Jich la yal: «Bayal machʼatik ya jnaʼbey sba te ya x-aʼtejik ta mukʼul naetik o tut naetik te banti ya yichʼ spasel grabar videoetik yuʼun caricatura, ay baeltik ya jojkʼoybeyoj jba te binwan yilel te aʼtel tey-ae. Sok jnaʼoj te manchukme ya spasik tulan ta spasel te caricatura, jaʼnax ya stseʼenik jtsʼinuk yuʼun te machʼatik ya yilike. Yan stukel te videoetik ya apasike ya skoltay te alaletike, melel ya snojpteslan ta swenta te bintik lek ta pasel sok ya yakʼbeyik snaʼ te bintik maba leke soknix ya xkoltayotik ta spasel te bin leke. Kʼax lek te videoetik te ya apasike, melel ya xtuun yuʼunik te yantike, jaʼ yuʼun kʼax bayal skʼoplal te aʼtelil yakex ta spasele».

Bayal ta tul meʼil tatiletik ta swolol Balumilal bayal yalojik wokol yuʼun ta swenta te videoetik–abi. Jtul nanil te ay jtul yal te oxebtonax yaʼbilale, jich la stsʼibay: «Ta jun buelta te tut kerem kuʼun te kʼalal yak ta yilel-a te kʼayojil ta video, La amistad con Jehová. Te kʼalal olil ayix ta yilel-a te video la stoy skʼab ta yoʼtan sok jich la yalbon: “Jnan ya yakʼbon sbujtsʼ koʼtan te video ini”».