Jama yuʼun ya x-ochat

Tsaa bin kʼopil

Ochan ta banti bintik jujunchajp yichʼoje

Ochan ta banti te bintik yichʼoje

sTestigotak te Jehová

tseltal

Tʼujbil kʼayojiletik ta bayal kʼopiletik

Tʼujbil kʼayojiletik ta bayal kʼopiletik

Te skʼasesel ta yan kʼopil te letraetik yuʼun te kʼayojiletike, ma kʼunuk ta pasel. ¡Nopanax awaʼiy te jayebto aʼtel yichʼoj te skʼasesel jpajk libro te yichʼoj 135 kʼayojiletike!

Te stestigotak Jehová la spasik tulan ta pasel te aʼtelil ini, ta oxeb jaʼbil juʼ yuʼunik skʼasesel ta 116 kʼopiletik te yachʼil libro yuʼun kʼayojiletik te sbiilinej Cantemos a Jehová. Soknix ay jpajk te jaʼnax yichʼoj 55 kʼayojiletik te yichʼojix kʼasesel ta 55 kʼopiletik. Jaʼnix jich yakto ta kʼasesel ta bayalxan yantik kʼopiletik.

Te skʼasesel yan kʼopiletik, ma pajaluk sok te schajpanel sletraul te kʼayojiletike

Te stestigotak Jehová ay skʼasesojik ta 600 kʼopiletik te junetik sok yantik te bintik lokʼem ta Biblia, sok ay 400 kʼopiletik te ayix ta Internet. Jaʼukmeto te skʼasesel ta yan kʼopil te sletraul te kʼayojiletike maba kʼun ta pasel, melel te musika yuʼun te kʼayojiletik maba ya xjelon ta yantik kʼopiletik.

Te schajpanel sletraul te jun kʼayojile ma pajaluk sok te skʼasesel ta yan kʼopil te jun revistae. Jich bitʼil te skʼasesel ta yan kʼopil te revista La Atalaya, te machʼatik ya skʼases yan kʼopiletik ya spasik tulan te toj ya skʼasesik te bitʼilnix la yichʼ tsʼibayel ta nailale. Jaʼukmeto ma spisiluk-ora jich ya xjuʼ ya yichʼ pasel ta swenta te kʼayojiletike.

Te skʼasesel ta yan kʼopil te kʼayojiletik

Te bin-utʼil ta kʼasesel ta yan kʼopil te kʼayojiletike yan jtebuk-a. Ma jaʼuknax te jich ya yichʼ kʼasesel te bitʼil tsʼibaybil ta nailale, melel bayal skʼoplal te ya yichʼ tsael tʼujbil kʼopetik sok te yakuk xjul ta koʼtantik ta oranaxe.

Te kʼopetik ya yichʼ tuuntesel ta jun kʼayojil ya skʼan te manchuk chujkʼuluke, yuʼun jich te kʼalal ay machʼa ya skʼayojtaye oranax ya snaʼbey swentail sok te bin ya skʼan ya yale. Chikan ta biluk kʼopil, ya skʼan te orauk ya xlokʼ ta alel te tʼujbil kʼopetike sok te pajaluk ya stsak sba sok te musika sok te jichuk ya kaʼiy jbatik te joʼotiknix ya xlokʼ ta koʼtantik te kʼopetik tsʼibaybil tey-ae.

¿Bin-utʼil juʼ yuʼunik spasel-abi te jkʼasesej yan kʼopiletike? Ta swenta-abi, maba pʼalapʼal la skʼasesik te kʼopiletik yuʼun te kʼayojil ta inglés. La yichʼik albeyel te yakuk stuuntesik kʼopetik te bitʼilnix ya xkʼopojike sok te orauk ya xjul ta koʼtantike sok te jaʼuk ya skʼasesik te bin-nix ya skʼan ya yal-a te jujun kʼayojile soknix te ya yichʼik ta wenta te kʼopetik lokʼem ta Biblia te tey albil-ae.

Te bin sbabial la spasike jaʼ te pʼalapʼal la skʼasesik te jujun kʼayojile. Ta Patil jtul Testigo yuʼun Jehová te ya snaʼ schajpanel sletraul te kʼayojile la spas ta tʼujbil kʼopetik sok te ya xchiknaj ta aʼiyel te bin ya skʼan ya yale. Te machʼatik ya skʼasesik yan kʼopiletik la spaj yilik sok te bitʼilnix tsʼibaybil ta nailale teme toj la yichʼ kʼasesel te bitʼil te smelelil kʼop ay ta Bibliae.

Bayal miyon ta tul stestigotak Jehová ta swolol Balumilal sok sbujtsʼ yoʼtanik la yichʼik sok la smulanik te yachʼil sjunal kʼayoje. Sok ay bayal machʼatik yakik ta smaliyel te yakuk xlokʼix ta sbatsʼil kʼopik te kʼayojiletike.

 

Naʼbeyaxan skʼoplal

¿Bin utʼil ya yichʼ tsʼibayel sok kʼasesel ta yan kʼopil te junetik lokʼem ta Bibliae?

Ya jlokʼeskotik junetik lokʼem ta Biblia te kʼaxemto ta seiscientos ta chajp kʼopiletik. ¿Bin yuʼun te ya jpastik tulan ta spasel te mukʼul aʼtelil ini?